Kam Folem Mi
Doktrin mo Ol Kavenan 71; 77; 82
Ol Rij Samting we oli Haed
Luk wanem i stap daon smol andanit long ol skripja.
Lod bae i blokem ol enemi blong yumi long stret taem blong Hem.
Long en, Lod bae i blokem ol enemi blong yumi.
Blong “blokem” long wan i minim se blong konfiusum, sapraesem, winim, mekem i sem, mekem i nogud, o mekem hem i wari.
Taem Lod i talem long Josef Smit se “sapos eni man i leftemap voes blong hem agensem yutufala bambae mi blokem hem long stret taem blong mi” (Doktrin mo Ol Kavenan 71:10; oli ademap long italik), Hem i givim promes se olgeta we oli agensem gospel bambae wandei bae oli eksperiensem nogud risal blong ol joes blong olgeta.
“Long stret taem blong mi” i minim se Lod i gat stret taem blong Hemwan. Yumi mas akseptem se plante pipol bae oli no save kasem stret risal blong ol aksen blong olgeta—mo hemia i Oraet. Yumi mas trastem Lod mo taem blong Hem.
Yes, yumi mas stanap from trutok. Be taem yumi mekem hemia, yumi mas gat respek long ol bilif blong ol narawan mo fridom blong jus blong olgeta blong no akseptem gospel.
No wari abaot ol pipol we oli mekem i kam misin blong olgeta blong tokbaot nogud man mo daonem Jos, we oli wiling blong giaman mo no ripresentem gud ol bilif blong yumi. Lego hemia long Lod. Long en—bambae Hem i blokem olgeta mo givim wan janis long olgeta blong lanem [gospel] mo jenis.
Olsem yumi, ol animol oli ol sol we oli laef mo Papa long Heven i kea long olgeta.
Ol animol fren blong yumi Papa long Heven i bin krietem.
Bae yu luk se hem i wan smol ditel, be i gat wan samting we i naes tru we long Doktrin mo Ol Kavenan 77: !Ol animol tu oli gat ol sol!
Hemia i wan samting we plante pipol oli bilivim oltaem—hemia i filim se i tru—nomata se Baebol mo Buk blong Momon i no talemaot. Naoia Lod i nomo talemaot long sam nara wei.
Olsem ol pipol, “ol bigfala animol” mo “ol animol we oli stap wokbaot long graon” mo “ol pijin” evriwan ia oli krietem olgeta long saed blong spirit faswan. Spirit bodi blong olgeta i olsem blong yumi, we i semmak long bodi blong olgeta. Mo olgeta oli semmak long yumi, bae oli gat glad “blong taem we i no save finis”—hapines mo glad blong laef bakegen wetem bodi blong olgeta. (Luk long Doktrin mo Ol Kavenan 77:2–3.)
Yumi save se Papa long Heven i krietem ol animol, i givim wok long yumi blong lukaotem olgeta, mo wantem blong yumi tritim olgeta wetem kaen fasin. Semmak olsem yumi, oli ol animol we i blong oltaem, we Papa long Heven i kea long olgeta.
Yusum gud ol blesing we yu kasem.
Aedia ia se wetem bigfala paoa bigfala responsabiliti i kam, i no kam long ol supa hiro. Sevya i talem semmak toktok ia taem hem i talem long Josef Smit: “Long hem we mi givim plante, mi askem plante long hem” (Doktrin mo Ol Kavenan 82:3).
Ol talen, presen, mo ol blesing oli kam long Lod. Hem i no wan gudfala aedia blong tekem nating long olgeta. Sapos Lod i blesem yu wetem wan smat maen mo wan strong tingting blong wantem lanem samting, be afta yu westem taem blong yu long skul mo gat wan mak we i haf nomo, nao yu yusum rong presen blong yu. Hemia i semmak long wan we i plei long atletik mo i yusum paoa blong hem blong stap jikim ol narawan, o wan we i gat blesing wetem wan gud tingting mo i yusum blong spolem ol pipol (plante long yumi i nid blong wok long hemia).
Lod i wantem yumi blong mekem bes blong yumi—mo hemia oli komperem wetem paoa blong yumi, be i no blong eni wan. Hem i dipen long wanem skil yumi stap tokbaot, “bes” blong yu i save gud moa o nogud moa bitim nara “bes” blong wan narawan. !Mo hemia i oraet nomo! Yu mas lukaot gud long ol paoa blong yu, mo putum tingting i stap daon abaot ol samting we yu no strong long hem, mo letem Lod i helpem yu blong kasem ol paoa blong yu .