Maʻu ʻEne Meʻaʻofá

ʻOku ou fie talanoa fekauʻaki mo ha meʻaʻofa fakalūkufua ʻo e moʻoni taʻengatá ʻokú ne langomaki ʻetau malava ke maʻu ʻa e meʻa kotoa ʻoku finangalo ʻetau Tamaí ke fakakoloa ʻaki kitautolú—ko e meʻaʻofa mahuʻinga ʻo e ʻiló, ʻi hono tali kakato mo maʻu ʻi he loto-moʻoní, ʻokú ne fakamahinoʻi ʻa e fiefia mo e faingataʻa ʻo e moʻuí, pea mo ʻetau ngaahi fehuʻi ʻoku teʻeki talí: ʻA ia ko e fānau moʻoni kitautolu ʻa e ʻOtuá. ʻOku fakaofo ʻa e foʻi moʻoni ko iá! Fungani! Pea ʻoku ʻikai heliaki ia.

… Pea ko e hala ʻokú ke ʻi aí ko ʻEne palani ia ʻo e fiefiá. … Pea hono ʻikai lahi ʻEne fakaʻānaua ke ke foki ʻi ha ʻaho kiate Ia, ke ke aʻusia ʻa e taumuʻa taupotu taha ʻo ʻEne ngaahi meʻaʻofa fakaʻofoʻofá, ʻa e moʻui taʻengata mo Iá. …

… Te ke lava ʻo haʻu kia Kalaisi mo falala ki Heʻene ʻaloʻofa angaleleí mo tali kotoa ʻEne ngaahi meʻaʻofa ʻo e fiefia, nonga, ʻamanaki lelei, maama, moʻoni, fakahā, ʻilo, mo e potó—ʻi he loto-falala, ʻo mafao atu ho ongo nimá, pea folahi ʻo mateuteu ke maʻu. Te ke lava ke maʻu ʻa e ngaahi meʻaʻofá ni he ʻokú ke malu mo tuʻu maʻu ʻi he ʻilo ko e ʻofefine ʻofeina koe ʻo e ʻOtuá, ko ha foha mahuʻinga koe ʻo e ʻOtuá, pea kuó Ne meʻaʻofa atu Hono ʻAlo haohaoa mo māʻoniʻoní ke huhuʻi, fakatonuhiaʻi, mo fakamāʻoniʻoniʻi koe.

… Toe maʻu maʻau ʻa e meʻaʻofá ni, pe mahalo ko hoʻo ʻuluaki tali moʻoní ia, pea tuku ke ne liliu ʻa e tapa kotoa ʻo hoʻo moʻuí. Ko e founga lelei ange ʻeni kuo teuteu ʻe he ʻOtuá maʻau ʻo fakafou ʻi he meʻaʻofa ʻo Hono ʻAló. ʻOkú ke moʻuí ke ke maʻu ʻa e fiefiá!