Te ke Maʻu Mei Fē ʻa e Mālohi ʻi Hoʻo Ongoʻi ʻoku Fakafisingaʻi Koé?

ʻI he ngaahi taʻu siʻi kuohilí, ne u kau atu ki ha ʻekitivitī mo ha toʻu tupu kehe mo ha kau faifekau tokolahi. Ko ʻemau taumuʻá ke fakaafeʻi e kakaí ke nau omi ki ha houalotu sākalamēniti makehe.

Naʻá ku fiefia ke u aʻusia e meʻa ʻoku foua ʻe heʻetau kau faifekaú. Naʻa mau lava ʻo tufa ʻemau ngaahi fakaafé ki ha niʻihi tokosiʻi ne mau fetaulaki. ʻI he hokosia e taimi ke tufa ai e kaati fakaʻosí, naʻe ueʻi au ʻe he Laumālié ke u ʻalu ki ha tokotaha pau. Ka naʻe ʻikai ke ne tali lelei ʻemau fakaafé peá ne talamai ke mau ʻalu.

Naʻá ku loto-mamahi ʻi heʻeku sio ki hono fakasītuʻaʻi ʻe he tokotahá ni ʻa e ʻofa ʻa hotau Fakamoʻuí. ʻOku ou ʻilo ʻoku fakafisingaʻi ʻe he kakai tokolahi ʻa e fakaafe ʻa Kalaisi ke haʻu kiate Iá. Ka ʻoku ou ʻiloʻi foki ʻi heʻetau fakahoko pē ʻa e fakaafe ko ʻení, ʻoku tau fakahū ai ha fakakaukau ki he loto ʻo e kakaí. Naʻe fakamālohia ʻe he aʻusiá ni ʻeku fakamoʻoní neongo naʻe ʻikai tali ʻeku fakaafé. ʻOku ou ʻiloʻi ʻoku malava ha faʻahinga meʻa pē ʻia Kalaisi, pea kuó u hokohoko atu ke teuteu ke ngāue fakafaifekau mo ʻomi e niʻihi kehé kiate Ia mo ʻetau Tamai Hēvaní.