ʻOku founga fēfē ʻetau moʻui ʻi he māmaní mo “liʻaki ʻa e ngaahi meʻa ʻo e māmaní”?

Ko e Kau Ākonga ʻA ia Kuó Ne Filí, tā fakatātaaʻi ʻe Casey Childs

Kuo folofola ʻa e ʻEikí, “Ke ke liʻaki ʻa e ngaahi meʻa ʻo e māmaní, pea fekumi ki he ngaahi meʻa ʻo ha maama lelei ange” (Tokāteline mo e Ngaahi Fuakava 25:10). ʻOku ʻikai ʻuhinga ʻeni ia ke tau tukunoaʻi ʻetau ngaahi fiemaʻu fakatuʻasinó mo fakaemāmaní, ka ʻoku ʻuhinga ia ʻoku ʻikai ke tau tuku hotau lotó ki he koloá, mālohí, tuʻungá, pe fakafiemālie ʻa e māmaní. Ko ha ngaahi tefitoʻi moʻoni ʻeni kuo akoʻi mai kiate kitautolu fekauʻaki mo e moʻui ʻi he māmaní:

Fakamuʻomuʻa e ngaahi meʻa ʻa e ʻOtuá. “Mou fuofua kumi ʻa e puleʻanga ʻo e ʻOtuá, mo ʻene māʻoniʻoní” (Mātiu 6:33). ʻOku tau fakamuʻomuʻa ʻa e ngaahi fekau ʻa e ʻOtuá mo ʻetau ngaahi fuakava mo Iá ʻi hotau lotó mo ʻetau moʻuí.

Fekumi ki he ʻiló. “ʻI hoʻo ako fekauʻaki mo e māmani ʻokú ne ʻākilotoa koé, ako foki fekauʻaki mo e Fakamoʻuí. … Ko e lahi ange hoʻo akó, ko e lahi ange ia hoʻo lava ʻo tokoni ke langa e puleʻanga ʻo e ʻOtuá mo tākiekina e māmaní ki he leleí” (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí [2022], 31, 32).

Ngāue. “Ko e ngāué ko ha tefitoʻi moʻoni mahuʻinga ʻo e ongoongoleleí. ʻOkú ne ohi ʻa e fakalakalaká mo fakatupulaki kitautolu. … ʻOku ʻikai finangalo pē ʻa e ʻEikí ke tau tokonaki maʻa hotau ngaahi fāmilí ka ke ʻfemoʻuekina … ʻi ha ngāue lelei’ [Tokāteline mo e Ngaahi Fuakava 58:27]” (“Employment,” Topics and Questions, Gospel Library).