Mei he Malaʻe ʻo e Ngāue Fakafaifekaú
Founga Naʻe Akoʻi Mai Ai ʻe Heʻeku Ngāue Fakafaifekaú ʻa e Fiefia ʻo e Kilisimasí
Kimuʻa peá u kau ki he Siasí, naʻe ʻikai mahuʻingamālie ʻa e Kilisimasí kiate au. Kuó u ʻiloʻi ʻeni ko ha taimi ia ke maʻu—mo vahevahe ai—ʻa e ngaahi ongoongo lelei ʻo hoku Fakamoʻuí.
Naʻe makehe kiate au hono maʻu ha uiuiʻi fakafaifekau ke ngāue ʻi he Misiona China Hong Kong—koeʻuhí ko aú mei Hongo Kongo!
ʻI heʻeku ngāue ko ha faifekau akoʻi ʻi hoku fonuá naʻe ʻuhinga ia naʻe ʻikai fiemaʻu ke u ako ha lea pe ʻulungaanga fakafonua kehe. Ka neongo naʻe ʻikai fiemaʻu ke u ako ʻa e ngaahi anga fakafonua foʻoú, naʻe tokoni ʻeku ngāue fakafaifekaú ke u vakai ki ha ʻaho mālōlō ʻe taha—Kilisimasí—ʻi ha founga matuʻaki foʻou.
Ko Hono Vahevahe ʻo e Ngaahi Ongoongo Leleí
Naʻá ku kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he taʻu ʻe fā kuohilí, pea ko au pē ʻa e mēmipa ʻi hoku fāmilí. Naʻe ʻikai ohi hake ʻeku mātuʻá, ngaahi tokouá mo au ko ha kau Kalisitiane, ko ia neongo naʻe hoko ʻa e Kilisimasí ko ha ʻuhinga lelei ke mau folau ai pe fiefia ʻi ha houakai fakaʻofoʻofa, naʻe ʻikai fuʻu ʻuhingamālie ia kiate kimautolu.
Ka naʻe teuteu ʻe he Tamai Hēvaní ha hala moʻoku ke ako ʻEne ongoongoleleí mo kau ki Hono Siasí. ʻI heʻeku hoko ko ha faifekaú, ko ʻeku taumuʻá ke tokoniʻi e niʻihi kehé ke nau omi kia Kalaisi. Ko ha faingamālie makehe ia ke mahino kiate au ʻa e ʻuhinga moʻoni ʻo e Kilisimasí.
ʻOku tokolahi ha kakai kehe ʻoku nau fakakaukau ki he Kilisimasí ʻo hangē ko e fakakaukau ne u faʻa maʻú. ʻE lava ke nau ʻilo ko ha ʻaho mālōlō ia, ka ʻoku ʻikai ke nau faʻa ʻiloʻi ʻa hono puipuituʻá. Mahalo foki ʻoku ʻikai ke nau ʻilo ko hai ʻa Kalaisi. Ka kiate aú, kuo hoko ʻa e taimi Kilisimasí ko ha faʻahitaʻu ke vahevahe ai mo e tokotaha kotoa ʻa e ngaahi ongoongo lelei ʻoku tau maʻu ha Fakamoʻuí.
Naʻe akoʻi ʻe ʻEletā S. Maʻake Paama ʻo e Kau Fitungofulú, “ʻOku mahuʻinga ange ia ʻi he koulá, laipenó, pe mulá, he ʻoku hoko ʻa e fakamoʻoni haohaoa kia Sīsū Kalaisi ko hotau Fakamoʻui mo e Huhuʻi fakatāutahá, ko e uho moʻoni ia ʻo e meʻa ʻoku tau fakamanatua ʻi he Kilisimasí.”
ʻOku ou houngaʻia naʻá ku lava ʻi heʻeku ngāue fakafaifekaú ʻo fakaʻaongaʻi hoku Kilisimasí ʻo ʻikai ngata pē ʻi hono fakahoungaʻi ʻeku fakamoʻoni kia Sīsū Kalaisí ka ki hono vahevahe ʻeku fakamoʻoní ki he niʻihi kehé.
Ko e Fiefia ʻi he Tokanga Taha ki he Niʻihi Kehé
Lolotonga ha ngāue fakafaifekau, ʻoku ʻikai ke ke tokanga taha kiate koe ka ki hono faitokonia ʻo e niʻihi kehé. ʻOku ou ongoʻi ʻoku ou fakakaukau ki he niʻihi kehé ʻo lahi ange he taimí ni. Ko e ʻuhinga ia kuo fakafiefia ai ʻa e Kilisimasí kiate aú.
Mahalo pē ʻoku tuenoa ʻa e kakai kehé, fiemaʻu tokoni, pe ongoʻi holomui fakalaumālie ʻi he taimi ko ʻeni ʻo e taʻú. Ka koeʻuhí ko Sīsū Kalaisi, ʻoku ou maʻu ha ngaahi ongo māfana ʻo e fiefiá mo e ʻofá ʻi hoku lotó. Naʻe ʻomi ʻe heʻeku ngāue fakafaifekaú ha ngaahi faingamālie ke tokoni ke ongoʻi ʻe he niʻihi kehé ʻa e meʻa ne u ongoʻi fekauʻaki mo hoku Fakamoʻuí.
ʻI he Kilisimasi ne toki ʻosí, naʻá ku ʻaʻahi mo hoku hoá ki he Mīsini Foaki ʻa e Siasí ʻi Hongo Kongó. Ko e kemipeini tokoni ke Fakamaama ʻa e Māmaní ko ha faingamālie fakaʻofoʻofa ia ke ʻofa ki he niʻihi kehé mo vahevahe ʻa e fiefia ʻo e Fakamoʻuí mo kinautolu.
Naʻe pehē ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku fakamanatua ʻe he Kilisimasí ha ongoʻi ʻo e kau maí, ʻo e uouangatahá, pea mo ha tukui kolo ʻoku fakatefito ʻi hono fakahoko ha ngaahi fuakava ʻia Sīsū Kalaisi pea mo e niʻihi kehé.” ʻOku tau fakamanatua ʻa e Kilisimasí ke tokoni ke tau manatuʻi ʻa Sīsū Kalaisi, ʻa ia ʻokú ne fakafehokotaki kitautolu kotoá. ʻI heʻetau tokoni ki he niʻihi kehé, ʻoku tau vāofi ange ai mo ofi ange kiate Ia.
Ko e Muimui he Sīpinga ʻa e Fakamoʻuí
Neongo ʻa e fiefia kotoa ʻo e taimi Kilisimasí mo e fiefia ʻoku maʻu mei hono vahevahe ʻo e ongoongoleleí, ʻe lava pē ke faingataʻa ʻa e ngaahi ʻaho mālōloó lolotonga ha ngāue fakafaifekau. Ko e ʻofa ki ʻapí pe manavasiʻi ʻi he ʻikai feohi mo e ngaahi kaungāmeʻá pe fāmilí ko ha ngaahi ongo moʻoni ia.
Ka ʻoku kole atu ʻe he ʻEikí ke fakahoko ʻEne ngāué. Kapau ʻokú ke ongoʻi mamahi lolotonga hoʻo Kilisimasi ʻi he ngāue fakafaifekaú, ko ʻeku faleʻí ke ke fakakaukau kia Sīsū Kalaisi.
Naʻe hāʻele mai ʻa e Fakamoʻuí ki he māmaní ʻi he tuʻunga anga fakatōkilalo. Naʻá Ne mavahe mei Hono ʻapi fakalangí peá Ne hāʻele hifo ki he māmaní ke fakahoko e ngāue ʻa ʻEne tamaí. Naʻá Ne feilaulauʻi Ia ke huhuʻi kitautolu kotoa. Mahalo ʻe ngali fakataʻelata ia, ka naʻe ʻiate Ia ʻa e Tamai Hēvaní.
Pea ko e meʻa tatau pē ʻi hoʻo ngāue fakafaifekaú. ʻOku ʻikai ke ke tuenoa. Neongo ʻe malava ke ke mamaʻo mei ho fāmilí, ka ʻoku ʻiate koe maʻu pē hoʻo Tamai ʻi he Langí mo ho Fakamoʻuí. Te ke maʻu, ʻo fakafou ʻiate Kinaua, ha mālohi ke ikunaʻi hoʻo ngaahi polé.
ʻI heʻeku ngāue fakafaifekaú, naʻá ku ongoʻi ha ʻofa lahi ʻaupito. ʻOku vāofi ange hoku vā fetuʻutaki mo e ʻOtuá mo Sīsū Kalaisí ʻi he taimí ni. ʻOku ou ʻilo ʻokú Na laukau ʻaupito ʻi heʻeku fakahoko ʻEna ngāué. Ko e ngāue maʻongoʻonga taha ia ʻi he māmaní.