Naʻe Tokoniʻi Au ʻe he Fakamoʻuí ke u Liliu

Tā fakatātaaʻi ʻe Katelyn Budge

ʻOku ou maʻu e faʻahinga fōtunga, kapau he ʻikai ke u malimali, ʻoku hangē ia ʻoku ou ʻitá. ʻE ʻeke mai ʻe he kakaí, “Ko e hā ʻokú ke fakafulofula aí? Ko e hā ho palopalemá?” Pea te u pehē ange, “ʻOku ʻikai ke u fakafulofula.” Ka naʻe fakatupu ʻita moʻoni ʻenau fehuʻí.

Naʻe hohaʻa mai ʻeku tamaí kiate au. Naʻá ne ui au ki hono lokí ʻo talamai, “ʻOkú ke ʻilo, he ʻikai te ke kei ʻiteʻita pehē ai pē. Ko e hā e meʻa ʻokú ke ʻita aí?” Naʻá ku pehē leva ʻoku ou fie liliu.

Naʻá ku lotu mo tangi ki he Tamai Hēvaní ke tokoniʻi au. ʻI he fakalau ʻa e taimí, naʻe kamata ke kehe e ongo ne u maʻú. ʻOku siʻisiʻi ange ʻeku ʻitá, ʻoku ou malimali ange, pea ʻoku ou ʻofa ange ki he niʻihi kehé. Naʻe pehē ʻe he taha kotoa, “ʻOkú ke liliu.” ʻOku ou ʻiloʻi ʻi hoku lotó ʻoku ʻikai tuʻunga ia ʻi hoku iví. ʻOku tuʻunga ia ʻi he mālohi fakaivia ʻo e Fakalelei ʻa Sīsū Kalaisí.

ʻOku faingataʻa ke hoko ko e tokotaha ʻokú ke fie aʻusiá. He ʻikai te u pehē kuó u ʻosi aʻusia ia, ka ʻoku ou kei fāifeinga ki ai. ʻOku totonu ke tau fononga fakataha mo Sīsū Kalaisi. ʻOku totonu ke tau fakaafeʻi Ia ke feʻao mo kitautolu.