“Te u kei maʻu fēfē ʻa e ʻamanaki leleí mo teuteu ki hoku fāmili ʻi he kahaʻú ʻi he fakatupu loto-foʻi ʻa e māmaní?”

“Kuo fekauʻi kitautolu ʻe he ʻEikí ke tau fakatokolahi mo fakakakai ʻa e māmaní mo talaʻofa ke maluʻi kitautolu fakafou ʻi he ngaahi fuakava kuo tau fakahoko mo Iá. ʻOku haohaoa ʻa e palani ʻa e ʻOtuá. ʻOku ou ʻiloʻi ʻi he taimi te u maʻu ai ha fānaú—kapau ʻoku ou talangofua ki he meʻa kuó Ne fekau mai kiate aú—ʻokú Ne haʻisia ke tāpuekina mo maluʻi au mo hoku fāmilí ʻo fakatatau ki Hono potó.”

Saione O., 16, Hauaiʻi, USA

“ʻOku ou maʻu ha ʻamanaki lelei ʻi he taimi ʻoku ou fakaʻaongaʻi ai e tui ki he ʻOtuá mo ʻEne palani maʻakú. ʻI he taimi ʻoku fakalotosiʻi ai ʻa e māmaní, te u lava ʻo tafoki kiate Ia ke maʻu ha nonga. ʻOku tokoni hoku tāpuaki fakapēteliaké ke u ʻiloʻi ʻoku ʻafioʻi lelei ange au ʻe heʻeku Tamai Hēvaní ʻi ha toe taha pea ʻokú Ne ʻofa ʻiate au. ʻOkú ne ʻomi kiate au ha loto-falala ʻe lelei ʻa e meʻa kotoa pē.”

Lōkani A., 16, Tekisisi, USA

“ʻOku tokoni ia ke u ʻiloʻi ʻoku ʻofa ʻa e ʻOtuá ʻiate au, ʻi ai Haʻane palani maʻaku, pea ʻe tokoni mai ʻi he ngaahi taimi faingataʻá. ʻOku tokoni foki ia ke u ʻiloʻi ʻoku haʻi au ʻe heʻeku ngaahi fuakavá kia Kalaisi mo fakaʻatā ke u maʻu Hono mālohí mo e iví.”

Liti L., 18, ʻIutā, USA

“Maʻu ʻa e fiefiá ʻia Kalaisi, folofolá, mo e lotú. Kapau te tau lava ʻo ako ko e fakakaukau pē ʻoku mahuʻingá ko e fakakaukau ʻa e Fakamoʻuí, ʻe faingofua ange ai ʻa e moʻuí. ʻE lava ke fakamālohiʻi kitautolu ke tau fai ha ngaahi fili ʻoku ʻikai lelei ʻi hono fai e ngaahi filí ʻo makatuʻunga ʻi he fakakaukau ʻa e kakai ʻoku tau feohí.”

Kasi P., 16, ʻIutā, USA

“ʻOku totonu ke tau falala ki he ʻOtuá mo tanumaki ha fakakaukau ʻoku leleí. Te tau lava ʻo maʻu ha ueʻi fakalaumālie mei he niʻihi kehe kuo nau ikunaʻi ʻa e ngaahi faingataʻa tatau. ʻOku fakatoka foki ʻe he tauhi ʻo e ngaahi fekaú, tautautefito ki he fono ʻo e angamaʻá mo e moʻui maʻá, ha fakavaʻe mālohi ki hono langa ha moʻui fakafāmili ʻoku fakafiemālié neongo e fakalotosiʻi mei tuʻá.”

Tivina O., 19, Lākosi, Naisīlia