Tokoni ki he Ngaahi ʻAho Faingataʻá

ʻOku ʻikai hoko maʻu pē ʻa e moʻuí ʻi he founga ʻoku tau ʻamanaki ki aí. ʻOku tau saiʻia kotoa ʻi he ngaahi ʻaho ʻoku fonu ʻi he fakafiefiá mo e fiefiá, ka ʻoku ʻi ai ha ngaahi ʻaho ʻe niʻihi ʻoku fonu ʻi he loto-mamahí. ʻI he makasini ko ʻení, te ke maʻu ai ha tokoni ki he ngaahi ʻaho ko iá (vakai, peesi 8, 14, mo e 22).

ʻOku ʻi he taha ʻo e ngaahi potufolofola ʻoku ou saiʻia taha aí ha faleʻi mo ha palōmesi ki he ngaahi ʻaho faingataʻá. ʻOku pehē ai, “Ke ke faʻa kātaki ʻi he ngaahi faingataʻá, he ʻe lahi ho ngaahi faingataʻaʻiá; ka ke ke kātakiʻi ia, he vakai, ʻoku ou ʻiate koe, ʻio ʻo aʻu ki he ngataʻanga ʻo ho ngaahi ʻahó” (Tokāteline mo e Ngaahi Fuakava 24:8). Ko e faleʻí ke kātakiʻi.

Ko e tefitoʻi ʻuhinga ʻo e kātakiʻí ke taʻeueʻia hotau lotó. ʻE lava ke faingataʻa hono fakahokó, ʻa ia ko e ʻuhinga ia ʻoku ou saiʻia ai ʻi he talaʻofa “ʻOku ou ʻiate koe.” ʻOku ʻuhinga ʻa e talaʻofa ko iá ʻoku ʻikai fiemaʻu ia ke tau foua toko taha ʻa e ngaahi ʻaho faingataʻá. ʻE tokoniʻi kitautolu ʻe he ʻEikí ke taʻeueʻia hotau lotó.

Neongo pe ko e hā e meʻa ʻoku hoko ʻi heʻetau moʻuí, ko e founga lelei taha ke fetuʻutaki ai mo e Tamaí ko e lotú. ʻOkú Ne ʻi ai moʻoni. Te Ne fanongo mai mo tali ʻetau ngaahi lotú. ʻOku fanongo mai ʻa e ʻOtuá mo folofola ki Heʻene fānaú ʻi he ngaahi ʻaho ʻoku leleí mo ʻikai leleí (vakai, peesi 2). Kuó Ne talaʻofa mai te Ne ʻiate kitautolu.