Fakataha ʻo e Hoʻatā Tokonakí
“ʻI He Meʻá ni ‘E ‘Ilo Ai ‘e he Kakai Kotoa Pē Ko ‘Eku Kau Ākonga ‘A Kimoutolu.”
Ngaahi Konga Fakamatalá
“Ke mou feʻofaʻaki,” ko e folofola ia ʻa Sīsuú. “ʻI he meʻá ni ‘e ‘ilo ai ‘e he kakai kotoa pē ko ‘eku kau ākonga ‘a kimoutolu.” ʻOku faʻa fuofua maʻu e fakamoʻoni ʻa ha taha kia Sīsū Kalaisi ʻi he taimi ʻokú ne ongoʻi ai ʻoku ʻofaʻi ia ʻi heʻene ʻi he kau ākonga ʻa Sīsū Kalaisí. …
Ka ʻi ai ha taha ʻoku fekumi ki ha tui lahi ange ʻia Kalaisi, pe ko ha fehokotaki vāofi ange ki he Tamai Hēvaní, ʻoku totonu ke ne ongoʻi lata ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. …
Ko ia ai, lolotonga ʻetau faifeinga ki he ngaahi tuʻunga ʻulungaanga māʻolunga ʻo e ʻEikí, tau toe fekātakiʻaki foki. …
… Pea ke loto tahá kuo pau ke tau fekumi ki ha ngaahi loto ʻoku maʻa pea ʻe fiemaʻu ki ai ha fuʻu liliu lahi ʻo e lotó.
Ka ʻoku ʻikai ʻuhinga ia ke liliu hoku lotó ke tatau mo haʻaú. Pe ʻuhinga ia ke liliu ho lotó ke tatau mo haʻakú. Ka ʻoku ʻuhinga ia ke liliu kotoa hotau lotó ke tatau mo e Fakamoʻuí. …
Pea kapau ʻe faifai ange peá ke ongoʻi ʻoku ʻikai ke talitali lelei koe, kātaki ʻo ʻiloʻi ʻoku ʻikai ko koe pē. …
… ʻOku tau taha, ʻo ʻikai koeʻuhí ko e feituʻu naʻa tau ʻi aí ka ko e feituʻu ʻoku tau fāifeinga ke ʻalu ki aí, ʻo ʻikai koeʻuhí ko e tuʻunga ʻoku tau ʻi aí ka ko e tuʻunga ʻoku tau feinga ke aʻusiá.
Ko e tefitoʻi taumuʻa ia ʻo e Siasi moʻoni ʻo Kalaisí. …
Fēfē kapau ʻokú ke kehe koe mei he kakai ʻoku mou feohí? ʻOku ʻikai ʻuhinga ia ʻokú ke kehe—ʻokú ne ʻai koe ko ha konga ʻoku fiemaʻu ki he sino ʻo Kalaisí. …
ʻOku ʻikai ʻuhinga ia ko ho fatongiá ke liliu ʻa e taha kotoa ke hangē pē ko koé. Ka ʻoku ʻuhinga ia ʻoku ʻi ai hoʻo meʻa mahuʻinga ke tānaki atu—pea ʻoku ʻi ai hoʻo meʻa mahuʻinga ke ako!