Te Temeionō te muara’a o te ’ūputa

’Ua fa’aoti a’era ’o Gracie i tē ’ā’amura’a i tāna faraoa farai pāni hope’a, ’ua tu’u i tāna mau ’āu’a i roto i te vāhi horoira’a, ’e ’ua rave mai ra i tāna pūtē tua.

« Taime nō te pure ’utuāfare, » ’ua parau ’o pāpā.

’Ua tūturi rātou pa’ato’a i roto i te piha fa’afa’aeara’a. ’Ua rave tōna taea’e maeha’a, ’o George, i te pure. « ’A tauturu mai ’ia maita’i mātou i teie mahana i te fare ha’api’ira’a, » tāna īa i parau. « ’E ’a ha’amaita’i ia māmā, ia maita’i ’oia. ’A ha’amaita’i i te mau taote ’ia ’ite i te tauturu iāna. »

E pu’aāvae roro tō te māmā ’o Gracie. E tītauhia ē ’ia tāpūhia ’oia. ’Ua ti’aturi te mau taote ē e maita’i te mau mea ato’a, ’aita rā rātou i pāpū maita’i ra.

I muri mai i te pure, ’ua tauahi ’o māmā ’ia mātou pā’āto’a. « E haere fa’ahou ā vau i te taote i teie mahana. E nehenehe tātou e fa’ari’i i te mau pāhonora’a hau atu. »

E mai te mea e pohe o māmā e’ita īa vau e nehenehe fa’ahou e paraparau iāna ? ’Ua uiui noa ’o Gracie. ’Ua mata’u roa ’oia ! ’Aita i nehenehe iāna ’ia feruri e’ita ’oia e tauahi i tōna māmā ’aore rā e’ita e hi’o iāna i muri mai i te ha’api’ira’a.

’I taua mahana ra, ’ua haere ’o Gracie i te ha’api’ira’a, i te fa’aeara’a, ’e i te tāmā’ara’a mai tei mātarohia. ’Ua tāmau noa rā ’oia i te mana’o i tōna māmā. ’I tōna mata’ura’a, ’ua mana’o ’oia i tāna hīmene Paraimere au roa a’e. E nehenehe te mau ’utuāfare e ’āmuihia e a muri noa atu nā roto i te fa’anahora’a a te Metua i te ao ra, ’ua hīmene ’oia i roto i tōna ferurira’a.

’I tō rāua ho’ira’a i te fare mai te fare ha’api’ira’a, ’ua horo ’o Gracie ’e ’o George i roto ’e ’ua tauahi atu ra ia māmā. « Mai te aha ra te huru o tō ’oe tere ? ’Ua ani ’o Gracie.

« Mea maita’i roa, » te parau īa a māmā. « ’Aita ā tātou i ’ite rahi roa. E mau fārereira’a fa’ahou ā tā’u i te hepetoma i muri nei hou te tāpūra’a. »

’Ua ’oa’oa roa ’o Gracie i te ’itera’a i tōna māmā. Terā rā tē ha’ape’ape’a noa ra ’oia.

Tau mahana i muri mai, ’ua ta’i mai te oē o te ’ūputa. Te ’īritira’a ’o māmā i te ’ōpani, ’ua fa’aro’o ’o Gracie i te hīmene.

’Ua ti’a ’oia i pīha’i iho ia māmā i te ’ūputa ’e ’ua hi’o atu i te naho’a rahi o te mau hoa o te ’utuāfare nō te fare purera’a ’e nō te fare ha’api’ira’a. Tē hīmene ra rātou i te mau hīmene Paraimere. « ’Ua mana’o mātou ia ’oe ’e ’ua hina’aro mātou e hōpoi mai i te tahi tāmāhanahanara’a, » te parau īa a te hō’ē o rātou. ’I muri mai ’ua hīmene fa’ahou rātou.

’Ua haere ato’a mai ’o George i te ’ōpani ra. ’Ua fāriu atu ’oia ia Gracie. « ’A hīmene ana’e e o rātou ato’a ! »

’Ua rave mai ’o Gracie ’e ’o George i tō rāua pereue ’e ’ua horo i rāpae nō te ’āmui atu ia vetahi ’ē ra. ’Ua hīmene pūai rātou mai tā rātou e nehenehe i te hīmene :

’Ua ’ite atu ’o Gracie ia māmā i te tāmarōra’a i te roimata. ’Ua tāpe’a tōna teina tuahine, ’o Rosie, i te ’āvae o māmā ’e ’ua fa’aro’o ato’a.

’Ua māhorahora te tahi mana’o hau i ni’a ia Gracie. Tē ha’ape’ape’a noa nei ā ’oia nō tōna māmā. ’Ua ’ite rā ’oia ē ’ua here ’o Ietu Metia ia rātou. E Atua ’oia nō te mau temeio. E nō reira, ’ua ’ite ’o Gracie ē e maita’i te mau mea ato’a.

Fa’ahōho’ara’a nā Betany Stancliffe