Fakataha ʻo e Pongipongi Tokonakí
“ʻUnuʻunu Mai kiate Au”
Ngaahi Konga Fakamatalá
ʻOku ʻi ai pē taimi ʻoku tau ongoʻi ofi ai ki he Fakamoʻui ko Sīsū Kalaisí. Ka ʻi he taimi ʻe niʻihi lolotonga hotau ngaahi ʻahiʻahi fakamatelié, te tau ongoʻi mamaʻo ai meiate Ia mo fakaʻamu ki ha fakapapau ʻokú Ne ʻafioʻi hotau lotó mo ʻofa ʻiate kitautolu fakafoʻituitui. …
ʻOku ʻofa ʻa Sīsū Kalaisi ʻiate kitautolu kotoa. ʻOkú Ne foaki mai ʻa e faingamālie ke ʻunuʻunu ofi ange ai kiate Ia. Hangē pē ko ha kaungāmeʻa ʻofá, te ke fakahoko ia ʻi he meimei founga tatau, ʻaki ʻa e fetuʻutaki fakafou ʻi he lotu ki he Tamai Hēvaní ʻi he huafa ʻo Sīsū Kalaisí, fakafanongo ki he fakahinohino mahuʻinga mei he Laumālie Māʻoniʻoní, pea tokoniʻi fiefia leva ʻa e niʻihi kehé maʻá e Fakamoʻuí. …
Hangē pē ko ʻEne kau ākonga ʻofeiná, ko e fānau kotoa pē ʻa e Tamai Hēvaní kuo fili ke hū ʻi he matapā ʻo e papitaisó, ʻoku nau fuakava ke hoko ko ha fakamoʻoni ki he Fakamoʻuí pea tauhi ʻa kinautolu ʻoku faingataʻaʻiá ʻi he kotoa ʻo ʻetau moʻui fakamatelié. …
ʻI hoʻomou tuitala ki he ngaahi palōmesi ko ʻení, te mou ʻilo ai ʻoku tauhi ʻe he ʻEikí ʻa ʻEne palōmesi ke taha mo kimoutolu ʻi hoʻomou ngāué, ʻo fakamaʻamaʻa hoʻomou kavengá. Te mou ʻilo ʻa e Fakamoʻuí, pea ʻe aʻu ki ha taimi te mou hoko ai ʻo hangē ko Iá pea “hoko ʻo haohaoa ʻiate ia.” ʻI hoʻomou tokoniʻi ʻa e niʻihi kehé maʻá e Fakamoʻuí, te mou fakatokangaʻi ʻoku mou ʻunu ai ʻo ofi ange kiate Ia. …
ʻI hoʻomou haʻihaʻi ʻa e ngaahi kafo ʻo kinautolu ʻoku faingataʻaʻiá, ʻe pouaki kimoutolu ʻe he mālohi ʻo e ʻEikí. ʻE mafao atu Hono ongo toʻukupú fakataha mo ho ongo nimá ke fakafiemālieʻi mo tāpuakiʻi ʻa e fānau ʻa ʻetau Tamai Hēvaní.
ʻE maʻu ʻe he tamaioʻeiki fuakava kotoa ʻa Sīsū Kalaisí ʻEne fakahinohinó mei he Laumālié ʻi heʻenau tāpuakiʻi mo faitokonia ʻa e niʻihi kehé Maʻaná. Pea te nau ongoʻi e ʻofa ʻa e Fakamoʻuí mo fiefia ʻi heʻenau ʻunu ʻo ofi ange kiate Iá.