Ngaahi ʻEkitivitī ʻo e Haʻu, ʻo Muimui ʻIate Aú

Ko e temipalé ko ha feituʻu ia ʻe lava ke tāpuekina ai kitautolu ʻe he ʻOtuá (vakai, Tokāteline mo e Ngaahi Fuakava 95:8). Langa ho temipalé ʻo fakaʻaongaʻi ha fanga kiʻi foʻi kiupi suka, poloka, pe ngaahi meʻa mei natula! Pea ʻomi leva ha fakatātā ʻo hoʻo meʻa naʻe faʻú. Vakai ki he takafi muí ke ʻilo ʻa e foungá.

ʻOku akoʻi mai ʻe he folofolá, “Ke mou fakalongolongo, pea ʻiloʻi ko e ʻOtuá au” (Tokāteline mo e Ngaahi Fuakava 101:16). ʻOku ʻuhinga ia ko e taimi ʻoku tau feinga ai ke ʻapasiá, te tau lava ʻo ongoʻi vāofi ki he Tamai Hēvaní. Fai ʻa e vaʻinga ko ʻení fekauʻaki mo e fakalongolongó. ʻOku lele mo feinga ha tokotaha ke maleʻi ʻa e tokotaha kotoa pē. ʻI he taimi ʻoku maleʻi ai ha tahá, ʻoku nau tuʻu maʻu ʻaupito. Kimuʻa pea nau lava ʻo toe lelé, ʻoku nau lea ʻaki ha meʻa ʻe taha ʻoku nau ʻilo fekauʻaki mo e Tamai Hēvaní.

Te tau lava ʻo hoko ko ha maama ki he niʻihi kehé ʻaki ʻetau muimui ki he sīpinga ʻa Sīsū Kalaisí mo tokoni ki he niʻihi kehé (vakai, Tokāteline mo e Ngaahi Fuakava 103:9). Huke ki he peesi 13 ke faʻu haʻo ngāue fakameaʻa teʻelango pē ʻaʻau.

ʻOku mahuʻinga ke fakafanongo ki he palōfita mo e kau ʻaposetolo ʻa e ʻOtuá (vakai, Tokāteline mo e Ngaahi Fuakava 107:22–23). Lau ha talanoa ʻi he peesi 4 fekauʻaki mo hono maʻu ʻo e ngaahi tali mei he konifelenisi lahí. Hiki haʻo ngaahi fehuʻi pē ʻaʻau ʻi he peesi 6. Te ke toe maʻu foki mo ha ngaahi ʻekitivitī te ke lava ʻo fai lolotonga hoʻo fanongo ki he konifelenisí.