Ko e Solovaʻanga ke Maʻu ha Malumalu
“Fēfē kapau te tau tō ha ʻulu ʻakau?” Ko e fehuʻi ange ia ʻa Kulisitoló.
Ko ha talanoa moʻoni mei ʻĀsenitina.
“ʻE lava ke ta ʻalu ki he loto ʻataʻataá (plaza)?” Ko e fehuʻi ange ia ʻa e tuofefine ʻo ʻAiveni ko Kulisitoló.
Naʻe sio ʻa ʻAiveni ki tuʻa. Naʻá ne pehē, “ʻOku ou fie ʻalu. Kae mahalo ʻoku totonu ke ta tatali kae ʻoua kuo tō ʻa e laʻaá. ʻOku fuʻu ʻafu ʻaupito.”
Naʻe ʻi he loto ʻataʻataá ha loto ʻataʻatā musie lahi ofi ki honau ʻapí. Naʻá na saiʻia ke vaʻinga tag pe langatoi ʻi ai mo hona ngaahi kaungāmeʻá. Ka naʻe ʻikai ha feituʻu malumalu ʻi he loto ʻataʻataá ke nau mālōlō ai mei he velá. Pea ʻi he faʻahitaʻu māfana ko ʻení, ko ha palopalema lahi ia.
Naʻe kiʻi fakalongolongo ʻa Kulisitolo. Naʻá ne pehē mai leva, “Fēfē kapau te tau tō ha ʻulu ʻakau? ʻI he founga ko iá ʻe ʻi ai ha feituʻu malumalu ʻi he loto ʻataʻataá. Pea te tau lava leva ʻo vaʻinga naʻa mo e taimi ʻoku vela aí!”
Naʻe malimali ʻa ʻAiveni. “ʻOku ou saiʻia ʻaupito ʻi he fakakaukau ko iá.”
Naʻe talaange ʻe ʻAiveni mo Kulisitolo kia Papa ʻena palaní. Naʻe pehē ange ʻe Papa, “Te u kole ha ngofua mei he koló.”
Hili ha ngaahi uike siʻi mei ai, naʻa nau maʻu ʻa e ngofua naʻa nau fiemaʻú pea naʻa nau mateuteu ke kamata! Naʻe ʻave ʻe Papa ʻa ʻAiveni mo Kulisitolo ki he fuʻu ʻakau lahi naʻe tupu ʻi mui ʻi honau falé. Naʻe tupu ha fanga kiʻi fuʻu ʻakau iiki ʻi he lalo ʻakaú.
Naʻe fakamatala ʻa Papa ʻo pehē, “ʻI he taimi ʻoku matala ai ʻa e fuʻu ʻakau lahí, ʻoku tō mei ai ʻa e ngaahi tengaʻi ʻakaú ki he kelekelé. Pea tupu ʻa e fanga kiʻi ʻakau iiki meiate kinautolu. ʻOku nau hangē ha fanga kiʻi mana iiki ʻo natulá!”
Naʻe fakaʻaliʻali ange ʻe Papa ʻa e founga ke keli fakalelei hake ai ʻa e fanga kiʻi fuʻu ʻakaú. Naʻe tō fakalelei kinautolu ʻe ʻAiveni mo Kulisitolo ʻi ha ʻū kapa ʻakau.
Pea ʻi ha hoʻatā Tokonaki ʻe taha, ʻi he taimi naʻe ʻaoʻaofia aí, naʻe fakaheka ʻe ʻAiveni mo Kulisitolo ʻa e fanga kiʻi ʻakaú ki ha saliote. Naʻá na teke māmālie atu ia ki he loto ʻataʻataá. Naʻe tokoni ʻa e ngaahi tokoua mo e tuofāfine iiki ange ʻo ʻAivení ʻi hono fetuku ha ʻū kane vai. Naʻe ʻomi ʻe Mama mo Papa ha ʻū sāvolo.
Naʻa nau fili fakataha ha feituʻu ki he fuʻu ʻakau takitaha. Naʻa nau keli ha ngaahi luo pea tō ʻa e fuʻu ʻakau takitaha ʻaki ʻa e ʻofá. Naʻe fakaʻaliʻali ange ʻe Mama ʻa e founga ke keli ha ngaahi foʻi luo takatakai ʻi he ʻakaú ki hono fuʻifuʻi kinautolú. Naʻá ne pehē, “ʻOku fiemaʻu ʻe he ʻakaú ʻa e laʻaá, vaí, mo e ngaahi ivi lahi ke tupu ʻo mālohi. Tatau tofu pē mo e fānaú!”
Naʻe fakakaukau ʻa ʻAiveni ki he fuʻu ʻakau ʻi mui ʻi honau falé peá ne fakakaukauloto ki he fōtunga ʻo e ʻulu ʻakaú ʻi ha ʻaho. Naʻá ne pehē ange, “Ke tui ki ai? ʻE ʻi ai ʻa e ʻaho ʻe māʻolunga ange ʻa e ngaahi fuʻu ʻakaú ni ʻiate kitautolu!”
ʻI he faʻahitaʻu failaú, ʻe tohoakiʻi ʻe he ʻulu ʻakaú ʻa e tokanga ʻa e tokotaha kotoa pē ʻaki honau matalaʻiʻakau fakaʻofoʻofa, lanu pingikī māmá. ʻI he faʻahitaʻu māfaná, ʻe kāpui honau malumalú ʻa e kotoa ʻo e loto ʻataʻataá. Pea ʻi he faʻahitaʻu fakatōlaú, ʻe ʻufiʻufi ʻe he ngaahi lauʻiʻakaú ʻa e kelekelé ʻi ha kāpeti lanu engeenga.
ʻI he ʻaho kotoa pē, naʻe ʻaʻahi ʻa ʻAiveni mo Kulisitolo ki he loto ʻataʻataá ke vakaiʻi ʻa e fanga kiʻi ʻakaú. Naʻa nau fakapapauʻi ʻoku maʻu ʻe he fuʻu ʻakau takitaha ha vai feʻunga. Pea ko e taimi kotoa pē naʻe huli hake ai ha lauʻiʻakau pe vaʻa foʻou, naʻa nau ongoʻi fiefia ʻaupito. Naʻe ola lelei ʻenau ngāue mālohí!
Naʻe ongoʻi fiefia ʻa ʻAiveni ʻi heʻene fakakaukau atu ki he kakai kotoa pē te nau fiefia ʻi he malumalu ʻi he loto ʻataʻataá ʻi ha ʻaho. Kuó ne tokoni ke ngaohi ʻa e māmaní ke hoko ko ha feituʻu fakaʻofoʻofa ange maʻá e fānau kotoa ʻa e Tamai Hēvaní.
ʻŪ tā fakatātā ʻa Colleen McKeown