“Ko ha Fepōtalanoaʻaki mo Keipi fekauʻaki mo e Ngāue ʻi he Siasí,” Kaumeʻá, Sepitema 2025, 40–41.
Ko ha Fepōtalanoaʻaki mo Keipi fekauʻaki mo e Ngāue ʻi he Siasí
Ko Keipí ko ha taʻu 11 mei Halale, Simipāpuē. Naʻa mau fai ange ha ngaahi fehuʻi fekauʻaki mo hono tā ʻo e hivá ʻi he lotú.
Fakamatala mai fekauʻaki mo koe.
ʻOku ou saiʻia ʻaupito ke ngaohi ʻa e fakaneifuá (desserts) mo e meʻakai ifó mo hono tā ʻo e malimipaá (marimba). ʻOku ou hiva mo tauʻolunga, pea ʻoku ou ako ke tā ʻa e fulutá, sailofouní (xylophone) mo e pianó.
Fakamatala mai kau ki hoʻo ngāue foʻou naʻe vahe koe ki aí.
Naʻe kole mai ʻe he pīsopé ke u tokoni ʻi hono tā ʻo e hivá ʻi he houalotu sākalamēnití. Naʻe ʻikai ke u ʻamanaki ki ai peá u fakakaukau te nau fili ha taha ʻoku matuʻotuʻa angé. Ka naʻá ku toe ongoʻi foki ʻoku ʻofaʻi au peá u fiefia koeʻuhí he ʻoku ou saiʻia ʻi he mūsiká.
ʻOku ou kei manavasiʻi pē ʻi he taimi ʻe niʻihi te u hivaʻi ha meʻa hala pea ʻe fanongo ki ai ʻa e kakaí. Ka ʻoku tokoniʻi au ʻe he Laumālie Māʻoniʻoní ke u ongoʻi fiemālie ʻi muʻa ʻi he tokotaha kotoa pē. ʻI he taimí ni ʻoku ou anga ki ai pea ʻoku fakafiefia ʻaupito ia!
Naʻe fēfē nai ʻa e tā ʻo e hivá ki he polokalama ʻa e fānaú ʻi he houalotu sākalamēnití?
Naʻe fakailifia ia ʻi he kamataʻangá. Lolotonga ʻemau akoakó, naʻe ngalo ʻiate au ha niʻihi ʻo e ngaahi leá. Ko ia naʻá ku ako hiva mo ʻeku faʻeé ʻi ʻapi, pea naʻe tokoni lahi ia. ʻI heʻemau akoako ʻi he Palaimelí, naʻá ku hiva leʻolahi ange ke tokoniʻi ʻa kinautolu ʻoku ʻikai ke nau lava ʻo laukongá pe ʻikai ke nau ʻilo ʻa e ngaahi leá.
Naʻá ku ongoʻi fiefia ʻi he hokosia ʻa e ʻaho ʻo e polokalamá. Naʻe fakaʻofoʻofa ʻa e meʻa kotoa pē. Naʻá ku ongoʻi fiemālie mo nonga, pea naʻá ku manatuʻi ʻa e ngaahi leá.
Ko e hā ha meʻa naʻá ke ako mei he aʻusia ko ʻení?
Naʻá ku ako ʻoku ʻikai haohaoa ʻa e ngaahi meʻá ʻi he taimi ʻe niʻihi, ka ʻoku sai pē pea te ke lava ʻo ako meiate kinautolu. Naʻe teuteuʻi foki au ʻe hono tā ʻo e hiva ʻi he Palaimelí ki heʻeku fatongia foʻoú!
Ko e hā ha faleʻi te ke fai ki he niʻihi kehé fekauʻaki mo e ngāue ʻi he lotú?
Mahalo ʻe faingataʻa ʻi he taimi ʻe niʻihi ke ngāue ʻi muʻa ʻi ha kakai tokolahi, ka ko e meʻa fekauʻaki mo kimautolu fānaú ko ʻemau lava ʻo takí ʻo tatau ai pē pe ko e hā homau taʻu motuʻá pe nounou pe lōloa ʻoku mau ʻi aí. Te u talaange kiate kinautolu neongo ko e taimi ʻe niʻihi ʻe ala tukuhifo kitautolu ʻe heʻetau ilifiá, ʻe lava ke tokoniʻi kitautolu ʻe he Laumālie Māʻoniʻoní ke tau ongoʻi nonga. Te Ne tokoniʻi maʻu pē kitautolu ke tau toe tuʻu hake.