Ngaahi ʻEkitivitī ʻo e Haʻu, ʻo Muimui ʻIate Aú

ʻOku ui ʻe he ʻOtuá ʻa e kau pīsopé mo e kau palesiteni fakakoló ke tokoni ki he kakai ʻi honau ngaahi uōtí pe koló (vakai, Tokāteline mo e Ngaahi Fuakava 72:2). Kosi ʻo toʻo ha ngaahi foʻi haati pepa pea hiki ʻa e ngaahi meʻa ʻokú ke saiʻia ai fekauʻaki mo hoʻo pīsopé pe palesiteni fakakoló ʻi he laʻipepa takitaha. Fakapipiki ʻa e ngaahi foʻi hātí ki he matapā honau ʻōfisí pe ʻapí.

ʻE ʻi ai ʻa e ʻaho te tau lava ai ʻo nofo ʻi he puleʻanga fakasilesitialé mo e Tamai Hēvaní, Sīsū Kalaisi, mo hotau ngaahi fāmilí (vakai, Tokāteline mo e Ngaahi Fuakava 76:62, 70, 92). ʻOku fakafehoanaki ʻe he folofolá ʻa e puleʻanga fakasilesitialé ki he laʻaá. Fakaʻaongaʻi ha peleti pepa pe laʻipepa ke ngaohi ʻaki ha laʻā. Kosi ʻa e pepá ʻo toʻo ha fanga kiʻi tapatolu ki he huelo ʻo e laʻaá pea kuluuʻi pe tepiʻi kinautolu ki he siakalé. Talanoa fekauʻaki mo e meʻa te ke lava ʻo fai ʻi he taimí ni ke teuteu ai ke nofo mo e Tamai Hēvaní mo Sīsū Kalaisi ʻi ha ʻaho.

ʻI he fakahinohino ʻa e ʻOtuá, naʻe fakatupu ʻe Sīsū Kalaisi ʻa e meʻa moʻui kotoa pē ʻi he māmaní (vakai, Tokāteline mo e Ngaahi Fuakava 77:2). Fai ha kiʻi vaʻinga mateʻi ʻo ha monumanu! ʻOku fakatātaaʻi ʻe ha tokotaha ha monumanu. ʻOku feinga ʻa e tokotaha kehe kotoa pē ke mateʻi pe ko e hā ʻa e monumanu ko iá. Ko hoʻo mateʻi pē ʻo tonú, lea ʻaki ha meʻa ʻokú ke saiʻia ai fekauʻaki mo e monumanu ko iá.

ʻOku fanongo mai maʻu pē ʻa e Tamai Hēvaní ki heʻetau ngaahi lotú (vakai, Tokāteline mo e Ngaahi Fuakava 81:3). Hivaʻi fakataha mo hoʻo fāmilí ʻa e “Lotu ʻa ha Kiʻi Tamasiʻi” (Tohi Hiva ʻa e Fānaú, 6). Kamata ʻa e foʻi hivá ʻaki ha toko taha pē. Pea ʻai ke kau māmālie mai ʻa e tokotaha kotoa pē. Hili hoʻomou hivá, talanoa ki he ngaahi meʻa te mou lava ʻo lotua fakafāmilí.