Help mo Gaed blong Fiuja

Mi bin gat 17 yia taem profet, Presiden Spencer W. Kimball (1895–1985), i visitim Saot Korea long 1975. Mi bin luk hem long wan miting we i gat 400 yut blong Korea oli kam tugeta blong harem voes blong hem.

Presiden Kimball i bin serem olsem wanem hem i bin stadi ol skripja mo prea evri dei stat taem we hem i yang. Hem i tokbaot hamas i impoten blong putum ol samting we oli impoten i kam faswan. Hem i talem se yumi mas go long seminari, rere from misin mo mared we i no save finis, mo wok blong sevem yumi. Mo tu, hem i serem testemoni blong hem.

Ol toktok blong profet oli mekem tingting blong mi i klia. Mi bin stap long hae skul, be mi no intres blong mekem skulwok. !Mi laekem spot!. Mi plei futbol enitaem we mi gat janis mo plante taem mi pleiplei be mi no stadi Mi no bin wan gud studen. Afta we mi harem profet, mi gohed blong laekem futbol, be mi jusum blong putum sam impoten samting i kam faswan.

Bae mi mekem bes blong mi blong stadi. Bae mi go long misin, sil long tempol, mo gat wan hapi famli. Mi save se blong mi gat gudfala fiuja, mi mas folem profet—nomata wanem.

Wetem evri janis mo ol jalenj we bae yu fesem, bambae yu Oraet taem yu folem gaed we profet we i stap laef i givim.

Mi bin mekem komitmen blong sevem wan misin, be i gat tu seves militeri long Saot Korea. Afta long hae skul, plante yang man oli go long militeri, oli mekem i hapen wanem we gavman i askem, mo go stret long edukesen mo faenem wok. I bin had tumas blong givim nara tu yia long misinari seves. I no bin gat fulap elda blong Korea long taem ia.

Taem mi kasem 19 yia, mi kipim komitmen blong mi mo mekem rere mo sendem i go ol misin pepa blong mi. Oli singaotem mi blong givim seves long Korea Busan Misin. Wan yia afta, mi go long militeri. Mi harem nogud tumas from mi mas stopem misin blong mi.

Taem mi finisim militeri seves tri yia afta, mi filim se mi no bin finisim gud misin blong mi. Evriwan i talem long mi, “Yu sevem wan misin finis. Lod i andastanem situesen blong yu, givim seves blong wan yia hem i Oraet.”

Mi askem wan gud fren blong mi blong seminari wanem nao mi mas mekem. Hem i talem se hem i save se bae mi go givim seves long misin blong mi blong wan nara yia. Tras blong hem i givim mi strong tingting mo konfemesen blong givim moa seves. Mi givim seves blong seken yia blong mi long Korea Seoul Misin. Taem ia we mi finisim misin blong mi, mi gat 25 yia. Mi maredem semmak fren blong mi ia afta long hem mo mitufala i bin sil long Lei Hawae Tempol.

Eksperiens ia i tijim mi se bae yu oraet nomata we ol samting i no hapen folem wei we yu tingting long hem. Taem ol plan mo visen blong yu i go stret wetem tingting blong Lod long yu, bae Hem i helpem yu long ol desisen blong laef blong yu.

Nomata se mi no bin sua olsem wan yut se wanem kaen laef bae mi gat, mi faenem se blong putum ol samting long saed blong spirit i kam faswan i ki ia blong sakses—i no long laef ia nomo, be tu, long laef we bae i kam.

Taem yu bin kasem baptaes, yu kasem presen ia we i Tabu Spirit. Taem yu lukluk nomo long ol tingting mo filing we yu kasem, Tabu Spirit bae i protektem yu mo lidim yu long stret rod blong go long hem. Mo tu, bae yu filim kamfot mo pis.

Taem yu rere from fiuja blong yu, tingbaot blong:

• Stadi ol skripja.

• Gohed blong prea.

• Folem profet;

• Oltaem dipen long Lod.

Taem mi gat semmak yia olsem yufala, mi lanem abaot ol fasin blong Sevya mo olsem wanem bae mi save kam moa olsem Hem. Hem i stret gud evriwan. Mi no save kam olsem Hem fulwan long laef ia, be mi stap traem bes blong mi, mo mi stap kam moa gud taem mi mekem hemia.

Mi save se Jisas Kraes i stap laef. From Hem, mi gat wan bigfala hop long fiuja—mo yu tu i semmak!