Ko Hono Ikunaʻi ʻo e Ngaahi Fakafeʻātungia ki he Lotú
Te tau fakaʻataʻatā fēfē e ngaahi meʻa ʻokú ne fakafeʻātungiaʻi ʻetau lotú?
Ngaahi tā fakatātā ʻa Andrew Bosley mo Derek L. Smith
“Lotu maʻu pē.” ʻOku tuʻo 10 hono ʻomi ʻe he Fakamoʻuí ʻa e fakahinohino ko ʻení ʻi he Tokāteline mo e Ngaahi Fuakavá. ʻOku mahino kiate kitautolu ko ha heliaki ia—he ʻikai lava ke tau tūʻulutui ʻo lotu ʻi he momeniti kotoa pē—ka ko e taimi ʻe niʻihi ʻoku faingataʻa ia ke lotu tuʻo ua he ʻaho! Te tau ikuʻi fēfē ʻa e ngaahi fakafeʻātungiá?
Ko e fakafeʻātungiá: Ngalo
ʻOku tau kei tangata pē. ʻOku hoko ia.
Ko ha founga ʻe ala fakaleleiʻi ai:
Fakafekauʻaki hoʻo ngaahi lotú mo ha meʻa kehe ʻokú ke fai ʻi he ʻaho kotoa pē, ke ke fakakaukau pē ki he tahá, ʻokú ke fakakaukau ai ki he meʻa ʻe tahá. Kapau te ke fakatokangaʻi ʻoku teʻeki ke ke fuʻu ʻā lelei ke fai ha lotu ʻoku ʻuhingamālié ʻi hoʻo ʻā haké pe kimuʻa peá ke mohé, fakafehokotaki hoʻo ngaahi lotú ki ha meʻa angamaheni ʻe taha ʻi he ʻahó mo e poʻulí ʻa ia ʻokú ke tokanga ange ki ai, hangē ko hono fufulu ho nifó pe folo foʻiʻakaú. Pe fokotuʻu ha taimi ʻi hoʻo telefoní ke fakamanatu atu!
Ko e fakafeʻātungiá: ʻIkai ha meʻa ke lipooti
Ko e hā ha toe meʻa ke fakamatala ki ai ʻi he pongipongí he ko ho meʻa pē naʻe fai talu ho lotu fakamuimuí ko e mohe?
Ko ha founga ʻe ala fakaleleiʻi ai:
ʻI he pongipongí, fakafetaʻi ki he ʻOtuá koeʻuhí ko ho ngaahi tāpuakí, kau ai ʻa e niʻihi fakafoʻituitui ʻoku nau tāpuekina hoʻo moʻuí. Lotua e kakai ko iá. Fakahā ki he ʻOtuá ʻa e meʻa kuó ke palani ki ai he ʻaho ní mo kolea ʻEne fakahinohinó. Lipooti mai ʻi he poʻulí. Tala kiate Ia ʻa e meʻa kotoa pē naʻe hoko ʻi he lolotonga e ʻahó ʻokú ke houngaʻia aí, naʻá ke ako mei aí, pe naʻá ke mahuʻingaʻia aí.
Ko e fakafeʻātungiá: Ngaahi ongo ʻoku ʻikai leleí
Mahalo ʻokú ke ongoʻi taʻetaau koeʻuhí ko ha meʻa naʻá ke fai—pe fakakaukau ke fai. Mahalo ʻokú ke ʻita ki he ʻOtuá ʻi ha meʻa. Mahalo pē ʻoku ʻikai ke ke ongoʻi pehē.
Ko e foungá: Lotu pē
Neongo pe ko e hā e ngaahi ongo ʻokú ke maʻú, ʻe lava ke toʻo ia ʻe he ʻOtuá. ʻOku ʻikai ha taha ʻe teitei “taʻetaau” ke lotu, pea ko e tēvoló ia ʻokú ne fiemaʻu ke ke fakakaukau peheé (vakai, 2 Nīfai 32:8). ʻE laka ange ke fanongo hoʻo Tamaí ki hoʻo lotu taʻekakato ʻikai haohaoá—ʻa e faʻahinga lotu ʻoku ʻikai te ke lave ai ki he Meʻa Lahi ʻoku ʻikai ke ke ongoʻi ke talanoa ki aí—ʻi he ʻikai ke Ne teitei fanongo meiate koé.