Te Kimwareirei ni Kaboakin Maiura

Te rairannano e karekea nakoira namakinan ana tangira te Atua ao n ataia ao n Tangiria n aanga ae ti aki kona n ataia. …

I ataia bwa e korakora aron ana kamaiu ara Uea ao ara Tia Kamaiu, Iesu Kristo. …

Ko kona n namakinna n tabetai bwa e aki kona ni karaoaki te kamaiu, bwa tao ko katinanikuaki n ana tangira te Atua ao mwaakan ana kamaiu te Tia Kamaiu n te bwai ae ko rootaki iai ke ibukin ake ko a tia ni karaoi. Ma I kakoaua bwa ko aki katinanikuaki iroun te Toka. …

Ngkai ti maiuakina ara berita aika a tabu, e kona n anganiira te buoka ao te korakora te Uea ake ti riai ni kinai ao n tokanikai man mamaarara, ni ikotaki ma tamnein te mannaoraki ni kamoamoa. …

… Kainnanora ibukin te kamaiuaki ao te buoka bon tiaki te rawawata Nakoina, ma bon oin bukina ngkai E roko. …

E nooriko Tamara are i Karawa ao te Tia Kamaiu. A ataa nanom. A tabe nanoia n are ko tabe nanom iai, ni ikotaki ma ake ko tangiriia. …

Tai bwarannano ngkana ko korakai n te aro are ko iangoia bwa ko riai n tokanikai i aona ngkai. Taotaona nanom, kawakin am berita aika a tabu, rairannano n taainako, ukora te buoka mairouia am mataniwii ngkana e kainnanoaki, ao nakon ana auti te Uea n angiin te tai ngkana ko konaa. Kakauongo ao ongora wirikiriki are E kanakoa nakoim. E na bon aki kitana Ana reitaki n Ana berita ae tabu ma ngkoe. …

Te bong nako bon te bong ae boou ae kaonaki n te kaantaninga ao te nakoraoi ibukin Iesu Kristo.