Ko Hono Fakamahuʻingaʻi ʻo e Moʻuí

ʻI he taimi ʻe niʻihi, ʻe lava ke haʻu fakataha ha fuʻu faingataʻa mo ha puputuʻu lahi ʻi hono maluʻi ʻo e moʻuí.

ʻOku ʻi ai ha ongo foʻi fakakaukau ʻoku fekauʻaki mo e mahuʻinga ʻo e fanauʻi fakamāmaní: ko e moʻuí mo hono fai ha filí. Ko e moʻuí ko ha konga mātuʻaki mahuʻinga ia ʻo e palani haohaoa ʻa ʻetau Tamaí, pea ʻi Heʻene tuʻutuʻuní ʻoku tau fakamahuʻingaʻi mo fakatolonga ʻa e moʻuí; pea ʻoku tau fili ki he hokohoko atu ʻa e moʻuí hili hono foaki maí. ʻOku tau toe fakamahuʻingaʻi foki ʻa e meʻafoaki ʻo e tauʻatāina fakaeʻulungaanga ke filí—ʻo tokoni ke fakamālohia ʻa e ngaahi fili māʻoniʻoni kuo fakangofua ʻe he ʻOtuá ʻa ia ʻoku nau ʻomi ha fiefia ʻoku taʻengatá. …

Ko hono tauhi mo maluʻi ha moʻui ʻoku teʻeki fanauʻi maí ʻoku ʻikai ko ha tuʻutuʻuni fakapolitikale ia. Ka ko ha fono fakaeʻulungaanga ia naʻe fakapapauʻi mai ʻe he ʻEikí ʻo fakafou mai ʻi Heʻene kau palōfitá.

… Fakatauange ke lahi ange ʻetau lea ʻi he tuí mo e manavaʻofá ki heʻetau toʻu tupú ʻi hotau ngaahi fāmilí, pea ʻiate kitautolu ʻi he ngaahi fakataha ʻa e Fineʻofá mo e kōlomu ʻo e kaumātuʻá ʻo kau ki he fono ʻa e ʻEikí ki he angamaʻá, ko e mahuʻinga ʻo e moʻuí, mo hono tokangaʻi ʻo e niʻihi ʻoku teʻeki fanauʻi maí mo ʻenau ngaahi faʻeé. …

Ki ha taha pē ʻoku fanongo mai kuó ne foua ha mamahi lahi mo fakaʻiseʻisa ʻi hano fakahoko pe kau ki ha fakatōtama, kātaki ʻo manatuʻi: Neongo he ʻikai ke tau lava ʻo liliu ʻa e meʻa naʻe hoko ʻi he kuohilí, ka ʻoku lava ʻe he ʻOtuá ʻo fakamolemoleʻi ʻa e meʻa naʻe hoko ʻi he kuohilí. ʻE lava ke hoko mai ʻa e fakamolemolé ʻi he mana ʻo ʻEne fakalelei ʻaloʻofá, ʻi hoʻo tafoki kiate Ia ʻi ha loto-fakatōkilalo mo fakatomalá.

Siʻoku kāinga ʻofeina, ʻoku ʻi ai ha fuʻu hohaʻa lahi ki he holo ko ia ʻa e ʻofá ki he fānau ʻoku teʻeki ke fanauʻi maí. ʻOku mahuʻingaʻia ʻa e ʻOtuá ʻi he moʻuí. Ko ʻEne ngāué mo Hono nāunaú ke ʻomi ʻa e moʻui taʻe-faʻa-maté mo e moʻui taʻengatá ki Heʻene fānaú. ʻI heʻetau hoko ko e ākonga ʻa Sīsū Kalaisí, ʻoku tau fakamahuʻingaʻi ʻa e moʻuí.