“Ko ha Meʻaʻofa ʻa e Mālohi ʻo e ʻOtuá!” Ko e Kaumeʻá, Sepitema 2025, 20–21.

Ko ha Meʻaʻofa ʻa e Mālohi ʻo e ʻOtuá!

Fai ʻe Palesiteni Emily Belle Freeman

Palesiteni Lahi ʻo e Kau Finemuí

Toʻo mei he “Fakaʻaongaʻi Homou Ngaahi Faingamālié,” Liahona, Nōvema 2024, 7–10.

ʻEma Sāmita ʻoku tangutu ʻi ha fale ngaohi mei he kupuʻi ʻakaú ʻokú ne pukepuke ha ipu ukamea

Naʻá ku toki ʻaʻahi kimuí ni ki Hāmoni, Penisilivēnia, USA. ʻI ai, ʻi he ʻū lalo ʻakau māpelé, ʻa ia naʻe fakafoki mai ai ʻa e lakanga fakataulaʻeikí kia Siosefa Sāmita mo ʻŌliva Kautelé. Naʻá ku ʻalu foki ki he ʻapi naʻe nofo ai ʻa Siosefa mo ʻEma Sāmitá. Naʻá ku tuʻu ʻi loto ʻi he veʻe matapā sioʻatá ʻo fifili pe ko e hā ʻa e fakakaukau ʻa ʻEma ʻi heʻene sio atu ʻi he matapā sioʻata ko iá.

Naʻe ʻoange ʻe he ʻEikí kia ʻEma ha pōpoaki mahuʻinga ʻo fakafou ʻi Heʻene palōfita ko Siosefá. Te tau lava ʻo lau ʻa e pōpoaki ko ʻení ʻi he Tokāteline mo e Ngaahi Fuakava 25.

ʻUluakí, naʻe akoʻi ange ʻe he ʻEikí kia ʻEma naʻe ʻi ai hano konga ʻi Heʻene palaní. Naʻá ne fakamanatu ange ko ha ʻofefine ia ʻi Hono puleʻangá.

Uá, naʻe ʻoange ʻe he ʻEikí ha taumuʻa kiate ia. Naʻe fakahoko ʻe ʻEma ha konga mahuʻinga ʻo e Fakafoki Mai ʻo e Ongoongoleleí. Naʻe kole ange ke ne akoʻi ʻa e folofolá mo faʻu ʻa e ʻuluaki tohi himí!

Fakaʻosí, naʻe akoʻi ʻe he ʻEikí ʻa ʻEma fekauʻaki mo ʻene ngaahi fuakavá. ʻE tokoni hono tauhi ʻo e ngaahi fuakavá ke ne ongoʻi ai ʻa e Laumālié, hoko ʻo lelei ange, pea maʻu ha fakahinohino ki heʻene moʻuí.

Kiʻi tamasiʻi mo ha taʻahine ʻokú na tangutu ʻi ha sea ʻi he lotú ʻo maʻu ʻa e mā sākalamēnití

Ko ʻeku fakaʻamú te mou ako ʻa e founga ʻe fakaʻatā ai ʻe he ngaahi ouau ʻo e lakanga fakataulaʻeikí mo e ngaahi talaʻofa ʻo e fuakavá ʻa e mālohi ʻo e ʻOtuá ki hoʻo moʻuí. ʻOku tau lava kotoa ʻo maʻu ʻa e meʻafoaki ʻo e mālohi ʻo e ʻOtuá. ʻOku maʻu ia ʻi he taimi kotoa pē ʻoku tau maʻu ai ʻa e sākalamēnití. ʻI he taimi kotoa pē ʻoku tau hū ai ki he temipalé.

Vaʻinga Lī Hivá

Naʻe kole kia ʻEma Sāmita ke ne faʻu ʻa e ʻuluaki tohi himí. ʻOku tau kei hivaʻi pē ʻa e ngaahi himí ʻi he ʻahó ni! Taufetongi ʻi hono lī ha koini pe ha meʻa siʻisiʻi ʻe taha ʻi he papa vaʻinga [ʻi laló]. ʻI heʻene tō ʻi ha fakatātā, fakakaukau ki ha foʻi hiva fekauʻaki mo e tefito ko iá. Mou hivaʻi fakataha leva ia!