Kaveinga ʻo e Māhina Ní: Fakatefito Hoʻo Moʻuí ʻia Sīsū Kalaisi

Kilisimasi Fiefia siʻi ngaahi kaungāmeʻa!

ʻI heʻeku hoko ko ha taautaha kei talavoú, ʻoku fonu ʻeku moʻuí ʻi ha ngaahi fili mo ha ngaahi aʻusia faingataʻa. ʻOku ou ʻamanaki atu pē mahalo ʻoku mou—siʻetau kau laukongá—ʻi ha ngaahi tūkunga tatau.

ʻE lava ke hoko ʻi he ngaahi fuofua taʻu ʻo ʻete hoko ko ha tokotaha lahí ha ngaahi meʻa mahuʻinga ʻo e moʻuí: hiki mei he ʻapi fakafāmilí, ako ke tokangaʻi e ngaahi meʻa fakapaʻangá, tulifua ki he akó, teiti, maʻu ha ngāue, nofo-mali lelei, hoko ko ha mātuʻa, pea mo ha ngaahi meʻa lahi ange.

Meʻamālié, naʻa mau maʻu kimuí ni ha ngaahi faleʻi fakaepalōfita lahi ʻe lava ʻo tokoni ke tokangaʻi ʻetau ngaahi ʻamanakí mo e ngaahi lisi ngāué ʻi he fakaʻau ke lōmekina ʻa e moʻuí. Naʻe vahevahe ʻe ʻEletā Lōnolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá ha pōpoaki ʻokú ne liliu moʻoni ʻa e anga ʻeku fakapotupotutatau ʻeku moʻuí: “Ko e hā pē ʻa e meʻa ʻi hoʻo lisi ngāue ke fakahokó, foaki ha taimi tatau, ʻikai ko e taimi ʻatā pē, maʻá e ʻEikí.”

ʻI he faʻahitaʻu Kilisimasi ko ʻení, naʻa mau loto ke fakamanatu atu ʻa e ʻofa mo e tokanga lahi ʻoku maʻu ʻe he Fakamoʻuí kiate koé. Naʻa mau faʻu ʻa e makasini YA Fakauike ko ʻení ke tokoni ke ke fakatefito hoʻo moʻuí ʻi he Fakamoʻuí. ʻI hoʻo tokanga taha kiate Iá, te ke ongoʻi ʻEne ʻofá mo e fakahinohinó ʻi hoʻo foua ho ngaahi fuofua taʻu fakamatuʻotuʻá.

Ko ha ngaahi fakamatala ʻeni ʻe niʻihi te ke lava ʻo maʻu mei he kau taautaha kei talavou ʻi he funga ʻo e māmaní ʻi he māhina ko ʻení:

• Ko e hā te tau lava ʻo fai ke fakamanatua ʻa Kalaisi ʻi he taʻú kakato

• Te tau lava fēfē ʻo tali ʻa e nongá lolotonga ha faʻahitaʻu Kilisimasi moveuveu

• Ko e hā ʻoku totonu ai ke tau falala ki he maama ʻa Kalaisí ʻi heʻetau moʻui fakaʻahó

ʻOku tau maʻu foki ha ngaahi talanoa ko ha konga ʻo ʻetau ngaahi fakamatala hokohokó:

• Ngaahi Taukei ʻo e Moʻuí: ʻOku vahevahe ʻe ha taautaha kei talavou ha ngaahi tokoni ki hono fakasiʻisiʻi ʻo e taimi lomi telefoní ʻi hoʻo moʻuí—pea mo e ngaahi tāpuaki ʻe lava ke maʻu aí.

• Tautautefito maʻá e Kau Mali Foʻoú: ʻOku fakamatalaʻi ʻe ha tokotaha lahi ʻosi mali ʻa e founga naʻá ne tupulaki ai ki hono fatongia ko ha hoa malí ʻaki hono fakatupulaki ha tukufakahoko naʻe fakatefito ʻia Kalaisi.

• Mei he Malaʻe ʻo e Ngāue Fakafaifekaú: Founga naʻe hanga ai ʻe he aʻusia ʻa ha talavou ʻe taha ʻi he ngāue fakafaifekaú ʻo akoʻi ia fekauʻaki mo e fiefia ʻo e Kilisimasí

Manatuʻi, ʻoku fekauʻaki ʻa e faʻahitaʻu Kilisimasí mo ha meʻa lahi ange ʻi he mana pē ʻo e ʻaloʻi ʻo Kalaisí—ʻoku fekauʻaki foki ia mo e mana ʻo ʻEne moʻuí mo e māmá, ʻa ia te tau lava kotoa ʻo fakaafeʻi ki heʻetau moʻuí ʻi he ʻaho kotoa pē ʻo e taʻú.

ʻOfa atu,

Maddy Poll, YA Fakauiké Tokotaha Akoako Fakaʻētitá