Ako mo Tupulaki
Naʻa tau haʻu ki he māmaní koeʻuhí ke tau lava ʻo ako mo tupulaki pea hoko ʻo hangē ko e Tamai Hēvaní ʻi ha ʻaho (vakai, Mōsese 1:39). ʻOku tau faʻa fai ʻi he taimi ʻe niʻihi ha ngaahi fili ʻoku ʻikai ke tau ongoʻi laukau ʻaki. Ko e taimi ʻoku tau faiangahala ai pe fai ha fehalaākí, ko ha faingamālie ia ke tau tafoki ai kia Sīsū Kalaisi.
Te ke lava maʻu pē ʻo tupulaki mo toe feinga ʻi he taimi ʻokú ke fai ai ha fehalaaki pe fili ʻoku koví. ʻOku ʻofa haohaoa ʻa e Tamai Hēvaní mo Sīsū Kalaisi ʻiate koe pea te Na lava maʻu pē ʻo tokoniʻi koe!
ʻOku Lava ʻa e Tokotaha Kotoa ʻo Fakatomala
Ko e fili ko ia ke fai ha meʻa ʻokú ke ʻilo ʻoku fepaki ia mo e ngaahi fekau ʻa e ʻOtuá ko ha angahala ia. Naʻe ʻafioʻi ʻe he Tamai Hēvaní te tau faiangahala kotoa pē mo fai ha ngaahi fili ʻoku kovi. Ko e ʻuhinga ia naʻá Ne fekauʻi mai ai Hono ʻAlo ko Sīsū Kalaisí. Koeʻuhí ko Ia, te tau lava ʻo fakatomala, ongoʻi ʻEne ʻofá, mo fai ha ngaahi fili ʻoku lelei angé (vakai, ʻĪnosi 1:5–6). Manatu, kuo palōmesi ʻe he ʻEikí: “Ko ia ia kuó ne fakatomala mei heʻene ngaahi angahalá, ʻoku fakamolemoleʻi ia, pea ko au ko e ʻEikí, ʻoku ʻikai te u toe manatu ki ai” (Tokāteline mo e Ngaahi Fuakavá 58:42).
Ako mei he Ngaahi Fehalaākí
Ko e ngaahi fehalaākí ko ha meʻa ia ʻokú ke fai fakatuʻupakē. Ko e taimi ʻe niʻihi ʻoku lava ʻe he ngaahi fehalaākí ʻo ʻai koe ke ke ongoʻi loto-mamahi pe ongoʻi mā. Ka ʻoku ʻikai fiemaʻu ke tau tokanga taha ki heʻetau ngaahi fehalaākí! Te tau lava ʻo ako meiate kinautolu pea tukuange kinautolu. ʻE lava foki ke tokoniʻi kitautolu ʻe Sīsū Kalaisi ʻi he ngaahi meʻa ko ʻení.
Ngaahi tā fakatātā ʻa Tatsiana Burgaud