Fakataha ʻo e Hoʻatā Tokonakí
Mafai Fakalangí, Kau Talavou Fakaofó
Ngaahi Konga Fakamatalá
ʻI ha pongipongi Sāpate ʻe taha ʻi Sānuali ʻo e taʻu ní, ʻi heʻeku tangutu ʻi heʻemau houalotu sākalamēnití, naʻe hikinimaʻi ha kau talavou ʻe toko hongofulu tupu ke nau hiki ki he Lakanga Taulaʻeiki Faka-ʻĒloné. Naʻá ku ongoʻi ʻa e ngaahi feliuliuaki ʻa e māmaní.
Naʻe fakafokifā haʻaku fakatokangaʻi ʻi he kotoa ʻo e māmaní, ʻi ha ngaahi taimi kehekehe mo ha ngaahi houalotu sākalamēniti pehē, ʻoku fokotuʻu ai ha laumano ʻo e kau tīkoní, akonakí, mo e taulaʻeikí … ke fakanofo kinautolu ki he ngaahi ngāue lakanga fakataulaʻeikí ʻa ia te ne fuesia ʻa e lahi mo e mafatukituki ʻo hono tānaki fakataha ʻo ʻIsilelí. …
ʻOku kamataʻi ʻe he ngaahi fakanofo ko ʻeni ʻo e kau talavou ní ʻenau ngāue tokoni ʻi he kotoa ʻenau moʻuí, he te nau aʻusia ha ngaahi taimi mo ha ngaahi feituʻu ʻe mātuʻaki mahuʻinga ʻaupito ai ʻenau ʻi aí mo ʻenau ngaahi lotú pea mo e mālohi ʻo e lakanga fakataulaʻeiki ʻo e ʻOtuá ʻoku nau maʻú. …
ʻOku falala ʻa e ʻEikí ʻi he ʻahó ni kiate kinautolu ʻoku maʻu ʻa e lakanga fakataulaʻeiki ʻo ʻĒloné ke nau fakahoko ʻa e meimei meʻa tatau pē naʻa nau fakahoko ʻi he kuonga muʻá: ke akoʻi mo fakahoko ʻa e ngaahi ouaú—ʻo fai kotoa ia ke fakamanatu kiate kitautolu ʻEne Fakaleleí.
ʻI he taimi ʻoku tokoni ai ʻa e kau tīkoní, akonakí, mo e taulaʻeikí ʻi he sākalamēnití, ʻoku nau maʻu hono ngaahi tāpuakí ʻi he founga tatau mo e taha kehe kotoa pē: ʻaki hono tauhi ʻa e fuakava ʻoku nau fakahokó ʻi heʻenau toʻo fakafoʻituitui ʻa e maá mo e vaí. Ka ʻi hono fakahoko ʻo e ngaahi fatongia toputapú ni, ʻoku nau ako lahi ange foki ai ki honau ngaahi fatongia mo e ngafa lakanga fakataulaʻeikí. …
ʻOku fiemaʻu ha teuteu fakamātoato ki he ngaahi fiemaʻu fakamātoato ko iá. …
ʻOku ou houngaʻia maʻu pē ko e kau maʻu lakanga Taulaʻeiki Faka-ʻĒloné, mo hono ngaahi mālohí, ouaú, mo e fatongiá, ʻoku nau tāpuekina kitautolu hono kotoa ʻo fakafou ʻi he ngaahi kī ʻo e “tauhi mai ʻa e kau ʻāngeló, pea mo e ongoongolelei ʻo e fakatomalá, pea mo e papitaiso ʻi he fakauku ke fakamolemole ʻa e ngaahi angahalá” (Tokāteline mo e Ngaahi Fuakava 13:1).