ʻIkai Fuʻu Haohaoa
Naʻe ʻosi ʻa e ʻaho haohaoa ʻo ʻAteliné!
Ko ha talanoa moʻoni mei Falanisē.
Naʻe ʻosi hono tā ʻe ʻAteline ʻa e puha fakaʻilonga fakaʻosi ʻi heʻene laʻipepá. Naʻá ne tohi ʻi he tafaʻakí ʻo pehē, Fai ʻa e lotu pongipongí mo e efiafí.
“Ko e hā ʻeni?” Ko e ʻeke ange ia ʻe Mamí.
Naʻe pehē ange ʻe ʻAteline, “ʻOku ou faʻu ha lisi vakaiʻi ki ʻapongipongi. Te u maʻu ha ʻaho haohaoa!”
Na‘e hikiʻi hake ‘e Mami hono ongo kemó. “Ko e moʻoni?”
Naʻe kamokamo pē ʻa ʻAteline. “Naʻa mau ako ʻi he Palaimelí fekauʻaki mo e hoko ʻo haohaoa ʻia Kalaisí. Te u toe lelei ange koeʻuhí ke u lava ʻo maʻu ha ngaahi ʻaho haohaoa.”
Naʻe pehē ange ʻe Mami, “ʻOku ou fiefia ʻi hoʻo fie fai ha ngaahi fili ʻoku leleí. Ka ʻokú ke ʻilo, ko e toko taha pē ʻi he māmaní naʻe haohaoá—ko Sīsū Kalaisi.”
Naʻe māpuhoi ʻa ʻAteline. “ʻOku ou ʻiloʻi. Ka ʻoku ou fuʻu fiemaʻu ke u feinga! ʻOku ou tui te u lavaʻi ia.”
ʻI he aʻu ki he pongipongí, naʻe mateuteu ʻa ʻAteline. Naʻá ne ngaohi hono mohengá mo fai ʻene lotu pongipongí.
Naʻá ne tokoni ʻi he maʻu meʻatokoni pongipongí ke fafanga hono kiʻi tehina ko Siliviá. ʻI he taimi naʻe huaʻi ai ʻe Silivia ʻene pīsí ʻi hono seá kotoa, naʻe mihiʻi ʻe ʻAteline ʻene mānavá. Naʻá ne lau ki he fā peá ne tokoni ki hono fakamaʻá.
ʻI he akó, naʻe kumi ʻe ʻAteline ʻa e kakai naʻa nau fiemaʻu tokoní. Naʻe tapeva ʻa e vaʻe ʻo Lūkasí, ko ia ai naʻá ne toʻotoʻo ʻene laulau kai hoʻataá maʻana.
Lolotonga ʻa e mavahe ʻa ʻAteline mei he akó, naʻá ne malimali ʻi heʻene malimali lahi tahá ki he fefine naʻá ne pukepuke ʻa e matapā ʻo e ʻapiakó. Naʻe faʻa mataʻi ʻita ʻa e fefiné. Ka ʻi he ʻaho ní naʻá ne malimali mai!
ʻI he tuku ʻa e akó, naʻe ʻoange ʻe ʻAteline kia Silivia ʻa e kiʻi monumanu meʻavaʻinga naʻá ne saiʻia taha aí ke vaʻinga mo ia. Pea kimuʻa peá ne mohé, naʻá ne fai ha lotu. Naʻá ne fakatonuki ʻa e ʻū meʻa ʻi heʻene lisí pea fusi hake hono sipi kafú. Naʻá ne ongoʻi fiefia mo helaʻia ʻaupito. Naʻá ne mateuteu ki ha ʻaho haohaoa ʻe taha ʻapongipongi!
ʻI he ʻā hake ʻa ʻAteline ʻi he ʻaho hono hokó, naʻe movete takai kotoa ʻene fanga kiʻi tamapuá ʻi he falikí. Naʻe puke ʻe Silivia ha taha peá ne misimisi ia. Pau pē naʻá ne toʻo kotoa kinautolu ki tuʻa!
“Silivia!” Ko e kaila ia ʻa ʻAteliné. “Naʻá ku talaatu ke ʻoua naʻá ke ala ki heʻeku ʻū tamapuá!” Naʻá ne hamusi mai ʻa e tamapua naʻe puke ʻe Siliviá. Naʻe tangi ʻa Silivia peá ne lele [meia ʻAteline].
Naʻe sio atu ʻa ʻAteline ki heʻene lisi vakaiʻí ʻi he matapaá. Naʻá ne ongoʻi loto-mamahi.
Naʻe hū mai ʻa Mami mo e ongoʻi ʻe ʻAteline ha loʻimata ʻi hono kouʻahé.
“Ko e hā ʻa e meʻa naʻe hokó?” Ko e ʻeke ange ia ʻa Mamí.
“Naʻe ngalo ʻiate au ke fai ʻeku lotú. Naʻe ʻikai ke u ngaohi hoku mohengá.” Naʻe leʻoʻi tangi ʻa ʻAteline. “Pea naʻá ku angakovi kia Silivia. Kuo ʻosi hoku ʻaho haohaoá!”
Naʻe fāʻofua ʻa Mami kia ʻAteline. “ʻOku faingataʻa ʻaupito ke haohaoa ʻi he taimi kotoa pē. Ko hono moʻoní, ʻoku ʻikai malava ia.”
Naʻe fakafulofula ʻa ʻAteline. “Ka ʻe founga fēfē haʻaku haohaoa ʻia Kalaisí?”
Naʻe talaange ʻe Mami, “Ko e meʻá pē ia! He ʻikai lava ke fakahaohaoaʻi kitautolu taʻekau ai ʻa Sīsū Kalaisi. Naʻá Ne foaki ʻEne moʻuí maʻatautolu koeʻuhí he naʻe ʻafioʻi ʻe he Tamai Hēvaní te tau fai ha ngaahi fehalaaki pea te tau fiemaʻu ha tokoni. ʻOku toʻo ʻe Sīsū ʻetau ngaahi feinga taʻehaohaoá pea ʻai ke nau toe lelei ange.”
Naʻe fakakaukau ʻa ʻAteline ki ai. Naʻá ne fehuʻi ange, “ʻA ia he ʻikai ke u lava au ʻo maʻu ha ʻaho haohaoa ʻi he ʻaho kotoa pē?”
Naʻe kalokalo ange ʻa Mami. “ʻIkai. Te ke maʻu ha ngaahi ʻaho faingataʻa. Ka te ke maʻu foki mo ha ngaahi ʻaho lelei.” Naʻe tuku ʻe Mami ʻa e laʻiʻulu ʻo ʻAteliné ʻi mui ʻi hono telingá. “Ko hoʻo feinga ʻaki ho lelei tahá ko e meʻa ia ʻoku mahuʻingá. Tatau ai pē kapau ʻoku kamata ʻaki ha ʻaho ha fili hala, te tau lava maʻu pē ʻo fai ha lotu ke fakatomala pea toe feinga pē. ʻI he tokoni ʻa Sīsū Kalaisí, ʻokú ke feʻunga ai.”
Naʻe ongoʻi loto-māfana ʻa ʻAteline.
“Sai, [ta sio] ki hoʻo lisí.” Naʻe tuhu ʻa Mami ki he lisí. “Fēfē ka ta tokanga taha pē ki ha meʻa ʻe taha?”
Naʻe sio ʻa ʻAteline ki heʻene lisí. Naʻá ne hae ha konga ʻo e laʻipepá pea fakapipiki ʻa e meʻa naʻe toé ʻi he matapaá. Ko e meʻa pē ʻe taha naʻe toe aí ko e, Fai ʻa e lotú ʻi he pongipongí mo e poʻulí.
Naʻe malimali ʻa ʻAteline. “Mahalo naʻe ʻikai ke haohaoa hoku ʻahó, ka te u kei lava pē ʻo fai ha lotu ʻi he taimí ni. Pea ʻi he tokoni ʻa Sīsū Kalaisí, ʻe feʻunga pē ia!”
Ngaahi tā fakatātā ʻa Giovanni Abeille