Joseph deyr fyrir fagnaðarerindið

Margir voru reiðir Joseph Smith og kirkjunni. Þeim líkaði ekki það sem Joseph kenndi. Sumir vildu jafnvel drepa hann.

Joseph varð að fara til Carthage-borgar, svo að dómari gæti skorið úr um hvort hann hefði brotið lögin. Joseph blessaði Emmu og börn sín, kyssti þau bless og hélt til Carthage.

Hyrum bróðir Josephs og fleiri vinir fóru með honum. Þegar þeir héldu af stað, leit Joseph til baka á Nauvoo. „Þetta er fallegasti staðurinn og besta fólkið undir himninum,“ sagði hann.

Í Carthage voru mennirnir settir í fangelsi. Hyrum las fyrir þá úr Mormónsbók. Joseph sagði vörðunum að Mormónsbók væri sönn.

Síðar sama dag komu reiðir menn vopnaðir inn í fangelsið. Þeir tóku að skjóta inn í herbergið þar sem Joseph og vinir hans voru. Hyrum og Joseph voru drepnir.

Hinir heilögu urðu mjög sorgmæddir þegar þeir komust að því að Joseph og Hyrum væru látnir. En þeir vissu að kirkjan myndi halda áfram að vaxa og blessa börn Guðs hvarvetna um heim.