Hō’ē feti’a ’āpī

Tē ti’ahia ra tō Alexandre i te va’ura’a te matahiti i roto noa mā’a mahana ri’i ! E ’oa’oa iti rahi tōna i te mea ’ua fa’anaho rāua tōna pāpā i te hō’ē ’amu’amura’a ta’a ’ē, nō tōna mahana fānaura’a i muri a’e i te ha’api’ira’a. Nō reira ’a tae mai ai te misiōnare nō te tāmā’ara’a i te pō, ’ua fa’a’ite atu Alexandre ia rāua i te mau faraoa monamona tōtōra ’o tāna i mā’iti.

« Tē vai ra e va’u ’e te hō’ē mōri hinu i ni’a i te faraoa monamona tāta’itahi, ’eiaha rā hō’ē faraoa monamona ’e e va’u mōri hinu ! »

’Ua ’ata Elder Lauener. « E au ra e mea nave roa ! ’A tāpe’a mai te tahi nā’u ! »

I muri a’e te tāmā’ara’a, ’ua ha’api’i nā misiōnare i te hō’ē ha’api’ira’a nō ni’a i te bāpetizora’a. ’Ua hi’o atu Elder Doyon ia Alexandre. « ’Ia bāpetizo-ana’e-hia ’oe, e parau fafau ’oe i te pe’e ia Iesu Mesia ».« »’Ua fa’ati’a ’oia ia Alexandre i tōna iho bāpetizora’a ’e ’ua fa’a’ite mai i tōna ’itera’a pāpū. « ’Ua fa’a’oa’oa rahi mau te Vārua Maita’i iā’u, nō te mea i taua mahana ra, ’ua mā’iti au i te pe’e ia Iesu Mesia ».

E hia’ai iti rahi tō Alexandre ’ia bāpetizohia ’oia !

’A haere ai rā ’oia e ta’oto i taua pō ra, ’aita ’oia i vare’ahia i te ta’oto. ’Ua au roa ’oia i te mana’o ’ia riro ’ei mea mā ’e te ’āpī. Nāhea rā ’oia ’ia vai mā noa i muri a’e i te bāpetizora’a ?

I te po’ipo’i a’e, ’ua haere Alexandre i te fare ha’api’ira’a ’e ’o pāpā. « ’Aita ’oe i te mea paraparau roa i teie po’ipo’i », ’ua parau pāpā. « E aha te fifi ? »

Autā a’era Alexandre, « tē hina’aro nei au ’ia bāpetizohia vau hau a’e i te hō’ē noa taime ».

« Nō te aha ho’i ? » ’Ua ui pāpā.

« Nāhea vau ’ia vai mā noa i muri a’e i tō’u bāpetizora’a ? », ’ua ui atu Alexandre. « E mo’ehia iā’u te mau mea ato’a i te mau taime ato’a—mai te paraura’a ’ia ora na ’e māuruuru i te feiā pa’ari ’e ’ia fa’a’oroma’i i te huru ’o tō’u teina. ’Ua ’ite au e rave fa’ahou vau i te mau hape. ’E e hō’ē noa bāpetizora’a te ravehia, nō reira e’ita roa vau e riro ’ei mea mā fa’ahou ».

Fa’aea ihora pāpā ’e ’ua hi’o tūtonu atu ia Alexandre : « ’Auē ïa ē ! » E’ita e ’ore e mea teimaha te reira. Tē ha’amana’o ra ’oe i te taime ’a ’āparau ai tātou nō ni’a i te ravera’a i te mau parau fafau i te bāpetizora’a ? »

’Ua tā’iri’iri Alexandre i tōna upo’o. « ’Ē tē ha’amana’o nei au ».

« ’Ia bāpetizo-ana’e-hia ’oe, e rave ’oe i te hō’ē fafaura’a ’e te Metua i te ao ra. E parau fafau ’oe e ha’apa’o i tāna mau fa’auera’a ’e e pe’e ia Iesu Mesia. I muri iho i te reira, i te mau taime ato’a ’a rave ai ’oe i te ’ōro’a mo’a, e ha’amana’o ’oe ia Iesu ’e nāhea ’oia ’ia tauturu ia ’oe ’ia tātarahapa ».

’Ara’ara a’era Alexandre i te mata. « ’Ia nehenehe iā’u ’ia putapū e mea mā vau mai te taime ’a bāpetizohia ai au ? »

« Te reira mau », ’ua parau pāpā. « ’Ua ’ite te Metua i te ao ra e ’ere ’oe i te mea parauti’a, ’e i te tahi taime e rave ’oe i te mau mā’itira’a hape. ’Ia hara ana’e rā ’oe, e nehenehe ’oe e tātarahapa ’e e tāmata i te pe’e ia Iesu. I tō ’oe mana’o, e nehenehe ānei ’oe e rave i te reira ? »

Mā te mata ’ata’ata, pāhono a’era Alexandre : « ’Ē ! Tē mana’o nei au e nehenehe au e nā reira ».

I te taera’a mai te mahana fānaura’a o Alexandre, ’ua fa’atupu tōna ’utuāfare i te hō’ē ’amu’amura’a i muri a’e i te ha’api’ira’a. « E mea monamona mau ! ’E i tōna bāpetizora’a, ’ua putapū Alexandre i te mana’o maita’i hope i te haerera’a mai ’oia i rāpae i te pape. ’Ua parau fafau ’oia e pe’e ia Iesu Mesia, ’e e mea fa’ahiahia mau te reira !

I taua hepetoma ra, ’ua tāmata Alexandre mai tāna e nehenehe i te ha’apa’o i tāna mau fafaura’a ’āpī ’e ’ia hāmani maita’i i tōna teina. I te sābati rā i muri mai, ’ua māuruuru ’ore ri’i ’oia. E au ra iāna ē, e nehenehe ’oia e rave i te mau mā’itira’a maita’i a’e i taua hepetoma ra.

’A ’ōperehia ai te ’ōro’a mo’a, ’ua tūfene Alexandre i tōna rima ’e ’ua pi’o i tōna upo’o. ’Ua ani marū noa ’oia i te Metua i te ao ra ’ia tauturu mai iāna ’ia rave maita’i a’e i te hepetoma i muri mai. ’Ua feruri ’oia i tō Iesu here rahi iāna ’e tōna hia’ai rahi ’ia riro mai ia Iesu te huru.

’A rave ai ’oia i te hō’ē pēha’a faraoa i roto i te fāri’i pāne, ’ua putapū Alexandre i te māhanahana ’e te hau. ’Ua putapū ’oia mai te mahana o tōna bāpetizora’a ! Tauahi a’era pāpā ia Alexandre ma te mata ’ata’ata.

Teie mahana ’o te ’ōmuara’a ïa o te hō’ē hepetoma ’āpī, ’e e rave Alexandre mai tāna e nehenehe—ma te tauturu a te Metua i te ao ra.

Fa’ahōho’ara’a nā Toby Newsome