Laukonga Faingofua

Ngaahi Lea Lelei mo Faingofuá

Fai ʻe Jane McBride

Ko ha talanoa moʻoni mei he USA.

Fānau ʻoku tangutu ʻi he Palaimelí mo fanongo ki ha taki

Naʻe malimali ʻa Kasi ʻi heʻene tangutu ʻi he Palaimelí. Naʻe fai ʻi he ʻahó ni ʻa e polokalama lau lēsoni ʻa e fānaú ʻi he houalotu sākalamēnití. Naʻe fakailifia ke ne lea ʻaki ʻene kongá, ka naʻá ne fakahoko ia!

Naʻe tuʻu ʻa Sisitā Teni, ko e palesiteni Palaimelí, ʻi muʻa. Naʻá ne pehē mai, “Naʻa mou fakahoko lelei hoʻomou polokalamá ʻi he houalotu sākalamēniti ʻi he ʻaho ní! ʻOku ou ʻiloʻi naʻa mou takitaha ngāue mālohi ke ako hoʻomou ngaahi kongá.”

Ongo tamaiki tangata ʻokú na talanoa, kiʻi taʻahine ʻoku mata mamahi

Naʻe pehē ange ʻe ha taha ʻo e tamaiki tangata matuʻotuʻa angé, “Tuku kehe pē ʻa Kasi. Naʻe ʻikai lava ʻe ha taha ʻo tala ʻa e meʻa naʻá ne lea ʻakí.”

Naʻe fakafulofula ʻa Sisitā Teni ki he kiʻi tamasiʻí, peá ne tafoki ʻo malimali kia Kasi. “Naʻá ke fakahoko ha lea fakaʻofoʻofa.”

Naʻe feinga ʻa Kasi ke ʻoua naʻá ne tangi. Naʻá ne fai hono lelei tahá ke ako ʻene lēsoní. Ka ko e taimi ʻe niʻihi naʻe ʻikai tonu ʻene ngaahi leá.

Ko e kiʻi taʻahine mo hono fāmilí ʻi he kaá, ʻokú ne tangi

ʻI heʻenau lele ki ʻapí, naʻe ʻikai toe lava ʻe Kasi ʻo taʻofi ʻa hono loʻimatá.

“Ko e hā ʻa e meʻa ʻoku hokó?” Naʻe fehuʻi ange ʻe Mami.

“Naʻe fakakata ʻaki au ʻe ha taha ʻo e tamaiki tangatá. Naʻá ne talamai naʻe ʻikai tonu ʻeku lau ʻeku lēsoní.” Naʻe kamata ke ne tangi lahi ange.

Ko e talanoa ha faʻē mo e taʻahine ʻi he kaá

Naʻe pehē ange ʻe Mami, “Naʻá ke fai ha ngāue lelei ʻi he ʻahó ni. ʻOkú ma laukau ʻaki koe mo Teti. ʻOkú ke ʻiloʻi pe ko hai ʻokú ne toe laukau ʻaki koé?”

Naʻe kalokalo ʻa Kasi.

Naʻe pehē ange ʻe Mami, “Tamai Hēvaní. ʻOkú Ne ʻafioʻi naʻá ke fai ho lelei tahá.”

Naʻe ongoʻi sai ange ʻa Kasi. Naʻá ne fie ngāue ʻaki ʻene ngaahi leá ke tokoniʻi ʻa e kakai kehé ke nau ongoʻi fiefia foki.

ʻI he akó, naʻe talaange ʻe Kasi ki heʻene faiakó ʻokú ne fai ha ngāue lelei ʻi he faiakó.

Naʻe fakaleleiʻi ʻe Teti ha funga laupapa ʻi ʻapi. Naʻe talaange ʻe Kasi naʻá ne fai ha ngāue lelei ʻi hono ngaohi honau falé ke fakaʻofoʻofá.

Naʻe vaʻinga pulu fakataha ʻa Kasi mo hono tuongaʻané ʻi tuʻa. Naʻe talaange ʻe Kasi ʻoku sai ʻaupito ʻene tolo ʻa e pulú.

Taʻahine ʻoku fakakaukau ki heʻene ngāue ʻaki ʻa e ngaahi lea ʻofa ki he niʻihi kehé

Naʻe ongoʻi fiefia ʻa Kasi ʻi heʻene talaange ki he kakaí naʻa nau fai ha ngāue leleí. ʻI he taimi naʻá ne sio ai ki he malimali ʻa e niʻihi kehé, naʻá ne ʻiloʻi naʻe tokoni lahi ʻene ngaahi lea faingofuá!