« E ’āparaura’a ’e ’o Emily nō ni’a i te bāpetizora’a », Hoa, Tēnuare 2026, 34–35.
E ’āparaura’a ’e ’o Emily nō ni’a i te bāpetizora’a
E 9 matahiti tō Emily nō Sinaloa, Mēhiko mai. ’Ua ui mātou iāna i te tahi mau uira’a nō ni’a i tōna bāpetizora’a.
’A fa’a’ite mai na ia mātou nō ni’a ia ’oe.
Mea au nā’u te pēni, te pāpa’i hōho’a, te hāmani i te mau mā’a hope’a [dessert], ’e e ’ori ’e e hīmene ’e tō’u mau taea’e ’e mau tuahine. E mea au ato’a nā’u e haere i te fare fa’a’apu a tō’u pāpā rū’au nō te fa’ahoro i te pua’ahorofenua.
Nāhea ’oe i te fa’aineinera’a nō te bāpetizora’a ?
I roto i te pō ’utuāfare, ’ua ha’api’i tō’u nā metua iā’u i te fa’aro’o, te tātarahapa, te bāpetizora’a, ’e te hōro’a o te Vārua Maita’i. ’Ua fa’aineine ato’a vau iā’u iho ma te tai’ora’a i te mau pāpa’ira’a mo’a, te purera’a ’e te māta’ita’ira’a i te mau video nō ni’a ia Iesu Mesia. Mea au ta’a ’ē nā’u te video nō te bāpetizora’a o te Fa’aora i te ’ānāvai nō Ioridana. ’Ua au roa vau te tuha’a ’a fā mai ai te ’ū’ū’aira’o ’uo’uo ’o tei fa’ahōho’a i te Vārua Maita’i.
’Ua ha’api’ipi’i ato’a māua tō’u pāpā e nāhea māua ’ia ti’a i roto i te ’āpo’o bāpetizora’a. Mea ri’ari’a nā’u ’ia tomo i raro a’e i te pape, ’ua ha’api’i rā tō’u pāpā e nāhea ’ia tūfene te turi ’āvae, ’ia tāpe’a i tō’u ihu, ’ia tāpo i te mata ’e ’ia fa’atopa marū noa i roto i tōna rima. ’Ua ha’api’ipi’i rahi māua i te reira, ’e i te mahana o tō’u bāpetizora’a, ’ua ’ōhie roa iā’u ’ia rave te reira.
E aha te mea ta’a ’ē i roto i tō ’oe bāpetizora’a ?
E’ita roa te reira mahana e mo’ehia iā’u. ’Ua hōro’a te tahi mau melo o tō’u ’utuāfare i te mau a’ora’a, ’ua parau te mau pure ’e ’ua riro ’ei ’ite. ’Ua hīmene ato’a vau « ’Ia bāpetizohia vau » ma te tauturuhia e te fa’ata’i piāna o te Paraimere. I muri a’e i tō’u bāpetizora’ahia, ’ua putapū vau i tō’u Metua i te ao ra ’e i tāna Tamaiti ’o Iesu Mesia, i pīha’i iho roa iā’u. ’Ua ta’i au i te ’oa’oa.
E mea ta’a ’ē ato’a te reira nō te mea ’ua tae mai te mana’o iā’u, e ani manihini i te tahi mau hoa tō’u ’e te mau melo o te ’utuāfare e ’ere i te melo nō te ’Ēkālēsia, ’ia haere mai i tō’u bāpetizora’a ’e ’ua fa’ari’i rātou ’ia haere mai. Hō’ē ’o tō’u mau hoa tei haere mai ’o tē tāmau noa nei i te haere mai i te mau ’ātivite a te ’ēkālesia ’e tōna nā metua.
Nāhea ’oe ’ia ha’amana’o i tā ’oe mau fafaura’a o te bāpetizora’a ?
Tē tūtava nei au i te ha’amana’o i tā’u mau fafaura’a ma te haerera’a i te purera’a, te ravera’a i te ’ōro’a mo’a ’e te ha’amana’ora’a i te Fa’aora. Te ’itera’a ē, ’ua hōro’a Iesu Mesia i tōna ora nō’u, ’ua māuruuru roa vau nō te reira. Tē pure ato’a nei au i te mau mahana ato’a, tē tai’o nei i te mau pāpa’ira’a mo’a, tē tāvini nei ia vetahi ’ē, ’e tē tūtava nei i te riro ’ei ta’ata maita’i.
I tō’u mau hoa e fātata nei i te bāpetizohia, tē ti’aturi nei au e ha’afātata atu ā ’outou ia ’outou i te Metua i te ao ra ’e e putapū i tōna here maita’i roa !