!Yumi Tokbaot Mane!
Blong yumi spesifik, bae yumi ridim abaot taem we Jisas i tij abaot mane.
Ol pikja droing oli kam long Alyssa Petersen
Jisas i no tokbaot tumas mane insaed long ol skripja.
Be,?“gudgudfala samting long heven” (Matiu 6:20), ol parabol blong ol talen (Matiu 25:14–30), o “yufala i mas tekem olgeta taet blong yufala i kam long haos* blong mi” (Malakae 3:10) yufala i harem hemia bifo? !Yumi luklukbak!
Ol Nid fesem Ol Wantem
Jisas i save se i gat fulap samting we yu nidim (eksampol, kakai) mo wanem we yu wantem (eksampol, gem [pleplei]). Jisas i tijim, “Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting” (Matiu 6:19–21). Fulap samting we mane i pem i save lus nomo, yu mas tingbaot mo tingting gud wanem nao yu stap pem.
Yu save tingting gud olsem wanem blong yusum mane taem yu seraotem ol nid blong yu aot long ol samting we yu wantem. Tingting long yuwan, “?Mi pem hemia from se mi nidim o from se mi wantem ?” Sapos yu no sua, traem blong wet wan manis; afta we taem ia i pas, askem ol kwestin ia bakegen. Taem yu mekem hemia, yu save stap longwe long fasin blong no pem ol samting olbaot, mo stap traem blong mekem ol narawan oli laekem yu. Mo, bae yu mekem ol smat desisen abaot wetaem blong sevem mane mo wetaem blong spendem mane.
Yusum Mane blong Blesem Ol Narawan
Long parabol blong ol talen, Jisas i tokbaot wan masta we i givim defdefren amaon blong mane (we oli singaotem “ol talen”) long tri wokman. Tu wokman i dabolem mane we oli bin givim long tufala, mo wan wokman i go berem mane blong hem. Taem we masta i kambak, hem i glad wetem tufala wokman we i mekem ol talen blong tufala i kam antap mo i no glad wetem wan wokman we i no bin mekem hemia (luk long Matiu 25:14–30).
Semmak olsem masta long parabol we i givim ol talen long ol wokman blong hem, taem God i blesem yu wetem mane, Hem i wantem blong yu yusum mane blong yu ia blong blesem yuwan mo ol narawan. Taem yu tekem kea long ol narawan, yu stap mekem i hapen komanmen blong Jisas blong “yufala i mas lavem ol man we oli stap raonabaot long yufala, yufala i mas mekem i gud long olgeta olsem we yufala i stap mekem i gud long yufala” (Mak 12:31).
Hem i Oraet blong pem ol naes samting, be yu mas tingbaot ol nid blong yuwan mo ol narawan bifo yu pem wan samting. Taem yu tingbaot ol nid blong ol narawan, God bae i helpem yu blong save yusum mane blong blesem ol pipol long laef blong yu.
Ol Blesing blong Taeting
Sapos yu stap wari se bae yu nogat inaf mane from se yu pem taeting, ridim ol toktok blong kamfot ia we i kam long God: Yufala i mas tekem olgeta taet blong yufala i kam long haos blong mi … bambae yufala i luk paoa blong mi, we bambae mi openem skae, mi letem olgeta gudgudfala samting i kam long yufala we i plante we i plante” (Malakae 3:10). !Sapos yu pem taeting blong yufala, God bae i blesem yu moa bitim we yu tingting long hem!
Maet bae yu no kasem blesing long wei blong laef ia—bae yu no save gat mane we yu wantem blong pem wan sas set we yu laekem, be yu mas tekem taem blong kasem wanem we yu wantem. Be Lod bae i blesem yu. Taem bae i pas, bae yu faenem i isi blong pem taeting, mo spirit blong yu bae i kam moa strong bakegen blong winim ol wari we yu gat long saed blong mane.
God Bae I Helpem Yu
Biliv long toktok blong Presiden Russell M. Nelson: “Sevya i no save stop blong givim help long yu.” (Oktoba 2024 jeneral konfrens [Liahona, Novemba 2024, 122]). Taem yu tingting gud blong yusum mane blong yu blong mitim ol nid blong yu, kea long ol narawan, mo pem taeting blong yu, bae yu faenem wan lav we i moa dip long God mo ol narawan mo wan fasin blong talem tangkyu long wanem we yu gat.