Ngaahi Taukei ʻo e Moʻuí:
Tokoni! ʻOku Puleʻi ʻe he Telefoní ʻEku Moʻuí!
ʻE tokoni hoʻo mavahe mei hoʻo telefoní ke ke fehokotaki mo kinautolu ʻoku mahuʻinga tahá.
Lī ʻa e telefoní!
Sai, mahalo ʻoua ʻe lī iá. (ʻOku mamafa ʻa e telefoní, pea ʻe fiefia hoʻo uāletá ʻi he ʻikai te ke lī iá.)
Ka kapau ko ha taha koe ʻokú ke fie siʻaki ʻa e fakahohaʻá, pae taʻetukú mo e maumau taimí … ʻoku fakataumuʻa ʻeni kiate koe.
Ko Hono Kumi ha ʻUhinga ke Tuku Hifo ai Hoʻo Telefoní
ʻOku faingofua ange ke ke fai ha meʻa ʻi hoʻo manatuʻi ʻa e ʻuhinga ʻokú ke fakahoko ai iá. Kimuʻa pea tau hoko atu ki he ngaahi founga ke tokoniʻi ai koe ke tuku hifo hoʻo telefoní, tau kumi ha ngaahi ʻuhinga.
1. Fakahoko ia Maʻau Pē
Neongo ʻoku ʻi ai ha ngaahi meʻa lahi ʻi hoʻo telefoní ko ha ngaahi ʻekitivitī fakaʻofoʻofa ʻi hono fakaʻaongaʻi leleí (hangē ko hono lau ʻo e YA Fakauiké), ka ko hono fakahoko hanau taha pē ʻo fuʻu tōtuʻá mahalo he ʻikai ke ne ʻoatu ʻa e potupotutatau fakalaumālie, fakaeongo mo fakatuʻasino ʻokú ke fiemaʻú.
ʻI he founga fakaanga fakaekita siʻisiʻi tahá, ʻokú ke taau mo ha aʻusia lelei ange! Pea ʻoku ʻuhinga ʻa e lelei angé ke siʻi ange e taimi ʻi he telefoní.
2. Fakahoko ia Maʻá e Kakai ʻOkú Ke ʻOfa Aí
Ko hai ʻoku ʻofa ʻiate koé? Fakatokanga atu: ʻoku ʻikai ko hoʻo telefoní. Neongo ʻoku fakaʻatā kitautolu ʻe he telefoní ke tau felōngoaki mo kinautolu ʻoku tau ʻofa aí, ka ʻoku ʻi ai ha ngaahi taimi ʻi hono fakaʻaongaʻi ʻetau telefoní (toʻo ʻetau tokangá, ʻikai toe lava e fetuʻutaki mata ki he matá, fakamamahiʻi kitautolu he ngaahi fakafehoanaki ʻoku ʻikai leleí, etc.) ʻokú ne fakamamahiʻi kitautolu kae ʻikai tokoniʻi hotau ngaahi vā fetuʻutakí. He ʻikai lava ke tau tuku ke uesia ʻe he tuʻo lahi ʻo e fehokotakí ʻa e tuʻunga leleí.
ʻE lava ʻe hono tuku hifo hoʻo telefoní ʻi ha taimi lahi angé ke fakaava ʻa e matapaá ki ha ngaahi fehokotaki loloto mo lelei ange mo e kakai ʻoku mou feohí.
3. Fakahoko ia maʻá e Langí
Hoko atu ʻi he fehuʻi “Ko hai ʻoku ʻofa ʻiate koé?”: Ko e Tamai Hēvaní mo Sīsū Kalaisi! Ka he ʻikai ʻasi atu ʻEna ngaahi pōpoaki kiate koé ʻi hoʻo telefoní.
Ka ko ʻEna ngaahi pōpoakí—fakatāutahá, mālohí, liliu moʻuí—ʻe ongo ia ki ho lotó mo e ʻatamaí mo e moʻuí ʻi he tokoni ʻa e Laumālie Māʻoniʻoní. ʻE lava ke ke tali lelei ange e ngaahi pōpoaki ko iá ʻo ʻikai ha fakatuta pe fakahohaʻa mei hoʻo telefoní.
Kuo pehē ʻe Palesiteni Lāsolo M. Nalesoni: “ʻOku ou kole atu ke tuku ke lāngilangiʻia ʻa e ʻOtuá ʻi hoʻomou moʻuí. Tuku haʻo taimi lahi ange ki he ʻEikí.” Kuo poupou pehē foki mo ʻEletā Lōnolo A. Lasipeni ʻo pehē, “Ko e hā pē ʻa e meʻa ʻi hoʻo lisi ngāue ke fakahokó, foaki ha taimi tatau, ʻikai ko e taimi ʻatā pē, maʻá e ʻEikí.”
ʻI hoʻo fakafetongi ʻaki ʻa e taimi lahi tatau ʻi he telefoní mo ia ki he langí (hangē ko e lau folofolá, fanongo ki he mūsika ʻo e ongoongoleleí, lotú, fakalaulaulotó mo e ʻalu ki he temipalé) ʻe tokoni ia ke fakaloloto hoʻo vā fetuʻutaki mo e Tamai Hēvaní mo Sīsū Kalaisí.
Te u Fakahoko Fēfē Nai ʻEni?
Tatau ai pē pe ʻokú ke feinga ke fakasiʻisiʻi ʻa e ivi tākiekina ʻo hoʻo telefoní kiate koé, niʻihi ʻokú ke ʻofa aí, hoʻo Tamai Hēvaní mo e Fakamoʻuí, pe kotoa ʻo e ngaahi meʻá ni, ʻe kei faingataʻa pē ke ikunaʻi ʻa e fuʻu tōtuʻa ʻo hono fakaʻaongaʻi ʻo e telefoní Hangē ko ha faʻahinga tōʻonga moʻui pē, kuo pau ke ke fai ha meʻa ke taʻofi ʻa e siakale ko iá. Ko ha ngaahi fakakaukau ʻeni:
-
ʻOange maʻa hoʻo telefoní hano tukuʻanga makehe mei ho kató. Kapau ʻoku ʻikai ke ke lava ʻo aʻu ki hoʻo telefoní ʻi he ngaahi taimi ʻoku ʻikai ke ke fuʻu fiemaʻu ai iá, he ʻikai ke ke lava ʻo pae taʻe ʻi ai ha telefoni!
-
Fokotuʻu ha ngaahi feituʻu ke ʻoua naʻa fakaʻaongaʻi ai ʻa e telefoní. Ko e fē ʻa e feituʻu ʻoku tōtuʻa ai hoʻo fakaʻaongaʻi ʻa e telefoní? Ko ho mohengá? Tēpile kaí? Falekaukaú? Feinga ke fokotuʻu e ngaahi feituʻu mo e taimi ko iá ke ʻoua naʻa toe fakaʻaongaʻi ai hoʻo telefoní. Tuku hoʻo telefoní ʻi ha loki kehe ke ʻoua naʻa ʻahiʻahiʻi koe ke ke fakaʻaongaʻi ia lolotonga ʻa e ngaahi taimi ko ʻení.
-
ʻAi ke ʻi ai ha fillers taʻeoliʻia kehe. Teuteu ha ngaahi meʻa kehe ke ke hanganoa ai. ʻI hoʻo feinga ke taʻofi e saikolo ko ʻeni ʻo e ngaahi fakakaukau taʻeʻaongá, ʻoku tokoni ia ke fakafonu ho ʻatamaí ʻaki ha ngaahi fakakaukau lelei. Ko e meʻa tatau pē mo ho founga ngaahi telefoní. ʻI hoʻo ongoʻi taʻemanonga ke pae ʻo fuʻu fuoloá, fakakaukau angé pe ʻoku ʻi ai ha meʻa fakafiefia, foʻou, fakanonga pe ʻaonga ange ʻe lava ke fakaʻaongaʻi ki ai hoʻo taimí. Kamata tohi haʻo tohinoa. Tāpelu fakafuo ha laʻipepa (origami). Luelue Naʻa mo hono fili ha meʻa lelei ange ke fakahoko ʻi hoʻo telefoní, hangē ko e tā ki haʻo kaungāmeʻa kae ʻikai sio vitiō taʻetukú, ko ha kamataʻanga lelei ia.
-
Kole ki he Tamai Hēvaní ha ngaahi fakakaukau pau. ʻOkú ke fakakaukau ʻoku ʻikai tokanga mai ʻa e ʻOtuá ki ha taumuʻa noaʻia peheni? Toe fakakaukau angé. ʻOkú Ne tokanga mai ki hoʻo ngaahi taumuʻa māʻoniʻoní. Tautautefito ki he tokoni hono fakasiʻisiʻi hoʻo ngaahi telefoní ke fakatupulaki hoʻo ongoʻingofua ʻa e laumālié. Lotua fakaʻaho ha ngaahi fakakaukau ke fakangatangata ho taimi ʻi he telefoní pea ki ha mālohi ke muimuiʻi hoʻo palaní. ʻE lava ke ueʻi koe ʻe he Laumālie Māʻoniʻoní ʻaki ha ngaahi fakakaukau fakataautaha ʻe tokoni kiate koe.
-
Haʻisia ki ha taha. Ko e hā pē ʻa e founga te ke filí, ʻe lava ʻe hono toutou lipooti hoʻo fakalakalaká ki ha hoa mali, kaungā-loki pe kaungāmeʻá ke ke tauhi ki hoʻo palaní. Te ke lava foki ʻo fakaafeʻi kinautolu ke fakaleleiʻi mo ʻenau founga ngaahi telefoní fakataha mo koe.
ʻOua ʻe Foʻi
Kapau te ke feinga fakahoko ha taha ʻo e ngaahi meʻá ni pea nau fakaleleiʻi hoʻo ngaahi palopalema fakatelefoní ʻi he fuofua feingá, tōatu! Te u fiemaʻu foki mo ha konga ʻo ho DNA makehé maʻaku, kātaki. Ka ʻo kapau ʻokú ke feinga pea ʻikai lavaʻi, tafoki ki he ʻOtuá, toe tukupā, fiemālie ʻi he ʻilo ʻokú ke maʻu ha taha ʻo e ngaahi meʻafoaki maʻongoʻonga taha ʻa e ʻOtuá: ko e fakatomalá.
ʻOku ʻikai ko ha angahala ʻa e tōtuʻa ʻo hono fakaʻaongaʻi hoʻo telefoní, ka te ne lava ʻo fakatupu ha ngaahi angahala ʻo e taʻefeingá ʻi hoʻo moʻuí ʻi he taimi ʻoku ʻikai ke ke aʻusia ai ʻa e ngaahi meʻa ʻoku mahuʻinga tahá. Kuo ʻosi akoʻi ʻe Palesiteni Nalesoni:
“Ko e fakatomalá ʻa e kī ki he fakalakalaká ʻOku tauhi kitautolu ʻe he tui haohaoá ke tau laka atu ki muʻa ʻi he hala ʻo e fuakavá.
Kātaki ʻoua ʻe manavasiʻi pe fakatoloi ʻa e fakatomalá. ʻOku fiefia ʻa Sētane ia ʻi hoʻo mamahí. Fakangata ia ke taʻofi. Kapusi hono ivi tākiekiná ki tuʻa mei hoʻo moʻuí! Kamata ke ke aʻusia he ʻahó ni ʻa e fiefia ʻi hono siʻaki ʻa e tangata fakaekakanó.”
Fakatomala leva! Toe feinga pē! Kamata he ʻahó ni ke liliu hoʻo founga ngaahi telefoní. Te ne tāpuekina hoʻo moʻuí mo ʻoatu ha taimi lahi ange ke tāpuekina ʻa kinautolu ʻoku mou feohí.