God I Stap wetem Yu Oltaem

Taem hem mi gat eit yia, ol misinari oli mitim apu woman mo anti blong mi long rod. Afta we mifala i lanem abaot gospel, mifala evriwan i kasem baptaes. Be long 2020, mifala i mas stop blong go long jos from KOVID. Afta long hemia mifala i stop blong biliv.

Tu yia i pas, mi no iven biliv long God o save sapos Hem i stap tru. Wan dei afta long skul, mi wantem krosem rod blong pem snak (twisti, jips). Be wan voes i talem long mi blong no krosem rod. Mi bin stop mo tu trak i aksiden long fored blong mi. Sapos mi bin krosem rod bae trak i sperem mi o kilim ded mi. Mi bin save long taem ia se God i save mi mo i lavem mi. Iven we mi no biliv long Hem mo no stap go long jos long taem ia, Hem i gohed blong lavem mo lukaotem gud mi.

Mi stat blong ridim Buk blong Momon bakegen mo kam blong save se hem i toktok blong God. Mi stat tu blong gobak long jos. Taem mi go long jos, mi filim pis, lav blong God, mo help blong Hem. Mi filim se Hem i stap wetem mi oltaem, mo hemia i mekem mi glad.

Fevret hym blong mi hem i “Mi Pikinini blong God” from se hem i rimaenem mi se Papa long Heven i lavem mo helpem yumi. Mo tu, mi laekem skripja ia 2 Nifae 2:27, we i tokbaot olsem wanem yumi fri blong jusum bitwin raet mo rong.

Plante manis i pas, brata blong mi i stat kam long jos wetem mi, be samtaem hem i stop. Hem i wari abaot wanem nao ol fren mo ol narawan bae oli tingting long hem. Hem i ting se bae hem i mekem sem long hemwan blong go long jos blong yumi, be mi talem long hem se i nomata wanem ol fren oli gat long tingting. Wanem we God i gat long tingting nao oli impoten.

Famli blong mi i no stap go long jos. Mi stap go miwan. From we long rod blong mi i nogat bas blong go long bilding blong Jos, mi stap wokbaot blong 30 mining blong kasem jos. Famli blong mi oli wari long wanem we bae ol pipol oli talem abaot olgeta, be mi talem long olgeta se hemia i no impoten from mi save se i tru.

Taem mi mit wetem ol fren blong mi, samtaem oli stap dring kofi. Mo taem mi luk hemia, samtaem mi tu mi wantem dring. Be mi tingbaot God i stap wetem mi. Hem i holem han blong mi mo helpem mi. Mi harem voes we i talem long mi blong no dring kofi, mo mi save se God i stap jelpem mi blong winim ol jalenj ia.

Sapos mi save givim advaes long ol wan we i stap long situesen blong mi, bae mi talem long olgeta se yu yu gat bigfala blesing, mo yu gat bigfala fet. Yu no stap yuwan, from se ol memba blong Jos mo ol misinari oli save givim long yu ol gud advaes. God i lavem yu. Yu yu pikinini boe o gel blong Hem, mo Hem i wantem blong helpem yu.