Ko ha Siasi Foʻou maʻa Sāmesi
Naʻe ongoʻi makehe ʻa Sāmesi ʻi heni mei he meʻa naʻá ne ongoʻi ʻi honau siasi ʻe tahá.
Ko ha talanoa moʻoni mei Fisi.
Naʻe lue atu ʻa Sāmesi ki he kiʻi feituʻu naʻe ʻāʻí ʻa ia naʻe tauhi ai ʻe hono fāmilí ʻa e fanga puaká. “Ko ena, fanga puaka!” Naʻá ne laku atu ha meʻakai maʻanautolu, pea naʻe longoaʻa fiefia ʻa e fanga puaká.
Naʻe toʻotoʻo atu leva ʻe Sāmesi ha ngaahi hina vai maʻa ki he paipa vai ʻi tuʻá. Naʻe mālohi e lele ʻa e vai momokó ki he foʻi hiná ʻi heʻene fakamoʻui ʻa e tepí. Ko hono fafanga ʻo e fanga puaká mo hono ʻutu mai ha vai maʻa hono fāmilí ko e founga ia naʻá ne tokoni ai ʻi he ʻaho kotoa peé.
“Sāmesi!” Ko e ui atu ia ʻa Mamí. “Maau ki he lotú?”
Naʻe tamateʻi ʻe Sāmesi ʻa e tepi vaí peá ne toʻo atu ʻa e foʻi hina mamafa fakaʻosí ki loto. “ʻOku ou maau ʻi he taimí ni.”
Naʻe ō ʻa e fāmili ʻo Sāmesí ʻi he Sāpate kotoa pē ki ha siasi faka-Kalisitiane ʻi honau koló. Naʻá ne saiʻia ke ako ʻo kau kia Sīsū Kalaisi.
Naʻe ʻikai fuoloa kuo lue atu ʻa Sāmesi mo hono ongo tuofāfine siʻisiʻi ko ʻUnaisi mo Malamá mo e toenga honau fāmilí ki he lotú. Naʻe longolongoaʻa ha fanga moa hē ʻi he halá.
Ka ʻi heʻenau aʻu ki aí, naʻe tāpuni ʻa e matapaá. Naʻe pehē ange ʻe Teti, “Naʻe ngalo ʻiate au ʻoku tāpuni ʻa e lotú ʻi he uiké ni mo e uike kahaʻú talu mei he mavahe ʻa e faifekaú.”
Naʻe fehuʻi ange ʻe Sāmesi, “ʻOku ʻi ai ha siasi ʻe taha te tau lava ʻo ʻalu ki ai?” Te ne loto-mamahi ka ʻikai ʻalu ki ha lotu ʻi he uiké ni.
Naʻe fakakaukau ʻa Teti ʻi ha kiʻi taimi siʻi. Naʻá ne pehē ange, “ʻIo. ʻOku ou tui ʻoku ou ʻilo ha [siasi] ʻe taha.”
Naʻe muimui atu ʻa Sāmesi mo hono fāmilí ʻia Teti ki honau ʻapí. Naʻa nau heka kotoa ki honau kiʻi vaka papa ʻi he tafaʻaki ʻo e vaitafé. Naʻe tangutu ʻa Teti ʻi mui ke fakamoʻui ʻa e mīsiní.
Naʻe longolongoaʻa hake ʻa e vaká ʻi he vaitafé. Naʻe fakasio ʻe Sāmesi ʻa e fanga kiʻi manupuna naʻe pulipulia ʻi he ʻulu ʻakau lanu mata māʻolungá. Hili ha miniti nai ʻe 15, naʻa nau sio ki ha kiʻi falelotu siʻisiʻi. Naʻe ʻi ai ha papa fakaʻilonga naʻe pehē ai, “Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Naʻe pehē ange ʻe Teti, “Ko e siasi ʻeni naʻá ku fakakaukau ki aí.” Naʻá ne fakaʻuli atu ʻi he vaká ki he matāʻutoʻutá, pea hifo ʻa e tokotaha kotoa pē. Naʻa nau lava ʻo fanongo ki he hiva ʻoku haʻu mei he ʻapisiasí.
ʻI lotó, naʻe tangutu hifo ʻa Sāmesi mo ʻene ongomātuʻá mo hono ongo tuofāfine siʻisiʻí. Naʻa nau fanongo ki he kau leá mo e ngaahi hivá. Naʻe ongoʻi māfana mo fiefia ʻa Sāmesi.
ʻI he ʻosi ʻa e fakatahá, naʻe haʻu ha fefine angalelei ke talanoa mo kinautolu. Naʻá ne pehē ange, “ʻOku ʻi ai ʻemau kalasi makehe maʻá e fānaú. ʻOku ui ia ko e Palaimelí. Te mou fie ō mai ki ai?”
Naʻe sio ʻa Sāmesi ki hono ongo tuofāfiné. Naʻá ne kiʻi ongoʻi manavasiʻi ke ʻalu ki ha kalasi naʻe ʻikai ke ne maheni ai mo ha taha! ʻE lava foki ke haʻu mo hono ongo tuofāfiné. Mahalo pē ʻe fakafiefia ia.
Naʻe tali ange ʻe Sāmesi, “ʻIo.”
“Tau ō!” Naʻe mata fiefia ʻa Malama.
Naʻe muimui atu ʻa Sāmesi mo hono ongo tuofāfiné ʻi he fefiné ki ha loki ako. Naʻe tokolahi ʻa e fānau naʻa nau tangutu ʻi ha fanga kiʻi sea iiki, ʻo talanoa mo kakata. ʻI he tangutu hifo ʻa Sāmesi ki laló, naʻa nau malimali kiate ia. Naʻe angalelei ʻaupito ʻa e tokotaha kotoa!
Naʻa nau hivaʻi ha ngaahi hiva, pea naʻe tokoniʻi ʻe he toenga ʻo e fānaú ʻa Sāmesi mo hono tuofāfiné ke nau ako ʻa e ngaahi leá. Naʻa nau ako leva ha lēsoni fekauʻaki mo Sīsū Kalaisi. Naʻe ongoʻi makehe ʻa Sāmesi ʻi heni mei he meʻa naʻá ne ongoʻi ʻi honau siasi ʻe tahá. Ko ha ongoʻi kehe lelei ia.
ʻI he ʻosi ʻa e lotú, naʻe kaka ʻa e fāmili ʻo Sāmesí ki he vaká ke nau foki ki ʻapi. Naʻe toe sio atu ʻa Sāmesi ki he papa fakaʻilonga ʻi tuʻa ʻi he fale lotú. Naʻe ʻi ai ʻa e huafa ʻo Sīsū Kalaisí. ʻA ia ʻoku pau pē ko e Siasi ia ʻo Sīsū Kalaisí! Naʻe fie muimui ʻa Sāmesi ʻia Sīsū.
“ʻE lava ke tau toe haʻu pē ki heni ʻi he uike kahaʻú?” Ko e fehuʻi ange ia ʻa Sāmesí.
Naʻe malimali ʻa Mami mo Teti. Naʻe pehē ange ʻe Mami, “Naʻá ma fakakaukau ki he meʻa tatau.”
“Sai!” Naʻe fiefia ʻa ʻUnaisi.
Naʻe malimali ʻa Sāmesi. Naʻá ne ʻiloʻi kuo nau maʻu ha meʻa makehe. Pea naʻe ʻikai ke ne faʻa tatali ke ako lahi ange.
Ngaahi tā fakatātā ʻa Bethany Stancliffe