Mei he YA Fakauiké: Ngaahi Akonaki ʻa e Kau Taki ʻo e Siasí mei he Mītia Fakasōsialé
Ko Hono Vahevahe ʻa e Maama ʻo e ʻOfa ʻa Kalaisí ʻi he Faʻahitaʻu Kilisimasi Ko ʻEní pea Hokohoko Atu
Ko e hā kuo akoʻi ʻe he kau palōfita moʻuí mo e kau taki kehe ʻo e Siasí ʻi he mītia fakasōsialé fekauʻaki mo e sīpinga ʻa Sīsū Kalaisi ʻo e ʻofá mo e tokoní?
Tauhisipi Angavaivaí, tā fakatātaaʻi ʻe Yongsung Kim
ʻOku makehe maʻu pē ʻa e faʻahitaʻu Kilisimasí ʻi he ngaahi fakamatala mahino ʻo e mahuʻinga ʻo Sīsū Kalaisi ki he māmaní:
“Pea ʻi māmani ʻa e melinó” (Luke 2:14).
“Ongoongo lelei ʻo e fiefia lahi” (Luke 2:10).
Mei he toʻu tangata ki he toʻu tangata, ʻoku fakamatalaʻi ʻe he ngaahi kupuʻi lea ko ʻení ʻa e nonga, fiefia mo e maama taʻe-hano-tatau ʻoku foaki mai ʻe he Fakamoʻuí.
ʻI he kotoa ʻo e moʻui fakamatelie ʻa Kalaisí, naʻá Ne fakahaaʻi mai ʻa e founga ke vahevahe ai ʻEne ʻofá mo e niʻihi kehé. ʻOku akoʻi kitautolu “ʻoku ʻikai [fai ʻe Kalaisi] ha meʻa ʻo kapau ʻe ʻikai ʻaonga ia ki he kakai ʻo e māmaní; he ʻokú ne ʻofa ki he māmaní” (2 Nīfai 26:24).
ʻI heʻetau fakamanatua e ʻaloʻi ʻo Kalaisí, te tau lava ʻo fekumi ke mahino ʻEne ʻofa maʻá e fānau takitaha ʻo e ʻOtuá pea fakahoko ʻa e ʻofa tatau.
Kuo lea ʻa e kau taki ʻo e Siasí fekauʻaki mo ʻEne ngaahi akonakí ʻi he mītia fakasōsialé. ʻOku fakahinohino kitautolu ʻe he ngaahi pōpoaki ko ʻení ke vahevahe ʻa e ʻofa ʻa Kalaisí mo e niʻihi kehé ʻi he Kilisimasi ko ʻení pea hokohoko atu:
Tokoniʻi ʻa e “Toko Tahá”
“Neongo naʻe malu pē ha toko 99 ʻo ʻEne fanga sipí ʻi Hono tafaʻakí, naʻe fekumi ʻa e tauhi sipí ki he toko taha naʻe molé. …
“… ʻOku ou fakaafeʻi koe ke ke fakakaukau ʻi he faʻa lotu: ko hai ʻokú ke ʻiloʻi mahalo kuo loto-foʻi? Ko hai ʻe ala fiemaʻu ke ke fakalelei mo ia pe kole fakamolemole ki ai? Kuó ke faʻa fakakaukau nai ki ha hingoa ʻe taha kimuí ni mai, neongo ʻoku ʻikai te ke fuʻu ʻilo hono ʻuhingá? ʻI hoʻo ʻomi e ngaahi fehuʻi ko ʻení ki he ʻEikí, te Ne ueʻi koe ke ke ʻilo ʻa e founga te ke lava ai ʻo alanima atu ke hiki hake ʻa e toko taha ʻoku fiemaʻu tokoní.
“… ʻI heʻetau takitaha ngāue fakaetauhi ki he toko taha ʻoku tau lava ʻo faitokoniá, te tau lava ʻo fakamafola ʻa e ʻofa ʻa Sīsū Kalaisí ʻi he funga ʻo e māmaní.”
Palesiteni Russell M. Nelson, Facebook, June 1, 2024, facebook.com/russell.m.nelson.
Fakamolemole, Fakamoʻui ʻa e Ngaahi Kafo Motuʻá, Fakaleleiʻi ʻa e Ngaahi Vā Fetuʻutakí
“Naʻe fakahā ʻe he kau ʻāngelo ʻo e langí ha melino ki he kakai kotoa pē—ki he ngaahi kaungāmeʻá mo e solá.
“Naʻe akoʻi ʻe he Fakamoʻuí, ‘ʻofa ki ho kaungāʻapí ʻo hangē pē ko koé’ (Mātiu 22:39). Naʻá Ne akoʻi foki ʻoku totonu ke tau ʻofa ki hotau ngaahi filí, tāpuakiʻi ʻa kinautolu ʻoku kapeʻi ʻa kitautolú, failelei kiate kinautolu ʻoku fehiʻa kiate kitautolú, pea hūfia ʻa kinautolu ʻoku ngaohikovia ʻa kitautolu mo fakatangaʻi ʻa kitautolú.
ʻI heʻetau ngāue ki he taumuʻa ʻoku fakamatalaʻi ʻi he ngaahi akonaki ko iá, ʻoku totonu ke hoko ʻa e Kilisimasí ko ha taimi ʻo e fefakamolemoleʻaki, ko ha taimi ke fakamoʻui ai e ngaahi kafo motuʻá mo fakaleleiʻi e ngaahi vā kuo momokó.”
Palesiteni Dallin H. Oaks, Tokoni ʻUluaki ʻi he Kau Palesitenisī ʻUluakí, Facebook, Dec. 8, 2024, facebook.com/dallin.h.oaks.
ʻOua Te Ke Fakafaingataʻaʻiaʻi Ia
“ʻOku mahino ʻa e ngaahi akonaki ʻa e Fakamoʻuí fekauʻaki mo hotau vā fetuʻutaki mo e Tamai Hēvaní pea ʻiate kitautolú: ʻOfa mo tauhi ki he ʻOtuá, pea ʻofa ki hotau ngaahi kaungāʻapí pea tokoniʻi kinautolu.
“ʻOua te ke fakafaingataʻaʻiaʻi ia. Kuo tau maʻu ha fatongia ke ʻofa ʻi he fānau kotoa ʻa e ʻOtuá pea fakaafeʻi ʻa e tokotaha kotoa ke haʻu ʻo mamata—ke ako lahi ange fekauʻaki mo e ongoongolelei ʻo Sīsū Kalaisi kuo fakafoki maí. … ʻAi ke mahinongofua. ʻOku tau ʻofa, vahevahe mo fakaafe.
ʻEletā Dieter F. Uchtdorf, Kōlomu ʻo e Kau ʻAposetolo ʻe Toko Hongofulu Mā Uá, Facebook, Jan. 31, 2025, facebook.com/dieterf.uchtdorf.
Tuku ke Hoko ʻa e ʻOfa Haohaoa ʻa Kalaisí ko e Faitoʻo ki he Fakakikihí
“ʻOku fakamanatu mai kiate au ha tukufakahoko Faka-Kilisimasi lelei naʻá ne huluni ha anga fakafonua faka-ʻAfilika mo ha ngaahi akonaki faka-Kalisitiane. Naʻe tupulaki ʻa e tukufakaholó ʻi ha ngaahi kolo ʻe niʻihi ʻi ʻAfilika Hihifo mo Lotoloto. …
“Naʻe talamai ʻe ha tangata mei ha taha ʻo e tūkui kolo ko ʻení, ʻi hono kolo siʻisiʻí, naʻe ʻi ai ha tukufakahoko faka-Kilisimasi naʻe fakataha ai ʻa e tokotaha kotoa pē naʻe vā tamaki mo ha taha kehe ʻi he koló ʻi he pongipongi ʻo e ʻAho Kimuʻa pea Kilisimasí pea mo e taki ʻo e koló. ʻE fanongo ʻa e takí mo feinga ke fakaleleiʻi ʻa e vā tamakí ki he fiemālie ʻa e ongo tafaʻakí fakatouʻosi.
ʻE fakahoko ʻa e fakalelei ki he ngaahi vā tamakí ʻi he ʻahó kakato ka ʻi he fakaʻosinga ʻo e ʻahó, he ʻikai ha toe taha ʻi he koló ʻoku teʻeki fakaleleiʻi haʻane vā tamaki mo ha taha kehe. Ko e taumuʻa ʻo e tukufakaholo ko ʻení ke mateuteu ʻa e kakai ʻo e koló ki he ʻaho hokó ke fakafiefiaʻi ʻa e ʻaloʻi ʻo e Pilinisi ʻo e Melinó. …
“Mahalo ko e founga ʻe taha te tau lava ai ʻo fakaʻapaʻapaʻi ʻa e Fakamoʻuí ʻi he Kilisimasi ko ʻení ko hono tukuange ʻetau ʻitá, fekumi mo foaki ʻa e fakamolemolé. Te tau lava ʻo tuku ʻa e ʻofa haohaoa ʻa Kalaisí ke hoko ko e faitoʻo ʻo e fekeʻikeʻí.”
ʻEletā Dale G. Renlund, Kōlomu ʻo e Kau ʻAposetolo ʻe Toko Hongofulu Mā Uá, Facebook, Dec. 24, 2024, facebook.com/DaleGRenlund.
Hoko ko ha Kau ʻĀngelo ʻi he Moʻui ʻa ha Taha Kehe
“ʻOku tau ako ʻi he 2 Nīfai 32:3 ʻoku talaki ʻe he kau ʻāngeló ʻa e folofola ʻa Kalaisí: ‘ʻOku lea ʻa e kau ʻāngeló ʻi he mālohi ʻo e Laumālie Māʻoniʻoní; ko ia, ʻoku nau lea ʻaki ʻa e ngaahi folofola ʻa Kalaisí. Ko ia, naʻá ku pehē kiate kimoutolu, keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.’
“Ko e ʻāngeló ko ha taha pē ʻoku lea ʻi he ngaahi folofola ʻa Kalaisí mo ngāue fakaetauhi ʻi he founga ʻa Kalaisí.
Te tau lava ʻo hoko ko ha ʻāngelo ʻi he moʻui ʻa ha tokotaha kehe!
Sisitā Amy A. Wright, Tokoni ʻUluaki ʻi he Kau Palesitenisī ʻo e Palaimelí, Facebook, Dec. 9, 2024, facebook.com/Primary1stCounselor.