Te Tetere ni Moaningabongin te Tabati
Ukoukoran Taian Kaeka nakon Titiraki n te Maiu n Tamnei
Te Rongorongo ae Kaeweaki
Te titiraki ao ukoukoran nanoia bon te bwai ae tataneiai te aba iai bwa kanoan maiura n te maiu ae mamate aei. … E rangi n nanoanga ana baire te Atua nakoia botanaomata ake a karako aia atatai, e katauraoira ma ara Tia Kamaiu, Iesu Kristo, n riki bwa ara Tia Kawakin Tiibu, ao ni kaungai nanora bwa ti na kabongana inaomatara n Rineia. …
Aron te Atua te Tama ao Natina n anga rabakauia nakoira e moanibwai kaoan mwaakan te Tamnei ae Raoiroi n riki bwa ara tia reirei ngkai ti kabotoa ara iango iroun Iesu Kristo n maiura ao n ara kakaonimaki n ukerii Aia kaeka ao kabwarabwaraan nanoia. …
… E tua nakoira te Uea bwa rinanon ara ongeaba ao n nanomwaaka ti kona ni karekea te rabakau ao te atatai. Ana moti ao ana tua te Atua aki baireaki bwa a na riki bwa te kangaanga inanon maiura ma bon te kawai ae mwaakaroiroi ni karekei oin ara kaotioti ao te reirei n te maiu n tamnei. …
… Ti kakabwaiaaki ngkai e riki Iesu Kristo bwa te Tia Kamarurung ae Mwaatai. Ara ongeaba nakon ana moti ao Ana tua te Atua e na kauka kawain te Tia Kamaiu n anga te atatai ma te kamaiiuaki ae E ataia bwa ti kainnanoia, ni kaineti ma are E a tia ni baireia bwa e na karaoia ibukira.
Raao aika kam tangiraki, I kakoaua bwa ara titiraki ma nanora ni koaua ibukin te euangkerio a kona ni katauraoi tibwanga mairoun Tamara are i Karawa ao Iesu Kristo ni buokiira bwa ti aonga n rikirake. … I kakoaua bwa katukan ara onimaki iroun Tamara are i Karawa ao irouia Ana burabeti are E a tia ni kanakomaiia bwa a na buokiko ni bon taraiko ni maiun tamneim ao ni waaki nako ni karababaa am atatai n ataakin te Atua.