« Nō reira ’ua bāpetizohia ’oe. E aha ïa i teienei ? Hoa, Tēnuare 2026, 36–37.

Nō reira ’ua bāpetizohia ’oe. E aha ïa i teienei ?

’Ua bāpetizo-a’ena-hia ānei ’oe ? E mea fa’ahiahia roa te reira ! ’Ua ’oa’oa roa tō tātou Metua i te ao ra ’e ’o Iesu Mesia i tō ’oe mā’itira’a e pe’e ia rāua.

Te bāpetizora’a ’o te hō’ē noa ïa o te mau ta’ahira’a mātāmua o tō ’oe tere i te hō’ē aura’a fa’ahiahia ’e tō tātou Metua i te ao ra ’e tō ’oe Fa’aora. Teie te tahi mau ’ohipa tā ’oe e nehenehe e rave ’aore rā e ha’amata i te rave i teienei ’ua bāpetizohia ’oe.

Fa’aro’o i te Vārua Maita’i

Tē ha’amana’o ra ’oe i te taime ’a fa’ari’i ai ’oe i te hōro’a o te Vārua Maita’i i muri a’e i tō ’oe bāpetizora’a ? I teienei, e nehenehe ’oia e vai noa i pīha’i iho ia ’oe ’a mā’iti ai ’oe i te maita’i. E paraparau pinepine mai te Vārua Maita’i ia tātou nā roto i te mau mana’o ’e te mau nīno’a mana’o. Te fa’aro’ora’a i te Vārua Maita’i, e tauturu ia ’oe ’ia rave i te mau mā’itira’a maita’i ’e ’ia ’ite mai i te ’oa’oa mau.

’A feruri nā i teie : E aha te taime ’a putapū ai ’oe i te Vārua Maita’i ? E nehenehe te reira e riro ’ei hō’ē ’itera’a faufa’a roa ’aore rā ’ei ’itera’a iti noa !

Tātarahapa

I tō Iesu Mesia pohera’a nō tā tātou mau hara, ’ua fa’ati’a ’oia ’ia tātou pā’āto’a ’ia tātarahapa. Te aura’a o te tātarahapa ’o tē fāriu-’ē-ra’a ïa i te mau mā’itira’a ’ino ’e te fāriura’a i ni’a i te Metua i te ao ra ’e ia Iesu Mesia. E ’oa’oa rahi tō rāua ’ia mā’iti ana’e tātou e tātarahapa, nō te mea e tauturu te reira ia tātou ’ia ha’afātata atu ā ia rāua.

’A feruri nā i teie : E aha te hō’ē ’ohipa tā ’oe e nehenehe e rave ’o tē tauturu ia ’oe ’ia fāriu atu i te Metua i te ao ra ’e ia Iesu Mesia ?

Rave i te ’ōro’a mo’a

I muri a’e i tō ’oe bāpetizora’a, e mea ta’a ’ē atu ā te ’ōro’a mo’a. I teienei ’ia rave ana’e ’oe i te ’ōro’a mo’a, tē fa’a’āpī ra ïa ’oe i te fafaura’a tā ’oe i rave i te bāpetizora’a, te ha’apa’ora’a i te mau fa’auera’a ’e te pe’era’a ia Iesu Mesia. ’Ia ’ore ana’e ’oe e ha’apa’o maita’i roa i teie mau parau fafau, e fa’aha’amana’o te ’ōro’a mo’a i te mau hepetoma ato’a ē, maoti Iesu Mesia, e nehenehe tātou e tātarahapa ’e ’ia fa’a’orehia te hara.

’A feruri nā i teie : E aha te hō’ē rāve’a tā ’oe e rave nō te fa’ariro i te ’ōro’a mo’a ’ei mea ta’a ’ē i teie hepetoma ?

Fa’aineine nō te hiero

Te hiero ’o te fare mo’a ïa o te Atua. I te matahiti nō te 12ra’a o tō ’oe matahiti, e nehenehe ’oe e haere i te hiero ’e e tauturu ia vetahi ’ē ma te ravera’a i te mau bāpetizora’a nō te feiā i pohe. ’Ia tae i te hō’ē mahana, e nehenehe ’oe e rave i te mau fafaura’a hau atu nō ’oe iho ’e te Metua i te ao ra. Te mea tā ’oe e ha’api’i mai i roto i te hiero, e tauturu ia ’oe ’ia riro hau atu mai te Metua i te ao ra ’e ia Iesu Mesia !

’A feruri nā i teie : E aha te hō’ē ’ohipa tā ’oe e nehenehe e rave i teienei, nō te fa’aineine i te haere i te hiero ?