O Le A Toe Afio Mai le Alii o Iesu Keriso

O loo faanatinati moni e le Alii Lana galuega.

Aisea ua tatou fauina ai malumalu i se saoasaoa e le’i tupu muamua lava? Aisea? Ona ua poloaiina ai i tatou e le Alii ia faia lena mea. O faamanuiaga o le malumalu ua fesoasoani e faapotopoto Isaraelu i itu uma e lua o le veli. O nei faamanuiaga ua fesoasoani foi e saunia se nuu o ē o le a fesoasoani i le sauniaina o le lalolagi mo le Afio Mai Faalua o le Alii! …

O la’u folafolaga lenei ia te outou: O tagata uma e saili faamaoni atu ia Iesu Keriso o le a mauaina o Ia i totonu o le malumalu. …

Ua ou iloa o le fesili aupito sili ona taua lea e tatau ia i tatou uma ona taliina o lenei: O ai pe o le a foi le mea o le a ou foai atu i ai lo’u ola?

O la’u faai’uga e mulimuli ia Iesu Keriso o le faai’uga aupito silisili lea ona taua ua ou faia. … Na fesoasoani foi ia te a’u ia lavātia ona talitali afā o le olaga. …

Ou te uunaia outou ia tuuto atu se taimi i vaiaso taitasi—mo lou olaga atoa o totoe—e faateleina ai lou malamalama e uiga i le Togiola a Iesu Keriso. …

Sa ave e Iesu i Ona lava luga au agasala, ou tiga, ou lototiga, ma ou vaivaiga. E te lē tau tauaveina na mea na o oe! …

E le o vave tele pe tuai tele foi mo oe le avea ma se soo tuuto o Iesu Keriso. …

O le mea silisili o le a oo mai, o’u uso e ma tuafafine pele, ona o le a toe afio mai le Faaola! O le mea silisili o le a oo mai, ona o loo faanatinatiina e le Alii Lana galuega. O le mea silisili o le a oo mai, pe a tatou liliu atu o tatou loto ma o tatou olaga ia Iesu Keriso.