Te fifio te hoa

’Ua tu’e ’o Matt i te hō’ē ’ōfa’i ’a ho’i ai ’oia i te fare. ’Aita ’oia e māramarama ra. Nō te aha ’oia i ’oto ai ?

’Ua aurara noa ’oia ’e tōna hoa ’o Iotepha. Terā rā, mai te huru ē ’ua ha’umani mau ’o Iotepha, ’e ’ua fa’aoti ’o Matt e ho’i ’oi’oi i te fare nā mua a’e i tei mana’ohia.

Penei a’e tē feruri nei au i te reira, ’mana’o a’era ’o Matt. Penei a’e e ’aita ’o Iotepha i ’ana’anatae i te reira mahana.

I te mahana i muri iho i tō Matt haerera’a i te ha’api’ira’a, ’ua ’ite atu ’oia ia Iotepha i te paraparaura’a i te tahi pupu o te mau hoa. ’Ua pi’i ’e ’ua tārape ’o Matt iāna. ’Ua hi’o ’o Iotepha ia Matt, ’aita rā ’oia i tārape atu. ’Ua fāriu fa’ahou ’oia i tōna mau hoa ra.

’Aita iho ā ’o Iotepha i ’ite iā’u, ’Ua parau noa ’o Matt iāna iho.

I roto i te piha ha’api’ira’a i te taime nō te pupu ’ohipara’a, ’ua haere atu ’o Matt i pīha’i iho ia Iotepha. « Hina’aro ānei ’oe i te tahi hoa ? ’Ua ani ’o Matt.

Mai te huru ra ē, ’aita ’o Iotepha i fa’aro’o iāna. « Haere mai, e Mike, » te parau ïa a Iotepha i te tamāroa e pārahi ra i pīha’i iho iāna. « ’A haere ana’e e rave i te ’ohipa i’ō atu. »

’Ua haere ’ē atu nā tamāroa e piti. ’Ua huru’ē roa ’o Matt. ’Ua pāpū maita’i ē tē ha’ape’ape’a ra te tahi mea ia Iotepha. E aha pa’i ?

’Aita ’o Matt i feruri i te tahi mea tāna i rave i tupu ai te riri ’o Iotepha iāna. Mea pāpū maita’i, i te tahi taime e ’ere hō’ē ā pupu ’ia ha’uti rātou i te ’āpa’ira’a pōpō i te taime fa’afa’aeara’a. E fa’atura noa rā rātou te tahi i te tahi i muri mai. Nō te aha i tupu ai te mana’o ē tē mā’iti ra ’o Iotepha i te pārahi i roto i te pupu pāto’i i roto i te mau mea ato’a ?

E nehenehe ato’a ho’i tā’u e paraparau ia Iotepha i te taime fa’afa’aeara’a, ’ua mana’o ’o Matt.

I te fa’afaeara’a, ’ua horo ’o Matt nō te ’āmui atu i te tahi atu mau tamari’i i ni’a i te tahua.

« Hey, Iotepha ! » ’ua pi’i ’o Matt. « E nehenehe ānei tā’u e paraparau ia ’oe nō te tahi minuti ? »

« Te ha’amata ra te ha’utira’a, » te parau īa a Iotepha.

« Nā reira, e haere au e ha’uti i rāpae i te tahua nā muri ia ’oe ’e e nehenehe ïa tāua e tāu’aparau, ».’ua parau ’o Matt.

« ’Ua tāere roa ’oe. ’Aita e pārahira’a i tō’u pae, » tē nā reira ra ’o Iotepha ’a horo ai ’oia nō te ’āmui atu i tāna pupu.

’Ua māta’ita’i noa ’o Matt ’a ha’amata ai rātou ato’a i te ha’uti. ’Ia rahi roa ana’e te ta’ata ’aita te reira i ha’ape’ape’a ia Iotepha i te mātāmua ra. ’Ua fa’ari’i-poupou-noa-hia te feiā e haere mai nei.

Pāpū maita’i rā ē ’aita ’o Matt i mana’o e ’ua fa’ari’i-poupou-hia ’oia e Iotepha. Nō te aha ’o Iotepha i nā reira ai ? Nō te aha ’aita ’oia i fa’aō mai iāna ? ’Aita ’o Matt i rave i te ’ohipa hape !

« ’O Iotepha teie e rave nei i te ’ohipa hape, » ’ua parau ’o Matt i tōna nā metua i te tāmā’ara’a i te pō. « ’Aita roa ’oia e hina’aro e paraparau mai iā’u ’e e parau mai pa’i iā’u i te mea tāna e riri ra ! »

« E mea fifi roa, » ’ua parau ’o māmā.

’Ua tahe te roimata ve’ave’a i roto i te mata ’o Matt. « Mai te huru ra ē e ’ere fa’ahou vau i tōna hoa, ’e aita vau i ’ite ē no te aha. »

« Tē ha’apeu nei au ia ’oe nō te tāmatara’a i te paraparaura’a iāna nō te reira ’ohipa, » te parau īa a pāpā. « Penei a’e e nehenehe ’oe e tāmata i te parau iāna i tō ’oe mana’o ’e tē hina’aro nei ’oe e tauturu. »

’Ua hā’uti’uti ’o Matt i tōna mau tāpono. Nā roto i te huru ’o Iotepha, ’aita ’o Matt i pāpū e fa’aro’o ānei ’o Iotepha iāna.

’Ua rave a’era ’o māmā i te rima ’o Matt. « E pure ato’a mātou nō ’oe, ’e nō Iotepha. »

’I taua pō ra, ’a fa’aineine ai ’o Matt nō te ta’oto, ’ua feruri ’oia i te mea tā māmā ’e tā pāpā i parau. ’Ua pure a’ena ’oia nō tōna mau hoa ’a ’oto ’aore rā ’a fa’aruru ai rātou i te hō’ē taime fifi. E mea ta’a ’ē rā te reira, e ’ere ānei ? ’O Iotepha nā mua roa tei au ’ore iāna.

Nō reira nō te aha īa nā metua ’o Matt i pure ai nō Iotepha ? E pure ato’a ānei ’oia nō Iotepha ?

’Ua tūturi ’o Matt i pīha’i iho i tōna ro’i. « E te Metua i te Ao ra, e mea fifi ’eiaha e riri ia Iotepha, » te pure īa a Matt. « E nehenehe tā’u e parau i tōna riri, ’aita ra ’oia i parau mai iā’u i tōna fifi. »

’Ua fa’ataime ’o Matt. « Tē hina’aro nei au e paraparau iāna, terā rā ’aita vau i pāpū e fa’a’ite mai ānei ’oia iā’u eaha te fifi. ’A tauturu iāna i te mau mea ato’a e ha’ape’ape’a ra iāna. E noa atu te ’ohipa e tupu mai, ’a tauturu mai iā’u ’ia hāmani maita’i iāna. »

’A pure ai ’o Matt, ’ua ha’amata ’oia i te fa’ari’i i te hau i roto iāna. ’Ua ’ite ’oia ē ’o te Metua i te ao ra ’e ’o Ietu Metia tōna mau hoa maita’i roa a’e. E nehenehe rāua e tauturu iāna ’ia here ia Iotepha, noa atu te ’ohipa tā Iotepha i mā’iti i te rave. ’E te reira rāua nōna noa atu e ’ere fa’ahou ’o Iotepha i tōna hoa.

’Ua ’ata’ata ’o Matt. ’Ua riro te purera’a nō Iotepha ’ei mana’o maita’i i muri mai i te mau mea ato’a.

Fa’ahōho’ara’a nā Mark Robison