Ko ʻEku Ngaahi Lea ʻi he Ongoongoleleí

Kumi ʻa e ngaahi foʻi lea mo e kupuʻi lea ko ʻení ʻi he tatau ko ʻeni ʻo e Ko e Kaumeʻá!

Fatongia Tauhí

Ongo nima ʻokú na pukepuke ha foʻi māmani ʻoku ʻasi ai ha haati

Ko e fatongia tauhí ko ha fatongia ia ke tokangaʻi ha meʻa mahuʻinga. ʻOku falala mai ʻa e Tamai Hēvaní kiate kitautolu ʻaki ʻa e fatongia tauhi ki he māmaní. ʻOku ʻuhinga ʻeni ʻokú Ne kole mai ke tau tokangaʻi mo maluʻi ʻa ʻEne māmani fakaʻofoʻofá.

Fakatomala

Ko e fakatomalá ʻa e founga ʻoku tau kole tokoni ai kia Sīsū Kalaisi ʻi he taimi ʻoku tau fai ai ha fili ʻoku halá. Ke fakatomalá, ʻoku fiemaʻu ke tau ongoʻi fakatomala ʻi he meʻa kuo tau faí, kole ʻa e tokoni mo e fakamolemole ʻa e Tamai Hēvaní, pea feinga ke fakaleleiʻi ia. Koeʻuhí ko e Fakalelei ʻa e Fakamoʻuí, te tau lava ʻo tafoki mei he ngaahi fili koví pea fai ha ngaahi fili ʻoku leleí.

Puleʻanga Fakasilesitialé

Ko e puleʻanga fakasilesitialé ko e feituʻu ia ʻoku ʻafio ai ʻa e Tamai Hēvaní mo Sīsū Kalaisí. ʻI heʻetau fili ke muimui ʻia Sīsū Kalaisí, te tau lava ʻo nofo ai ʻi ha ʻaho mo hotau ngaahi fāmilí ʻo taʻengata.

Toetuʻu

Ko ha kiʻi tamasiʻi ʻoku tuʻu ʻi he tafaʻaki ʻo ha fakatātā ʻo hono sinó

Ko e Toetuʻú ʻa e taimi ʻoku toe fakataha mai ai ho laumālié mo e sinó hili hoʻo maté. Ko hoʻo toetuʻú pē, ʻoku haohaoa ho sinó, pea he ʻikai te ke toe lava ʻo puke pe mate. Koeʻuhí ko e Fakalelei ʻa Sīsū Kalaisí, ʻe toetuʻu ʻa e tokotaha kotoa pē.