Taem Ol Tes blong Laef oli Bigwan Tumas
Ol jalenj oli pat blong laef. Be wetem help, yumi save lukluk olgeta tru long lukluk we i blong God.
Hil Timpanogos i wan hil long Yuta, YSA, we i 3353 mita hae mo i fulap wetem ol wotafol, ston wol, foks, mo wael laef. Blong stanap long wan ples long wan hil olsem i save mekem yu filim smol. Yu no save lukluk ova o raonem hil ia. Bae yu save luk se i bigwan mo i no posibol.
Be, wan minit blong draev i go longwe aot long Hil Timpanogos i letem yu blong luk hil ia long defren lukluk. Long lukluk ia, yu save tekem not se ol rod Hemia i soem se ol narawan i bin stap ia bifo mo se i gat wan ples we i sef longwe mo raon long hil.
Ol hadtaem long laef blong yu naoia bae yu filim se i semmak. Blong fesem wan jalenj we i had i save filim olsem se yu stap lukluk wan bigfala hil we yu no save lukluk i go ova o iven raon long hem. Bae oli save bigwan mo bae i save no posibol blong winim. Ol tes ia i save mekem yu filim se yu smol, tingting i fasfas, fraet, o stap yuwan.
Be hemia i wan samting blong traem. Tekem wan step i gobak mo traem blong luk ol hadtaem blong yu long wan defren lukluk—long lukluk blong God.
Wetem lukluk ia, yu save luksave tu se oli no lego yu yuwan blong winim ol problem blong yu. Yu gat wan Papa long Heven we i lavem yu mo bae i helpem yu. Ol narawan, speseli Sevya tu, i bin winim ol hadtaem. Oli wantem givim yu gaed we yu nidim blong winim ol hadtaem blong yu, oven olgeta we oli bigwan.
?Olsem Wanem Nao Bae Yumi Save Jenisim Ol Lukluk blong Yumi?
1Folem plan blong Papa long Heven.
Jisas Kraes i eksampol blong yu we i stret gud evriwan. Ol prinsipol we Hem i tijim oli simpol, gat paoa, mo isi blong andastanem. ?Hemia i minim se oltaem i isi nomo blong folem? No. I no oltaem. Be evri taem we yumi mekem blong folem Hem wetem fet, lukluk blong yumi bae i stat blong jenis. Bae yumi stat blong luk ol jalenj olsem ol janis blong go long Sevya be i no blong luk olgeta olsem ol panismen, problem, o hadtaem blong kipim yumi longwe.
2Askem help long God.
God hem i Papa blong yu long Heven. Hem i save yu, Hem i lavem yu, mo i redi blong helpem yu eni taem we yu askem help. Presiden Russell M. Nelson i tijim se “lukluk blong Lod i bitim waes blong yu long laef ia. Ol ansa blong Hem long ol prea blong yu i save mekem sapraes mo bae i helpem yu blong tingting selestial.”
Taem yu prea, God i save helpem yu blong luksave ol samting we yu no save luk naoia. Hem i save lidim yu tru ol hadtaem mo iven givim pis mo paoa long yu taem folem Hem.
3Askem ol narawan from help.
Papa long Heven i bin putum ol gudfala pipol long laef blong yu we bae oli save helpem yu. Taem yu stap fesem hadtaem wetem ol jalenj we i bigwan tumas long yu, tingting blong toktok wetem wan famli memba, fren jos lida o bisop blong yu we yu trastem.
Askem wan we i holem prishud mo i klin inaf from wan blesing blong kamfot mo gaed i wan narafala naes wei blong luk yuwan mo laef tru long lukluk blong God.
Stap Lukluk Klia
Olsem wan bigfala hil we i stanap stret long wei blong yu, samtaem ol hadtaem blong yu i save filim se i bigwan olsem Be taem yu laef folem plan blong God mo letem Hem mo ol narawan i helpem yu, yu save luk ol jalenj blong yu long defren wei.
Yu save tekem wan step i go bak mo lukluk se i gat wan wei blong winim ol hadtaem blong y. Jisas Kraes i givim wan rod we yu save folem. Nomata se ol hadtaem blong yu i bigwan olsem wanem, God i moa strong.