ʻOku ʻIkai Fakamafasia Hoʻo Fakatomalá kia Sīsū Kalaisi; ʻOku Fakalahi Ai ʻEne Fiefiá

ʻI he ʻaho ní, ʻoku ou fie lea ki he niʻihi ʻiate kitautolu ʻoku faʻa ongoʻi, “ʻOku hangē ʻoku ʻaonga ʻa e fakatomalá mo e fakamolemolé ki he tokotaha kotoa tukukehe pē au.” …

Kuó u ako kapau te te tatali kae ʻoua kuó te maʻa feʻunga pe haohaoa feʻunga kae toki ʻalu ki he Fakamoʻuí, tā ʻoku ʻikai mahino kiate kita ʻa e tefitoʻi taumuʻá! …

ʻOku ou fakamoʻoni neongo ʻoku tokanga mai ʻa e ʻOtuá ki heʻetau ngaahi fehalaākí, ka ʻokú Ne tokanga lahi ange ki he meʻa ʻe hoko hili ʻetau fai ha fehalaākí. Te tau toe tafoki nai kiate Ia ʻi he taimi kotoa pē? …

Ko e fakaafe ke fakatomalá ko hano fakahaaʻi ia ʻo e ʻofa ʻa e ʻOtuá.

Ko e tali ʻio ki he fakaafe ko iá ko hano fakahaaʻi ia ʻetau ʻofá. …

ʻOku ʻikai ke tau nofo ʻi he hala ʻo e fuakavá ʻaki ʻa e ʻikai ke tau teitei fai ha fehalaākí. ʻOku tau nofo ʻi he hala ʻo e fuakavá ʻaki ʻa e fakatomala he ʻaho kotoa peé.

Pea ko e taimi ʻoku tau fakatomala aí, ʻoku fakamolemoleʻi ʻe he ʻOtuá ʻo ʻikai ke Ne fakamaaʻi kitautolu, fakafehoanaki kitautolu ki ha taha kehe, pe tafuluʻi kitautolu koeʻuhí he ko e meʻa tatau pē ʻeni ne tau fakatomala mei ai he uike kuo ʻosí.

ʻOkú Ne vēkeveke ʻi he taimi kotoa pē ʻokú Ne ʻafio mai ai ʻoku tau tūʻulutui ʻo lotú. ʻOkú Ne fiefia ke fakamolemoleʻi kitautolu koeʻuhí he ʻokú Ne fiefia ʻiate kitautolu!

ʻIkai nai ʻokú ke ongoʻi ʻoku moʻoni ia?

Ko e hā leva ʻoku fuʻu faingataʻa ai ke tau tui ki aí?! ʻOku fakaʻaongaʻi ʻe Sētane, ko e tokotaha fakakovi mo kākā lahí, ʻa e fakamāʻiá ke taʻofi kitautolu mei he ʻOtuá. …

… Ko hoʻo mahuʻingá ʻoku “mahuʻinga lahi … ʻi he ʻao ʻo e ʻOtuá” maʻu ai pē, ʻo tatau ai pē pe ko e hā ʻa e nunuʻa ʻo e ngaahi fili kuó ke faí. …

ʻOku ou tuʻu atu heni ʻo fakamoʻoni ʻoku foaki ʻe Sīsū Kalaisi ʻa e māmá ki he niʻihi ʻoku nofo ʻi he fakapoʻulí. … Tafoki ki he Māmá—ʻa hotau ʻAmanakiʻanga ʻoku Mālohi Haohaoá.