Te Tetere ni Bwakantaain te Tabati
Ribanaa te Wakaa, ao E na Rikirake te Mwaanga
Te Rongorongo ae Kaeweaki
Teuana te bwai ae te kabanea ni kakawaki ae ti kona n reiakinna n te maiu aei bon te kaokoro i marenan tera ae akea tokina ao tera ae aki. …
… Tabeua koaua bon boton, a kakawaki, ao aan ara koaua. Ake tabeua bon reitana ke mwaangana—a kakawaki, ma ti ngkana a reitaki nakon are te boto. …
N taekana teuana, Iesu Kristo ao Ana anga karea ni kamaiu bon boton ara kakoaua. Ni kabane bwaai ake tabeua bon mwaanga. …
Ngkana ti ribanaa ara koaua iroun Iesu Kristo, I iangoia bwa e kona n tabetai ti kairuaa te mwaanga ma te wakaa. …
Ti na titirakiniira: E boboto au kakoaua i aon te bwai ae I kantaningaia bwa e na riki inanon maiu? E nene i aon aia mwakuri ke anuaia tabeman? Ke e matoa ni kateaki iaon Iesu Kristo, “kaneneaki ma ni kateaki i nanona,” [I-Korote 2:7], n aki tabe ma baika a bitaki i nanon maium? …
Ti na aki kantaningaia bwa ti na mataata ni bwaai ni kabane imwain ae ti karaoa te mwakuri. Aio bon tiaki te onimaki. … Ngkana ti waeremwe ni karaoa te mwakuri bwa ti bae n tataningaa kaekan ara titiraki, e na bon uarereke ara tai ibukin karaoan ae raoiroi, ao n tiana te mwaaka n ara onimaki. …
E teimatoa te onimaki man te kataaki ao ni baika aki ataaki rikiia n te maiu aei ibukina bwa e nene ni matoa iaon Kristo ao Ana reirei. Iesu Kristo, ao Tama ae i Karawa are E Kanakoa, bon Ngaia ae aki bibitaki, te oi ae onimakinaki raoi n ara onimaki irouia. …
Bon au tataro ao au kakabwaia bwa ti na teimatoa ni kamwarakea wakaan ara onimaki iroun te Tia Kamaiu, n Ana reirei, ao inanon Ana Ekaretia.