Fakataha ʻo e Pongipongi Tokonakí
ʻI Hotau ʻAó
Ngaahi Konga Fakamatalá
ʻOku tau houngaʻia ke tau ʻi he māmaní ʻi he taimi ʻoku tupulaki ai ʻa e tokolahi mo e ivi tākiekina ʻo e Siasí, kae mahulu hake aí ʻa ʻene tupulaki ʻi he loto mo e moʻui ʻo hono kau mēmipá. …
ʻI he ʻahó ni, ʻoku ʻi ai ha ngaahi temipale ʻa e Siasí ʻe 367 kuo palaniʻi, langa, pe lolotonga ngāue. … ʻE kāinga, ʻoku tau fakavaveʻi ʻetau māʻoniʻoní ʻi heʻetau moʻui taau mo e temipalé, moihū ʻi he fale ʻo e ʻEikí, pea fai ha ngaahi fuakava mo e ʻOtuá maʻatautolu pe ko ʻetau fakafofonga maʻa ʻetau ngaahi kui ʻi he tafaʻaki ʻe taha ʻo e veilí. …
ʻOku tau mātā hono fakavaveʻi ʻe he ʻEikí ʻEne ngāué ʻi he ngaahi misioná. … ʻOku ʻikai ko e fiká pē, ka ʻoku fakataumuʻa ʻa e tānakí ki hono ʻomi ha ngaahi laumālie kia Sīsū Kalaisi mo ʻEne ongoongoleleí. …
ʻOku tau mamata ki hono fakavaveʻi ʻe he ʻEikí ʻa e ngaahi faingamālie fakaako maʻa hotau kāingalotú [ʻo] aʻu ki he kakai ʻoku ʻikai kau ki hotau Siasí ʻi he funga ʻo e māmaní. …
Ko e lolotonga ní ʻoku lesisita ha kau ako ʻe toko 800,000 tupu fakaemāmani lahi ʻi he seminelí mo e ʻinisititiutí, ko e lesisita lahi taha ia kuo hoko ʻi he hisitōlia ʻo e Siasí. …
Ko e tafaʻaki ʻe taha ʻoku hā mai ai e fakalakalaka ʻa e akó ʻi he Siasí, ko e BYU-Pathway Fakaemāmani Lahí. … ʻI hono fakakakato ʻa e ngaahi kalasí, te ke lava ai ʻo maʻu ha ngāue, pea ʻi hoʻo maʻu ha ngāué, te ke maʻu ai ha moʻui ʻoku lelei angé maʻá e ngaahi fāmilí pea mo ha ngaahi faingamālie lahi ange ke ngāue maʻá e ʻEikí. …
ʻOku ou ʻiloʻi ʻi he lotolotonga ʻo e ngaahi lelei ʻo e ongoongoleleí, ʻoku ʻi ai ha niʻihi ʻoku faingataʻaʻia, fefaʻuhi mo ha ngaahi pole ʻi he tuí, loto-veiveiuá, mo ha ngaahi fehuʻi ngalingali ʻoku ʻikai hano talí. ʻE kāinga, ko Sīsū Kalaisi ʻa e talí. Kamata ʻiate Ia. Fekumi ki Hono toʻukupú ʻi hoʻo moʻuí. Fakafanongo kiate Ia. …
ʻIloʻi ʻoku mahino kiate Ia.