Sauniga o le Taeao o le Aso Toonai
“O La’u Talalelei Lenei”—“O La’u Ekalesia Lenei”
O Nai Vaega
E pei lava o le fanai’a a leai se naitolaiserini o le a le matua’i lelei, e faatoa faapitoa foi le Ekalesia a le Faaola pe afai e fausia i luga o Lana talalelei. A aunoa ma le talalelei a le Faaola ma le pule e faatautaia ai na sauniga, e le tulaga ese le Ekalesia.
A aunoa ma le aafiaga faamautu a le kiseluku, e utiuti le aogā o le naitolaiserini o se mea faapā. E pei ona faaalia i le talafaasolopito, a aunoa ma le Ekalesia a le Alii, e faapena foi ona lē mautu le malamalama o tagata i Lana talalelei—e ono pagatia i le tafetafea solo faaleaoaoga faavae ma aafia ai i tosinaga o tapuaiga, aganuu, ma filosifia eseese. …
O Le Ekalesia a Iesu Keriso o le Au Paia o Aso e Gata Ai, ua mafai ai ona maua le mana o le Atua ona ua faatagaina mai e Ia e aoao atu ai le aoaoga faavae a Keriso ma ofo atu ai sauniga laveai ma le faaeaga o le talalelei. E finagalo le Faaola e faamagalo a tatou agasala, fesoasoani ia tatou maua Lona mana, ma suia i tatou. Na puapuagatia o Ia mo a tatou agasala ma matuai naunau e faamagalo i tatou mai le faasalaga semanu ua tatau ai mo i tatou. E finagalo o Ia ia tatou paia ma faaatoatoaina ia te Ia. …
Ou te valaaulia oe ia tuuto atu oe lava ma le atoatoa i le Faaola, Lana talalelei, ma Lana Ekalesia. A e faia, o le a e iloa ai o le tuufaatasiga o le talalelei a le Faaola ma Lana Ekalesia e aumaia ai le mana i lou olaga. O lenei mana e sili mamao atu nai lo le fanai’a. Na te nutililiiina papa i lou ala ma suia oe e avea o se suli i le malo o le Atua. Ma o le a “faatumuina oe i lena olioli lea ua le magagana ma ua tumu i le mamalu.” [Helamana 5:44].