Gospel blong Jisas Kraes: Wan Saon blong Glad

Gospel blong Jisas Kraes i bin kambak tru long Profet Josef Smit Long las testemoni blong hem i go long Jos, Presiden M. Russell Ballard (1928–2023), we i–Akting Presiden blong Kworom blong Olgeta Twelef Aposol, i talem:

Yumi save huia i God; yumi save huia i Sevya, from se yumi gat Josef. …

“… olsem wanem yumi gat blesing ia blong save wanem yumi save abaot stamba tingting blong yumi long laef ia, from wanem yumi stap ia, wanem yumi mas stap traem blong mekem mo winim long evri dei laef blong yumi.”

Blong ol memba blong Jos Ia blong Jisas Kraes blong Ol Lata-dei Sent, save ia we i gat wan andastaning blong plan ia blong God we i stret gud evriwan, we oli save tu olsem “bigfala plan blong hapines,” “plan blong pemaot man,” mo “plan blong sore” (Alma 42:8, 11, 15). Plan blong God i “karemaot ol samting we i mekem yumi wari long laef ia, mo ol samting we i mekem yumi no sua abaot fiuja blong yumi.” Impoten mo stamba long plan ia mo stamba tingting blong laef ia i “doktrin blong Kraes.”

Tru long gospel yumi save se yumi ol pikinini blong God, oli sendem yumi kam long wol ia blong testem yumi mo stap rere blong laef bakegen long ded (luk long Doktrin mo Ol Kavenan 76:39). Yumi save ol komanmen mo oli tijim yumi blong “save gud aot long nogud” (Seken Nifae 2:5). Yumi save se yumi stap ia blong lavem mo givim seves mo se Sevya i bin singaotem yumi blong winim wol mo helpem ol narawan blong mekem i semmak (luk long Jon 16:33).

Wanem we Josef Smit i singaotem “saon blong glad blong Gospel blong Lod blong yumi Jisas Kraes” bae i mekem yumi kam strong long ol dei we oli had mo givim mining mo stamba tingting long yumi mo ol narawan.

God i givim yumi fridom blong mekem joes blong mekem se bae yumi save kasem ol risal blong ol joes blong yumi (luk long Doktrin mo Ol Kavenan 101:78; luk tu long 2 Nifae 2:16). Olsem pat blong “wan fasin blong go agens long evri samting.” (2 Nifae 2:11), oli letem Setan blong temtem yumi blong yusum rong fridom blong mekem joes blong yumi.

Long dei blong yumi, Lod Jisas Kraes i singaotem Josef Smit “mo i stap long heven mo toktok long hem, mo givim ol komanmen long hem” (Doktrin mo Ol Kavenan 1:17 Lod i gohed blong rivilim ol komanmen mo tingting blong Hem long profet blong Hem tedei from we Hem i wantem tumas blong lidim yumi blong stap hapi long laef ia mo long selestial glori long nekis laef.

King Benjamin I Prij long Ol Man blong Nifae,, i kam long Gary L. Kapp

Stap Tijim Tru Doktrin, i kam long Michael T. Malm

Josef Smit I Stap Prij, i kam long Sam Lawlor

Fasin blong stap obei ol komanmen blong God i mas kam long tru hat mo lav blong yumi long Hem. Lod Jisas Kraes i tijim se, “Sapos yufala i lavem mi, bambae yufala i save obei long ol tok blong mi” (Jon 14:15). Ansa we i moa hae i blong soem lav blong yumi long Lod mo kipim ol komanmen blong Hem, ol blesing we i givim hapines mo glad (luk long Doktrin mo Ol Kavenan 130:20–21).

Wetem wan klia lukluk blong tabu stret ples mo rod blong yumi, yumi save se “samting we bae i mekem laef long wol ia i moa gud olsem we i stap, bae oli stret semmak samting ia we bae oli mekem laef blong [yumi] truaot long taem we i no save finis oli kam moa gud!”

Wan hapi konvet we mi bin mitim hem long Japan sam yia i pas i faenem gospel blong Jisas Kraes we i bin kambak tru long hadwok blong hem, mo blong ol misinari, mo ol memba. Hem i faenemaot stamba tingting blong hem mo mekem visen blong hem abaot plan ia blong hapines i kam moa bigwan, we i givim hem ol blesing mo glad we i leftemap hem long saed blong laef ia mo long saed blong spirit.

Elda Patrick Kearon blong Kworom blong Olgeta Twelef Aposol i bin tijim:

“From se tru long plan ia blong Papa blong yumi long Heven we i gat lav from wanwan long ol pikinini blong Hem, mo tru long laef blong Hem we i pemaot yumi mo misin blong Sevya blong yumi, Jisas Kraes, yumi save—mo mas—!stap ol pipol we oli stap glad bigwan long wol ia! Nomata ol hadtaem blong laef we oltaem bae i mekem yumi stap harem nogud bigwan, yumi save wokhad blong gat glad we i gohed blong stastap mo pis, tru hop blong yumi long Kraes mo save ia abaot ples blong yumiwan long naesfala plan ia blong hapines.”

Mi talem bigfala tangkyu long, mo testemoni blong, gospel blong Jisas Kraes we i kambak mo bigfala plan ia blong hapines. Mi invaetem yu blong tekpat long ol frut blong gospel ia mo filim moa glad long rod blong yu i go long laef we i no save finis.