Ko Hono Langa ʻo Nāvuú

Fuofua Kāingalotu naʻa nau nofo ʻi ha ngaahi tēniti ʻi he kauvai ʻo e Vaitafe Misisipí

Naʻe folofola ʻa e ʻEikí ki he Kāingalotú ke nau fakataha ki ha feituʻu foʻou. Naʻe ofi ia ki ha vaitafe lahi, ʻa ia naʻe viviku mo pelepela ai ʻa e fonuá. Naʻe ʻikai hangē ia ha feituʻu lelei ke langa ai ha koló. Ka naʻe ʻilo ʻe he Palōfita ko Siosefa Sāmitá te nau lava ʻo ngaohi ia ke fakaʻofoʻofa, ʻi he tokoni ʻa e ʻEikí.

Tangata ʻokú ne haʻamo ha fefie ʻi hono umá, ko ha hoosi mo e saliote mo ha ngaahi naunau langa mo e ngaahi fale ʻakau

Siosefa Sāmita mo e kau tangata kehe ʻoku nau fakatoka piliki ʻi heʻenau langa ha falé

Naʻe ngāue mālohi ʻa e Kāingalotú ke hoko ia ko ha feituʻu lelei ke nofo ai. Naʻe ui ʻe Siosefa ʻa e koló ko Nāvū, ʻa ia ko hono ʻuhingá ko ha “feituʻu fakaʻofoʻofa.”

Ko Siosefa Sāmita ʻokú ne tuhu ki ha feituʻu ʻi ha tafungofunga ke tuʻu ai ha temipale

Naʻe finangalo ʻa e ʻEikí ke langa ʻe Hono Kāingalotú ha temipale ʻi Nāvū. Naʻe vave leva ʻa e kamata ngāue ʻa e kakaí.

Ko Siosefa Sāmita ʻokú ne akoʻi ha Kāingalotu kehe ʻi ha fale

Naʻe maʻu ʻe he ʻEikí ha ngaahi tāpuaki maʻongoʻonga ke foaki ki Hono kakaí. Te nau fakahoko ʻi he temipalé ha ngaahi fuakava, pe ngaahi palōmesi makehe, mo e ʻEikí. Te nau ako foki fekauʻaki mo e palani ʻo e fiefia ʻa e Tamai Hēvaní maʻa ʻEne fānaú kotoa.

Naʻe ngāue mālohi ʻa e Kāingalotú ke langa ʻa e temipalé. Naʻe fuoloa, ka naʻa nau fiefia ke ako fekauʻaki mo e ngaahi talaʻofa makehe naʻe maʻu ʻe he ʻEikí maʻanautolu ʻi Hono temipalé.