Ko Hotau Māmani Fakaʻofoʻofá
Toʻo mei he, “Ko Hotau Fatongia Tauhi ʻi he Māmaní,” Liahona, Nōvema 2022, 57–59.
Naʻá ku ʻave mo hoku uaifí ha niʻihi homa makapuná ki ha ngoue fakaʻofoʻofa ʻi Falanisē. Naʻa mau saiʻia ʻi he ngaahi ngoueʻanga matalaʻiʻakau fakaʻofoʻofá, ngaahi lile ʻi he vaí, mo e fanga kiʻi anovaí.
Ko e ngoué naʻe faʻa tokangaʻi ia ʻe ha tangata ko hono hingoá ko Koloti Mōnei. Ko ha tangata tāvalivali maʻongoʻonga ia. Naʻá ne ngāue fakalelei ʻi heʻene ngoué ʻi ha taʻu ʻe 40. Naʻá ne tā ha ngaahi tā valivali ʻe laungeau ʻa ia naʻe maʻu ʻa e fakakaukaú mei heʻene ngoué.
ʻE lava ke tokoniʻi kitautolu ʻe he ngaahi fakaʻofoʻofa ʻo natulá ke tau houngaʻia ʻi heʻetau Tamai Hēvaní mo Hono ʻAlo ko Sīsū Kalaisí. Naʻá Na faʻu ʻa e māmani fakaʻofoʻofa ko ʻení ʻaki ha ʻotu moʻunga, ngaahi vaitafe, ngaahi ʻakau, mo ha fanga monumanu.
ʻOku fakahaaʻi ʻe he ngaahi fakatupu fakaʻofoʻofa ko ʻení ʻa e lahi ʻo e ʻofa ʻa e ʻOtuá ʻiate kitautolú. Ka neongo ia, ʻoku nau haʻu foki mo ha ngaahi ngafa mo ha ngaahi fatongia. ʻOku ui ʻeni ko e fatongia tauhí. ʻOku fiemaʻu ke tau tokangaʻi ʻa e ngaahi meʻa kuo fakatupu ʻe he ʻOtuá maʻatautolú.
ʻOku fakaafeʻi foki kitautolu ʻe heʻetau Tamai Hēvaní ke tau kau ʻi Heʻene ngāue mohu fakakaukaú. Te tau lava ʻo faʻu ha ʻaati, mūsika, mo ha ngaahi meʻa kehe ke fakafiefiaʻi ʻetau moʻuí mo faitāpuekina ai ʻa e niʻihi kehé.
ʻOku talaʻofa mai ʻe he ʻOtuá ha ngaahi tāpuaki maʻongoʻonga ʻi he taimi ʻoku tau ʻofa mo tokanga ai ki he māmaní mo e niʻihi kehé. ʻI hoʻo fai iá, te ke ongoʻi ha ʻofa lahi ange ʻi hoʻo moʻuí.
ʻAati Pepa Mahaehaé
Naʻe akoʻi ʻe Pīsope Kōsei te tau lava foki ʻo hoko ko ha kau fakatupu! Ko ha ngāue ʻeni te ke lava ʻo fai ke fakamanatu atu kiate koe ʻa e ngaahi fakatupu fakaʻofoʻofa ʻa e Tamai Hēvaní.
-
Kumi ha fakatātā ʻo ha meʻa ʻi natula ʻokú ne fakatupu koe ke ke mohu fakakaukau.
-
Fakaʻaongaʻi ha penivahevahe ke tā ha ngaahi konga kehekehe ʻo e fakatātaá ʻi ha laʻipepa.
-
Haehae ha pepa lanu kehekehe ke fakaʻaongaʻi ʻi hoʻo fakatātaá.
-
Fakapipiki ʻa e ʻū laʻipepa lanu kehekehé ʻi loto ʻi hoʻo fakatātā kuo taá.
Tā fakatātā ʻa Maddie Baker