“Ngaahi Meʻa ʻe 5 ke Manatuʻi fekauʻaki mo e Maluʻi ʻo e Sinó,” Ko e Kaumeʻá, Sepitema 2025, 38–39.

Ngaahi Meʻa ʻe 5 ke Manatuʻi fekauʻaki mo e Maluʻi ʻo e Sinó

Ko ho sinó ko ha meʻaʻofa ia mei he Tamai Hēvaní. ʻOkú Ne finangalo ke tokoniʻi koe ke ke malu mo fiefia. Kapau ʻe feinga ha taha ke fakamamahiʻi koe ʻaki ha lea pe tōʻonga, ʻoku ʻikai sai ia! ʻOku totonu ke tau angaʻofa mo fakaʻapaʻapa ki he niʻihi kehé, pea ʻoku totonu ke tau ʻamanaki te nau angaʻofa mo fakaʻapaʻapa mai foki kiate kitautolu.

ʻOku sai pē ke lea ʻikai, ʻo aʻu pē ki ha taha lahi. Ko koe ʻokú ke puleʻi ho sinó. ʻOku ʻuhinga ʻeni te ke lava ʻo fili pe ʻe ala, fāʻofua, pe ʻuma atu ha taha kiate koe. ʻE lava ke ke akoako lea ʻaki ʻa e “ʻIkai,” “ʻOua te ke ala mai kiate au,” mo e “Tukunoaʻi au.” Kapau ʻoku ala atu ha taha kiate koe pe kole atu ke ke fai ha meʻa ʻokú ne ʻai koe ke ke ongoʻi taʻefiemālie, ʻoku sai pē ke ke talaange ʻikai pea mavahe mei ai kapau te ke lava.
ʻIloʻi pe ko e fē ʻa e ala ʻoku malú pe ʻikai malú. ʻOku tokoni ʻa e ala ʻoku malú ke ke ongoʻi ʻoku ʻofaʻi koe (hangē ko ha fāʻofua pe tā nima) pe moʻui maʻa mo moʻui lelei (hangē ko hano tokoniʻi koe ʻe ha mātuʻa ke ke kaukau pe ko ha toketā ʻokú ne tokoniʻi koe ʻi he taimi ʻokú ke puke aí). Ko e taimi ʻe niʻihi ʻe lava ke mamahi ha ala ʻoku malu, hangē ko hano huhu maluʻi koe, ka ʻoku malu pē ia koeʻuhí he ʻokú ne ʻai koe ke ke moʻui lelei. ʻOku uesia ho sinó pe ngaahi ongó ʻe ha ala ʻoku ʻikai malú, hangē ko e tā, tekeʻi, pe ala ki he ngaahi konga tapu ʻo ha taha. ʻOku ʻikai sai ʻa e ngaahi ala fakamamahi pe taʻe fakafiemālie ko ʻení.
ʻOku ʻi ai ʻa e ngaahi konga ho sinó ʻoku tapu pea ʻoku ʻikai totonu ke ala ki ai ha taha kehe. ʻOku kau ʻi he ngaahi konga tapú ʻa e ngaahi konga ʻo ho sinó ʻoku ʻufiʻufi ʻe ha teunga kaukau tahi. ʻOku ʻikai sai ke ala ha niʻihi kehe ki ho ngaahi konga tapú (ʻo tatau ai pē ʻi loto pe ʻi tuʻa ʻi ho valá) pe kole atu ke ke ala ki honau konga tapú. Kapau ʻe hoko ʻeni kiate koe, talanoa ki ha tokotaha lahi falalaʻanga ʻi he vave taha te ke lavá.
Manatuʻi ʻa e faikehekehe ʻo e ngaahi fakapulipulí mo e ngaahi meʻa fakaʻohovalé. Ko e meʻa fakaʻohovalé ko ha meʻa fakafiefia ia ki he tokotaha kotoa pē, hangē ko ha meʻaʻofa faiʻaho. Ko ha meʻa fakapulipulí ko e taimi ia ʻoku talaatu ai ʻe ha taha ke ʻoua naʻá ke tala ki ha taha kehe. Kapau ʻoku kole atu ke ke fakapulipuliʻi ʻa e ala atu ha taha pe fakamamahiʻi koe, ʻoku totonu ke ke talanoa ki ha taha lahi ʻoku falalaʻanga ʻi he vave tahá. Hokohoko atu hono tala ki he kakai lalahi falalaʻangá kae ʻoua kuo tokoniʻi koe ʻe ha taha ke ke malu.
Kapau ʻe ala atu pe fakamamahiʻi koe ʻe ha taha, ʻoku ʻikai ko haʻo foʻui ia. ʻE lava ke feinga ha taha kuó ne fakamamahiʻi koe ke ʻai koe pe ko e niʻihi kehé ke nau tui naʻá ke fai ha meʻa hala, ka naʻe ʻikai ke ke fai ia. ʻOku ʻafioʻi mo ʻofa haohaoa hoʻo Tamai Hēvaní mo Sīsū Kalaisi ʻiate koe. Kole ha tokoni mei ha tokotaha lahi falalaʻanga, pea manatuʻi te ke lava maʻu pē ʻo lotu ki he Tamai Hēvaní ke maʻu ha tokoni.