O Le Manumalo o le Faamoemoe

O le meaalofa o le faamoemoe o se faaeega anagata mai le Atua….

A o tatou faamalosia lo tatou faatuatua ia Iesu Keriso, tatou te vaai i tua atu o o tatou tauiviga i faamanuiaga ma folafolaga o le faavavau. E pei o se sulu o lona malamalama e tuputupu pea, o le faamoemoe e suluia ai le lalolagi pogisa, ma tatou vaaia ai lo tatou lumanai matagofie. …

O’u uso e ma tuafafine, o le faamoemoe o se meaalofa e ola, o se meaalofa e tupu a o faateleina lo tatou faatuatua ia Iesu Keriso. … Tatou te fausia lenei mea—o poloka o faamaoniaga o lo tatou faatuatua—e ala i le tatalo, feagaiga o le malumalu, tausia o poloaiga, faaauau ona taumamafa i tusitusiga paia ma upu a perofeta o aso nei, aai ma feinu i le faamanatuga, auauna atu i isi, ma le tapuai i vaiaso taitasi faatasi ma o tatou usoga Au Paia.

Ina ia faamalolosia lo tatou faamoemoe i se taimi ua faateteleina ai le amioleaga, ua faatonuina ai e le Alii Ana perofeta e faasoo le lalolagi i Ona malumalu. …

E leai se tiga, leai se ma’i, leai se le tonu, leai se mafatiaga, leai se mea e mafai ona faapouliuligia ai lo tatou faamoemoe a o tatou talitonu ma uumau i a tatou feagaiga ma le Atua i le maota o le Alii. O se maota o le malamalama, o se maota o le faamoemoe. …

Uso e ma tuafafine, atonu e le vave oo mai le filemu o e sailia e pei ona e manao i ai, ae ou te folafola atu a o e faalagolago i le Alii, o le a oo mai Lona filemu.

Tau ina ia tatou fafagaina lo tatou faatuatua faapelepele, fetaomi atu i luma ma se susulu atoatoa o le faamoemoe. Ou te molimau atu o lo tatou faamoemoe o lo tatou Faaola, o Iesu Keriso. E ala atu ia te Ia, o le a taunuu ai a tatou miti amiotonu. O Ia o le Atua o le faamoemoe—o le manumalo o le faamoemoe. O loo soifua o Ia ma e alofa o Ia ia teoutou.