Sanlaet long Ol Hadtaemblong Mi

I no long taem i pas, mi go tru long wan samting we i bin had tumas. Papa mo mama blong mi tufala i seraot, mo mama blong mi i wok long nara kantri. Mi bigwan wetem apu woman blong mi—hem nao i introdiusum gospel mo Jos long mi. Be long yia ia, mi sapraes we hem i bin ded.

Long tiingting blong mi, hem bae i no ded faswan. Samtaem mi tingting se bae mi ded bifo long hem from se !hem i helti gud! Hem i neva soem se hem i no strong mo oltaem hem i strong long fored blong mi. Mi neva pikjarem laef blong mi sapos hem i nogat.

Afta we hem i ded, samtaem mi tingting se bae mi tu mi ded. Mi gat ol tingting blong endem laef blong miwan. Be i no longtaem mi go long wan yut stek aktiviti mo mifala i bin gat wan lesen abaot plan ia blong fasin blong sevem man.

Mi bin save abaot plan ia blong fasin blong sevem man, be andastaning blong mi long hem i bin olbaot from wanem we i bin hapen long apu woman blong mi. Taem mi lisin, mi tingting se, “mi bin fogetem ol blesing blong sakrifaes blong Jisas Kraes from mi.”

Mi kam blong luksave se Jisas Kraes i bin ded blong sevem mi. Mi no sapos blong endem laef blong mi from ol trabol we mi stap go tru long hem. Plan ia blong hapines i givim mi hop se mi save luk apu woman blong mi bakegen samdei, from se laef i no en taem yumi ded. Mi nid blong gohed blong folem Sevya blong mekem se mi save luk apu woman bakegen.

Afta we apu woman blong mi i ded, kasen blong mi i muv i kam stap wetem mi long haos mo hem i lukaotem mi. Ol kasen blong mi oli ol bes fren blong mi, be yet blong jenis hem i bin had tumas. Mi mas lanem blong mekem evri wok we apu woman blong mi i bin stap mekem. Mi mas wekap miwan blong go long skul mo mekem ol samting long haos.

Oltaem bisop blong mi i tokbaot fasin blong dipen long yuwan, mo mi lukaotem hemia insaed long Gospel Laebri. Hemia i helpem mi blong stanap strong long tufala leg blong miwan.

Mi stap gohed yet blong gat kontak wetem papa blong mi. Wan dei, mitufala i gat wan raorao. Mi bin fesem gud hadtaem wetem hemia, be afta i gat wan janis blong go long yut tempol trip. Taem mi stap insaed long tempol, mi bin filim pis. Mi no bin tingbaot ol problem long hom. Mi no bin tingbaot kros we mi bin gat long papa blong mi. Mi tingting long ol samting we mi save mekem blong helpem hem. Mi tingting blong stap wan gud eksampol long hem. Mi tingting long ol blesing we i no save finis, blong sil wetem papa mo mama blong mi insaed long tempol sam dei. Mi disaed blong talem sori long papa blong mi from mi bin faet wetem hem.

Mi bin lanem blong oltaem mi lukluk nomo long Jisas Kraes mo Papa long Heven. Mi kasem paoa blong mi long Tufala, mo mi tingbaot se Tufala i lavem mi.

Blong andastanem plan ia blong fasin blong sevem man, speseli Atonmen blong Sevya, i bin helpem mi blong winim ol tingting blong mi blong fasin blong kilim ded miwan. I helpem mi blong filim pis blong stap laef. I givim mi hop se mi save mitim apu woman blong mi long narasaed vel bakegen sam dei.

Jisas Kraes i hop ia blong stap gogohed long laef blong mi nomata se mi gat fulap jalenj. Lav blong Hem long mi bae i neva en. Hem sanlaet long laef blong mi. Taem i gat strong win o ren, Hem i stap ia. Hem i Sevya blong mi Hem i hom blong mi. Hem i laef blong mi. Hem i helpem mi blong stap gohed. Hem i wan long ol risen we mi laekem blong stap laef.