Fakataha ʻo e Pongipongi Sāpaté
Ngaahi Meʻaʻofa Maʻongoʻonga ʻo ʻItānití: Ko e Fakalelei, Toetuʻu, Toe Fakafoki ki he Tuʻunga Totonú ʻe Sīsū Kalaisí
Ngaahi Konga Fakamatalá
ʻI he ngaahi taʻu kuohilí, naʻe ako maʻuloto ai heʻemau kalasi pongipongi ʻi he ongoongoleleí ha ngaahi veesi mei he Tohi Tapú. Naʻe fakanatula pē ʻeku saiʻia ke ako ʻa e ngaahi veesi ʻoku nounoú. Naʻe kau heni ʻa e Sione 11:35—ʻa e veesi nounou taha ʻi he folofolá, ko e foʻi lea pē ʻe fā—“Pea tangi ʻa Sīsū.”
[Te u pehē] ʻi he taimi ní, ʻoku fakamoʻoniʻi ʻe he tutulu ʻa Sīsū ʻi he mamahí mo e fiefiá ʻa e moʻoni fakaofo: naʻe hāʻele mai ʻa e ʻAlo fakalangi ʻo e ʻOtuá ki he moʻui fakamatelié pea ako ʻo fakatatau ki he kakanó ʻa e founga ke Ne ʻiate kitautolu maʻu ai pē mo tāpuakiʻi kitautolú.
ʻI heʻetau tangi ʻi he mamahí pe fiefiá, ʻoku ʻafioʻi lelei ia ʻe Sīsū Kalaisi. ʻE lava ke Ne ʻi ai ʻi he ngaahi momeniti ʻoku tau fiemaʻu lahi taha ai ʻa e ngaahi meʻaʻofa maʻongoʻonga ʻo ʻitānití: ʻa e Fakalelei ʻa Sīsū Kalaisí, Toetuʻú, toe fakafoki ki he tuʻunga totonú. …
ʻOku hanga ʻe he Toetuʻu ʻia Sīsū Kalaisí ʻo ʻai ke tau ongoʻi ʻa e hōifua mai ʻa e ʻOtuá. ʻOku talamai ʻe he māmani ko ʻení, ʻoku tau fuʻu lōloa, fuʻu nounou, fuʻu sino, fuʻu tutue—ʻikai poto, talavou pe fakalaumālie feʻunga. ʻOku fakafou ʻi he liliu fakalaumālie ʻia Sīsū Kalaisí, ʻa ʻetau lava ʻo hao mei he loto-mamahi ʻo e ʻikai haohaoá. …
ʻOku fakaʻatā ʻe he palani ʻa e ʻOtuá ki he tauʻatāina ke fili ki he totonú mo e tauʻatāina fakamatelié ke tau ako mei heʻetau aʻusia pē ʻatautolu. … Naʻe hāʻele hifo ʻa Sīsū Kalaisi ki he maʻulalo tahá peá Ne hāʻele hake ʻo māʻolunga ange ʻi he ngaahi meʻa kotoa pē, ʻi he ʻofa. ʻOkú Ne fiefia ʻi hotau tuʻunga malava fakalangi ke mohu founga mo fiefiá, angaʻofa ʻo ʻikai ʻamanaki ki ha totongí, tui ke fakatomala mo fakamolemolé. Pea ʻokú Ne tutulu ʻi he mamahi ko e hulutuʻa ʻetau faingataʻaʻia, angakovi mo e taʻe-totonu ʻa e faʻahinga ʻo e tangatá—ʻoku faʻa hoko koeʻuhí ko e fili pē ʻa e tangatá—kae pehē foki ki he langí mo e ʻOtua ʻo e langí. …
Ko e Toetuʻu ʻeni ʻia Sīsū Kalaisí: ʻokú Ne tali ʻa e ngaahi fakaʻamu hotau lotó mo e ngaahi fehuʻi hotau laumālié. ʻOkú Ne holoholoʻi hotau loʻimatá, tukukehe hotau loʻimata ʻo e fiefiá.